E vwiẹre mẹ uvuẹn Székesfehérvár, ro rhiẹ amwa rọ ha uvuẹn ẹkwotọre i Hungary, ọ vrẹn ẹgbukpe 1,000 ne ra fan amwa na. Ọrẹ omemwurhọ, mi ji karorhọ oborẹ uvweri akpọ ephian ọreva ọ ghwọghọ amwa na te.

Ọke mia kamu, ọsẹ ọrhẹ izu mẹ ọduado yi mọrenren mẹ ghwanren. Mia karorhọ aye ọke ephian, maido izu mẹ ọduado Elisabeth. Ọye yọ lẹrhere mẹ vwo esegburhomẹmro ọgbogbanhon kpahen Osolobrugwẹ. Avwọke mia ha ẹgbukpe esa, kowuọwọn kowuọwọn ni mie lelie vwanriẹn Ẹrhomo Ọrovwori na. Ọrẹn, ọke mia joma te ẹgbukpe 30 yi mie vwẹruọ oborẹ ẹrhomo na o mevirhọ.

Ọsẹ ọrhẹ izu mẹ ọduado a hẹrote me ọke mia kamu nime eri vwẹre me a wian gbanhan omamọ, nẹ aye i sabu koko igho aye ina dẹ omamọ oghwa. Kisatọde kisatọde ọreva uvuẹn ibiamo na, ọsoso ekrun na e kwomakugbe riẹ emaren. Ọke ame i ghwọghọ kugbe ọ lẹrhẹ oma merhen mẹ omamọ.

Uvuẹn ẹgbukpe 1958, eri vwiẹre mẹ ni sabu dẹ omamọ oghwa rẹ ame awansa ine rhirhiẹ. Oma ọ merhenren mẹ omamọ nime mie lele eri vwiẹre mẹ rhirhiẹ ne! Ọrẹn omamerhomẹ ọrana ọ tọ-ọ. Nime ọke ibiamo erhan a vrẹn, emiamo i cancer no kpe ọsẹ mẹ.

Ẹhẹn mẹ no seriotọre omamọ. Mi karorhọ ọke mia nẹrhomo: “Osolobrugwẹ, biko simi arhọ ọsẹ mẹ. Mi guọlọre no nyerẹn. Mesoriẹ wu vwa kpahenrhọ ẹrhomo mẹ?” Mi vi guọlọ rhe ekete ọsẹ mẹ ọ havwọ. Ni mie roro: ‘O riẹ odjuwu ne? Gbinẹ o vwo nyerẹn ghwomara-an?’ Ni mai rioma kpahen emọ erọrọ ri ji vwo esẹ.

Ọke ephian yi mie rie ekete re sin ọsẹ mẹ rhọ uvwre ẹgbukpe buebun. Ni mie sighwẹ totọre kẹrẹ usin ọsẹ mẹ ji nẹrhomo: “Biko Osolobrugwẹ, mi guọlọ rhe ekete ọsẹ mẹ ọ havwọ.” Mi ji nẹrhomo nọ ha userhumu mẹ vwẹruọ oborẹ akpenyerẹn o mevirhọ.

Ọke mia ha ẹgbukpe 13, ni mi brorhiẹn mi ne yono edjadjẹ i Germany. Ni mie roro taghene bọmọke mi ne ki se ọsoso ẹbe ri mai ghanren uvuẹn edjadjẹ i Germany hin, mi na mẹrẹn ẹkpahenrhọ rẹn enọ mẹ. Uvuẹn ẹgbukpe 1967, ni mi tuẹn uyono rhọ uvuẹn amwa re se Jena rọ ha usuẹn East Germany ọke ọrana. Ni mie se ẹbe sansan rẹ egba irherhe i Germany i yare, maido eri ta kpahen oborẹ ọsoriẹ a ma ituakpọ. Dedevwo mi mẹrẹn ẹkpahenrhọ ezẹko, ọrẹn o vwo ọrọ kpahenrhọ onọ mia guọlọ-ọ. Ni mia nẹrhomo ọke ephian ni mi sabu mẹrẹn ẹkpahenrhọ enọ na.

Uvuẹn ẹgbukpe 1970, ni mi ghwẹrioma riẹ Hungary, avwaye yi mia mẹrẹn ane mẹ Rose. Ọke ọrana, igọmẹti Hungary ye suẹn kemru kemru ri ha otọre omẹgbanhon aye. Ọke omẹmẹ ọrhẹ Rose a rọnmọ hin, o jiri-i, ame ni zẹ riẹ ẹkwotọre Australia. Ame i djiroro taghene ame i rhe nẹ avwaye, ame ina kwa riẹ Sydney rọ ha Australia ro rhiẹ ekete omizu izu mẹ o rhirhiẹ.

O jiri-i, ni mi mẹrẹn iruo uvuẹn Australia. Ẹdẹ owu, ohworho rẹ omẹmẹ rhẹ ọye a wian ekete owu, nọ ta mẹ taghene mi na sabu mẹrẹn ẹkpahenrhọ rẹn ọsoso enọ mẹ uvuẹn i Baibol na. Nọ yẹre mẹ ẹbe sansan ri ta kpahen i Baibol na. Ni mi se ọsoso ẹbe na, ji guọlọ yono riarorhọ. Omarana, ni mi ya ileta vwe Iseri Jehova ri ya ẹbe na, jeghwai nekpẹn ẹbe erọrọ.

Uvuẹn ẹdẹ orọnmo ame ọ gba ẹgbukpe owu, Oseri Jehova owu ro rhiẹ onyẹ Australia nọ kọn bru ame rhe. Nọ ha ẹbe mi nekpẹn ye na rhe, jeghwai ha uyono i Baibol mwu mẹ ogege. Ra mẹriẹn taghene mi vwo omwemẹ mi ne yono na, ame ne yono ọgbeva ọkprughwre owuowu, uyono owuowu o jirẹ te inọke ẹne!

Oma ọ merhenren mẹ kpahen oborẹ Iseri Jehova na i yonirin mẹ ni Baibol na rhe. Ọke aye e dje odẹ i Osolobrugwẹ mẹ ro rhiẹ i Jehova uvuẹn i Baibol mẹ ra ha edjadjẹ i Hungary ya, no gberi mẹ unu omamọ. Uvwre ẹgbukpe 27 mie riẹ ishọshi, a ji hunute odẹ Osolobrugwẹ dẹ-ẹ. Oborẹ i Baibol na ọ kpahenrhọ enọ mẹ lele izede rọ gbare ro ji fiotọre, o gberi mẹ unu omamọ. Jerẹ udje, mi yonorin taghene eri hwu ne e rhe emru owuorowu-u, jerẹ ọke ohworho ọ merhẹn omerhẹn okokodo. (Ecclesiastes 9:5, 10; John 11:11-15) Mi ji yono kpahen ive i Baibol na kpahen akpọ ọkpokpọ rẹ ‘uhwu ono jo rhirhiẹ.’ (Revelation 21:3, 4) Mi guọlọ rharhumu mẹrẹn ọsẹ mẹ, fọkime uvuẹn akpọ ọkpokpọ na, “ono vwo ẹrhọmọnuhwu.”—Acts 24:15.

Rose nọ homaba mẹ uvuẹn uyono i Baibol na. Ame ni ru riaro omamọ, jeghwai yono ẹbe uyono ame hin ibiamo eva ọvo! Ame e riẹ iyono ephian rẹ Iseri Jehova e ruẹ uvuẹn Aghwẹlẹ Uvie. Oma ọ merhenren ame kpahen ẹguọlọ ọrhẹ userhumu rẹ Iseri Jehova e djephia, kugbe okugbe rọ ha uvwre aye.—John 13:34, 35.

Uvuẹn ẹgbukpe 1976, mẹmẹ ọrhẹ Rose ni kwa riẹ Australia. Ame ni guọlọ Iseri Jehova mẹrẹn ogege. Iseri Jehova na i lẹrhẹ ẹhẹn ame totọre. Uvuẹn ẹgbukpe 1978, ame ni rhiẹ Iseri Jehova.

Mi ma mẹrẹn ẹkpahenrhọ rẹn enọ re kpokpi mẹ ẹhẹn ọke jijiri ne. Nyoma mie tikẹrẹ i Jehova Osolobrugwẹ rhọ, Jehova no mo rhiẹ obọdẹn Ọsẹ ha mẹ. (James 4:8) Habaye, mie fiẹrorhọ ọke mi na rharhumu mẹrẹn ọsẹ mẹ uvuẹn akpọ ọkpokpọ rọ sa na.—John 5:28, 29.

Uvuẹn ẹgbukpe 1989, mẹmẹ ọrhẹ Rose ni rharhumu riẹ Hungary, nẹ ame i sabu ghwoghwo iyẹnrẹn esiri na rẹn igbehian ọrhẹ ihworho ekrun ame, kugbe awọrọ ame i mẹrẹnren. Ame i ha i Baibol na yono ihworho buebun ne. Ihworho ri vrẹn 70 i sabu kwomakugbe ame ga i Jehova, izu mẹ ọ ha usuẹn aye.

Mi nẹrhomo te ẹgbukpe 17 ni mi sabu mẹrẹn ẹkpahenrhọ enọ mẹ. Dedevwo ẹgbukpe 39 ọ vrẹn ne, ọrẹn mia ji nẹrhomo, ọrẹn vwana ni mia sabu ta: “Wẹwẹ nobiruo Ọsẹ mẹ rọ ha obẹ odjuwu, wa kpahenrhọ enọ mi vwori ọke mia kamu.”