Mi ghwanranren uvuẹn Los Angeles, California, U.S.A., ro vwo idumu sansan ri vuọnren rhẹ ilogbozighi ra ha imwu egbogbanhon. Eri vwiẹre mẹ i vwo emọ erhan, mẹmẹ yi ha kpahen ọkpako.

Ame i lele izu ame riẹ ishọshi nẹ ọke emọvwerhe ame. Ọrẹn, ọke mia ha uphuphẹn mie nyerẹn aruẹ akpọ eva. Mi ha usuẹn ihworho ra so ijoro uvuẹn ishọshi ame i Sọnde. Ọrẹn ọke ri hẹrhẹre uvuẹn ọkprughwre na, ni mie riẹ ipati, ha imwu egbogbanhon, ji gbọfanrhiẹn.

Mia kiki tuekwẹre omamọ, omaran ọ ji gbanhan. Kemru kemru mi mẹrẹnren yi mia ha wọnrọn. Oborẹ mi yonorin uvuẹn ishọshi ọ ha userhumu mẹ-ẹ. O vwo ẹmro owu mia ta, “Ọrovwori na yo ruẹkele, ọrẹn mẹmẹ yọ ha wọnrọn!” Ọke mia ha i Secondary School uvwre ẹgbukpe 1960, ni mi homaba ẹko usun oseghe owu re se Black Panthers, e rheri aye rhẹ ihworho ra wọnrọn fọkiẹ ugbomọphẹ ere sehiẹn. Ni mi homaba ẹko emọ isukuru ra wọnrọn fọkiẹ ugbomọphẹ. Ọgbọ buebun ame e ludje, isukuru na kanran uvwrọke ezẹko.

Nọ họhọre taghene udje ame e le na, ọ vwọ sabu fuẹn ekwẹre mẹ-ẹ. Omarana, ni mie vwobọrhọ ozighi egbe. Jerẹ udje uvwrọke owu, mẹmẹ ọrhẹ igbehian mẹ ni riẹ ekete re nughe, ne kporo ividio owu ro dje oborẹ itu i United States i ha oja riẹ itu Africa vrẹn ne. Osehiẹn na o biomurun ame evwan omamọ, ame ne lele iphuphẹn itu iyibo ri ha ekete ame e nughe na wọnrọn. Ọke oru, ame ni riẹ idumu itu iyibo e rhirhiẹ ya guọlọ ihworho ame ine kpe omamọ ekpe.

Ọke mia joma te ẹgbukpe uze ne, mẹmẹ ọrhẹ imizu a dabu gbozighi omamọ. Ame rhẹ elọkpa e vwo ẹmro omamọ. Omizu mẹ ọkokamu owu ọ ha uvuẹn ẹko ilogbozighi ro mwuofẹn, ni mi homaba aye. Akpenyerẹn mẹ no biomẹrhọ biomẹrhọ.

O vwo ugbehian mẹ owu, eri vwiẹriẹ Iseri Jehova. Nẹ aye i ha use mẹ rhiẹ uyono ukoko aye, ni kwerhọ use na. O fiotọre mẹ ogege, nime Iseri Jehova i vẹnẹren omamọ. Aye ephian i vwo i Baibol, aye a ji haye ruiruo uvuẹn uyono na. Iphuphẹn a ji ha ẹmro phia uvuẹn uyono dede! Oma ọmerhenren mẹ ọke mie rhe taghene Osolobrugwẹ o vwo odẹ ro rhiẹ i Jehova, ọ ji guọlọ na haye ruiruo. (Psalm 83:18) Ukoko na ọ vuọnren rhẹ ihworho ri nẹ ekete sansan rhe, ọrẹn ovẹnẹ ọ ha uvwre aye fọkiẹ ekete aye i nurhe-e.

 Ọke ukaro, mia guọlọ yono i Baibol na rhẹ Iseri Jehova-a, ọrẹn mi guọlọ rhe riẹ uyono aye. Ason owu ọke mia ha uyono Iseri Jehova, igbehian mẹ ezẹko ni riẹ akpẹriọ. Aye ni kpe uphuphẹn owu hwu fọkime ọ guọlọ yẹ aye ewuie-en. Ẹdẹ ọreva ye, aye na vwoma taghene aye i kpe ohworho hwu. Aye na ha ukẹro kpekpa ni oborẹ aye i ruru na, ọke a kpare aye riẹ oghwa ẹghware. Ne fi ezẹko usuẹn aye rhẹ ekanron bẹmẹdẹ. Oma ọmerhenren mẹ omamọ taghene mie lele aye ason ọrana-a. Ni mi brorhiẹn mi ne wene akpenyerẹn mẹ ji tuẹn uyono i Baibol rhọ.

Dedevwo mie rhiẹromẹrẹn osehiẹn rọ ha uvwre ihworho ibiebi ọrhẹ iyibo, ọrẹn oborẹ mi mẹrẹnren uvwre Iseri Jehova o gberi mẹ unu. Jerẹ udje, ọke Oseri Jehova owu ro rhiẹ oyibo ọ guọlọ nẹ oghwa, nọ nyajẹ emọyen vwo rẹn ekrun ihworho ibiebi nẹ aye i hẹrote emọyen. Habaye, ekrun oyibo owu o ji fiẹ uphuphẹn owu ro rhiẹ ohworho obiebi rhẹ oghwa aye. No mo mwu mẹ ẹro taghene Iseri Jehova yẹ ẹmro i Jesu rọ ha John 13:35 ọ rionbọrhọ: “Nyoma ọnana, ihworho ephian ine rhe taghene are idibo mẹ—are i rhe vwo ẹguọlọ kpahen omomare.” Mi mẹrẹn obọdẹn ekrun imizu ne.

Ọke mie yono i Baibol na, ni mi ma mẹrẹnvwrurhe taghene o fori mi wene iroro mẹ. Mi wene ẹhẹn mẹ neneyo mi sabu rhiẹ ohworho ufuoma, jeghwai mẹriẹnvwrurhe taghene ọrana o fo oborẹ mi ne ruo. (Romans 12:2) Bibiesuọn bibiesuọn, ni mi ru riaro. Uvuẹn January 1974, ni mi bromarhame rhiẹ Oseri Jehova.

Ọrẹn, dedevwo mi bromarhame ne, mia ji wian rhẹ ekwẹre mẹ. Jerẹ udje, ọke owu rẹ ame a ha aghwoghwo ọrẹ nẹ oghwa riẹ oghwa, ni mie le ohi owu ro so ekpetagbero rọ ha uvuẹn imoto mẹ. Ọke mia joma mwuie ne, no donron ekpetagbero na rhotọre, nọ zẹ nyarhẹn. Ọke mia ta rẹn awọrọ kpahen oborẹ mi ru ha ekpetagbero ghwẹrioma, ọkpako owu uvuẹn ẹko na nọ nọren mẹ, “Stephen, me wu ne ru orhianẹ wu mwu ohi na bi?” Onọ ọrana ọ lẹrhere mẹ roro jeghwai yẹ omwemẹ mi na damoma rhiẹ ohworho ufuoma ọke ephian.

Uvuẹn October 1974, ni mi tuẹn owian ọkobaro ọke ephian rhọ, mia ghwọghọ inọke 100 yono awọrọ i Baibol na kibiamo kibiamo. Ọke oru, ni mi ji vwo uphẹn mia homakpahontọre wian uvuẹn esiri ukoko ọrẹ Iseri Jehova uvuẹn Brooklyn, New York. Uvuẹn ẹgbukpe 1978, ni mi ghwẹrioma riẹ Los Angeles ya hẹrote izu mẹ ro kpomẹ. Ẹgbukpe eva a vrẹn, ni mi rọnmọ ane mẹ ọghoghanren Aarhonda. Ọ ghini hobọtua mẹ omamọ uvwrọke mia hẹrote izu mẹ bọmọke izu mẹ o ki hwu. Ọke oru, mẹmẹ ọrhẹ Aarhonda ni riẹ Watchtower Bible School of Gilead, ne djerẹ ame riẹ Panama ya ga ẹrhẹ imishọnari.

Avwọke mie bromarhame rhe, mi mẹrẹn erhirhiẹ buebun ri na lẹrhe me tuekwẹre ọgbogbanhon. Ọrẹn, ọkezẹko mia nya nẹ obaro ihworho ra lẹrhe mẹ tuekwẹre, yanghene mie ruẹ erhirhiẹ na nọ fọ. Ihworho buebun tobọ te ane mẹ dede, e jiri mẹ fọkiẹ oborẹ mi kwaphiẹ erhirhiẹ enana lele. Ọ tobọ gbe mẹ unu dede! Mi vwe jiri omamẹ fọkiẹ iruemru mẹ ri weneri-in. Ukpomaran, mi rheri taghene omẹgbanhon i Baibol na yọ suẹ ewene enana.—Hebrews 4:12.

Baibol na ọ lẹrhere mẹ vwo obọdẹn akpenyerẹn ne, ji rhiẹ ohworho ufuoma. Mi vwe rhe kpe ihworho ghwomara-an; ukpomaran ni mia sa aye erhumu tikẹrẹ i Jehova. Mi tobọ ha i Baibol na yono ọvwreghrẹn mẹ owu uvuẹn isukuru i yẹdẹ! Ọke ro bromarhame hin, ame awanva ni rhirhiẹ oghwa uvwrọke owu. Me te inyenana, ugbehian ame ọ ji kpẹnkpẹn. Nyoma uyono i Baibol na, mẹmẹ ọrhẹ ane mẹ i ha userhumu rẹn awan 80 rhiẹ Iseri Jehova ne.

Mi kpẹmẹ i Jehova omamọ rọ yẹ mẹ obọdẹn akpenyerẹn ọrhẹ omamerhomẹ uvwre obọdẹn imizu.