Nẹ ọke ọmọvwerhe mẹ rhe, ekrun mẹ e rhirhiẹ kẹrẹ amwa i Leipzig, rọ ha East Germany, rọ kẹrẹ ẹkwotọre i Czech ọrhẹ Poland. Ọke mia ha ẹgbukpe erhan, owian ọsẹ mẹ nọ lẹrhere ame kwa riẹ inọkun, ame ni kiki riẹ ẹkwotọre i Brazil ọke oru ame ni riẹ Ecuador.

Ọke mia ha ẹgbukpe 14, ne firi mẹ rhẹ ibọdisku uvuẹn Germany. Nime eri vwiẹre mẹ i ha ekete oseseri uvuẹn South America, mẹmẹ ọvo nọ ya hẹrote omamẹ. Ni mia hẹroso omamẹ ọvo. Mi vwe roro kpahen oborẹ iruemru mẹ a hobọte awọrọ lele-e.

Ọke mie te ẹgbukpe 17, eri vwiẹre mẹ ni ghwẹrioma rhiẹ Germany. Vẹrhẹ bi, mẹmẹ rhẹ aye ye gbe rhirhiẹ. Ọrẹn nime mi hẹroso omamẹ, nọ bẹn mi ne lele eri vwiẹre mẹ rhirhiẹ. Ọke mie te ẹgbukpe 18, ni mi kwa nẹ oghwa.

Ni mia guọlọ oborẹ mi ne ru vwo obọdẹn akpenyerẹn. Ọke mie yono kpahen aruẹ akpọ ọrhẹ ukoko sansan hin, ni mi mẹrẹnvwrurhe taghene oborẹ ọ mai rhomu mi na sabu ha akpenyerẹn mẹ ru, yẹ ọrẹ mi ne kin otọrakpọ orhorhomu ọnana bọmọke ituakpọ ina ghwọghiẹ.

Ni mi dẹ imotosaiko jeghwai nẹ i Germany riẹ Africa. Ọrẹn o jiri-i, ni mi ghwẹrioma riẹ Europe ya kwaphiẹ imotosaiko mẹ. Ọke oru, ni mi riẹ unerhurun ọrẹ Portugal. Ni mi nyajẹ imotosaiko mẹ vwo avwaye, ji tuẹn onya mẹ rhọ rhẹ owọ.

Ni mi homaba ẹko iphuphẹn ezẹko ra guọlọ danvrẹn Atlantic Ocean rhẹ owọ. Usuẹn aye yi mia mẹrẹn ane mẹ re se Laurie. Ọke ukaro, ame ni ghwa owọ riẹ ekete ame o kinhariẹ ọrẹ Caribbean. Ọke ame e rhirhiẹ Puerto Rico ibiọke, ame ni ghwẹrioma riẹ Europe. Ame na guọlọ owọ rẹ ame ina kanren no vwo ekete ame ina sabu rhirhiẹ uvuien. Ọrẹn, ibiamo esa ọvo yẹ ame i wian owian owọ na. Ame arha sabu wian yen hi-in, nime a sanirin mẹ ba ihworho re ne yono rhiẹ isodja i Germany.

Mi ghwọghọ ibiamo 15 rhẹ uyono i navy ọrẹ Germany. Uvwrọke ọrana, mẹmẹ rhẹ Laurie ni rọnmọren, ji mwuegbe ame ine kin ekete sansan jerẹ oborẹ ame e ruẹ bi. Mi ki riẹ uyono isodja na, ame i dẹ ugboma owọ owu ne. Ọke mia ji ha owian isodja na, ame ni dẹriẹ ugboma owọ na rhiẹ ibiẹ owọ ro vwo oghwa uvuien. Ame i djiroro ame ine rhirhiẹ uvuien jeghwai haye kin ekete irhorhomu sansan uvuẹn akpọ na. Ọke mia wian owian isodja mẹ hin, jeghwai wian rhẹ owọ na, uvwrọke ọrana yẹ Iseri Jehova e ghwoghwo rẹn ame jeghwai tuẹn uyono i Baibol rhọ.

Ọke ukaro, mie nie taghene o vwo oborẹ mi ne wene uvuẹn akpenyerẹn mẹ-ẹ. Nime mi rọnmọ ne, mi ji dobọ isigẹti ephopho ji ne. (Ephesians 5:5) Habaye, mie roro taghene irorẹdjẹ ame ine kin otọrakpọ na jeghwai rhe yono kpahen emama igbevwunu Osolobrugwẹ, ọrana ọvo o teri.

Ọrẹn, itiọrurhomẹmro o vwo ewene ro fori mi ru, maido kpahen uruemru mẹ. Nime mia kparoma omamọ jeghwai hẹroso omobọ mẹ, ena mẹ ọrhẹ oborẹ mi na sabu ru ọvo nọyẹ mie roro kpahan. Akpenyerẹn mẹ ọvo yi mie roro kpahan.

Ẹdẹ owu, ni se kpahen ẹmro i Jesu ọ haphia uvuẹn oberun ugbenu. (Matthew, irhomu-ẹmro ọrẹ 5-7) Ọke ukaro, mie vwẹruọ oborẹ i Jesu ọ ta kpahen omamerhomẹ-ẹ. Jerẹ udje, Jesu ọ tare taghene omamerhomẹ ọ havwiẹ rẹn ihworho erhọmo e kpe ọrhẹ erẹ uhrun ame ọ ka. (Matthew 5:6) No gbe mẹ unu oborẹ ohworho rọ ha erhirhiẹ ọkanronmẹ ono ru vwo omamerhomẹ. Ọke mie yono rhọ, ni mi mẹrẹnvwrurhe taghene ọwan ephian i vwo ọdamẹ re ne yono kpahen Osolobrugwẹ, ọrẹn ana vi mẹrẹn ọdamẹ ọrana vwrurhe vwẹre na kiki sabu nyamwuie. Jesu ọrhọ ta: “Omamerhomẹ ọ havwiẹ harẹn ihworho ri vwo ọdamẹ aye ine yono kpahen Osolobrugwẹ.”—Matthew 5:3.

Ọke ame a tuẹn uyono i Baibol ame rhọ uvuẹn i Germany, mẹmẹ ọrhẹ Laurie ni kwa riẹ i France, ọke oru ame ni riẹ Italy. Ekete ephian ame i nyaren, ame a mẹrẹn Iseri Jehova avwaye. Ẹguọlọ okokodo rẹ aye i vwo kpahen omoma aye ọrhẹ okugbe rọ ha uvwre aye, ọ merhenren mẹ oma omamọ. Ni mi mẹrẹnvwrurhe taghene Iseri Jehova ghini imizu ri ha akpọ ephian. (John 13:34, 35) Ọke oru, mẹmẹ ọrhẹ Laurie ni bromarhame rhiẹ Iseri Jehova.

Ọke ame e bromarhame hin, ame ne ruẹ ewene kpahen uruemru ame. Mẹmẹ ọrhẹ Laurie ni brorhiẹn ame ina nyoma urhie riẹ Africa, orho ru, ame ni na danvrẹn Atlantic Ocean riẹ United States. Ọke ame a ha uvuẹn owọ ame uvuẹn urhie ọduado na, ni mi mẹrẹnvwrurhe taghene mie tulo uvuẹn obaro Ọmemama na-a. Ni mi fiomarhọ isese i Baibol na nime mi vwo ọke buebun, mi vwa jeghwai wian ugogo owian uvuẹn erhẹrhẹ odo na-a. Ikuegbe akpenyerẹn i Jesu ọke rọ ha otọrakpọ na, o teri mẹ ọmudu omamọ. Jesu ohworho rọ gbare, ro ji vwo omẹgbanhon ro no ruẹ kemru kemru, ọrẹn ọ kparoma-a. Ọ tẹnrovi akpenyerẹn ọvo-o, ukpomaran ọrẹ ọye ono ruẹ ọhọre Ọsẹ obẹ odjuwu.

Ọke mie roro kodo kpahen udje i Jesu, ni mi mẹrẹnvwrurhe taghene o fori mi ha Uvie Osolobrugwẹ karo uvuẹn akpenyerẹn mẹ ukperẹ mi na nyamwu odjẹ mi ne kin ekete irhorhomu uvuẹn akpọ na. (Matthew 6:33) Ọke mẹmẹ ọrhẹ Laurie a vabu te akpa uvuẹn United States, ame ni brorhiẹn ame ine rhirhiẹ avwaye jeghwai tẹnrovi ogame i Jehova.

Vẹrhẹ bi ọke mia hẹroso omamẹ jeghwai kparoma, odjẹ mẹ i havwọ yanghan yanghan. Ọrẹn vwana, mi vwo esiri ẹghwanren rọ nọ kpọ mẹ vi ne. (Isaiah 48:17, 18) Mi vwo obọdẹn akpenyerẹn mi vwe vwo bi ne, nọyẹ ọrẹ mia ga Osolobrugwẹ jeghwai ha userhumu rẹn awọrọ yono kpahiẹn.

Mẹmẹ ọrhẹ Laurie i ruẹ orọnmo ame gbanhon omamọ ne, nime ame a ha iruemru-urhi Baibol ruiruo. Habaye, Osolobrugwẹ ọ ha ebrurhọ rẹn ame rhẹ ọmọ ọgbọtọ ro vwo erhumu, ro rhe i Jehova ji vwo ẹguọlọ kpahiẹn.

Akpenyerẹn ọ lọhọ rẹn ame ọke ame e kiẹn uvuẹn urhie-e. Ọrẹn nyoma userhumu i Jehova, ame i brorhiẹn rẹ ame ine je fiobọrhotọre uvuẹn ogame ọnẹyen jeghwai hẹrosuiẹ ọke ephian.—Proverbs 3:5, 6.