E vwiẹre mẹ uvuẹn Acul, ro rhiẹ amwa rọ ha ekete kologho ji vwo igbenu uvuẹn obọrẹ ọren o se gbe uvuẹn Guatemala. Eri vwiẹre mẹ itu i Maya ra djẹ edjadjẹ Ixil. Haba edjadjẹ i Spain mia djẹ, mia ji djẹ edjadjẹ amwa ame. Mi nyerẹnren uvwre ọke uvweri ọgbogbanhon ọrẹ i Guatemala uvwre ẹgbukpe 36 ri vrẹnren. Uvwre ọke ọnana itu Ixil buebun i hwuru omamọ.

Ọke mia ha ẹgbukpe ẹne, omizu mẹ ọhworhare rọ ha ẹgbukpe irhiruẹ nọ ha igrinedi ruiruẹn, ọke oru igrinedi na nọ sare. Ikẹro mẹ ni turu fọkiẹ oborẹ ọ phiare na; ọrẹ omemwurhọ omizu mẹ o ji hwu. Ọke oru, ne firi mẹ rhẹ isukuru ituẹro uvuẹn amwa i Guatemala, avwaye mie yono i Braille. Mie rhe oborẹ mi ruru uvuẹn isukuru na-a, oyono na nọ ta mẹ taghene mi vwe lele emọ erọrọ tẹmro-o, nọ ji ta rẹn emọ na nẹ aye i kẹnoma ha mẹ. Mẹmẹ ọvo nọ yi havwiẹ kologho uvuẹn isukuru na, ni mie roro kpahen ọke mi na ya ghwọghọ ibiamo eva ra yẹ ame uvuẹn isukuru na rhẹ izu mẹ, nime izu mẹ ohworho esiri ọrhẹ aruẹdọn. Ọrẹ omemwurhọ, izu mẹ no hwuru ọke mia ha ẹgbukpe ikpe. Ẹhẹn mẹ no seriotọre omamọ, nime ohworho owu ọvo mi vwo ẹguọlọ kpahen uvuẹn akpọ na o hwu ji mẹ vwo.

Ọke mi ha ẹgbukpe 11, ni mi ghwẹrioma riẹ amwa mẹ, ni mie lele ọmọ ọsẹ mẹ ọkpako ọrhẹ ekrun ọnẹyen rhirhiẹ. Aye a dabu hẹrote mẹ ọrẹ ugboma, ọrẹn o vwo ọrọ sabu ha userhumu mẹ ẹhẹn mẹ orho seriotọre-e. Ẹdẹ ezẹko, mia viẹ bru Osolobrugwẹ: “Mesoriẹ izu mẹ o hwu? Mesoriẹ mie tuẹro?” Ihworho a ta mẹ taghene ekwakwa enana ri phia mẹ na ọhọre Osolobrugwẹ. Ni mi ghwai brorhiẹn taghene Osolobrugwẹ ọ vwiare omamọ, o ji vwo ọdamẹ-ẹ. Mi damoma mi ne kpe oma mẹ, ọrẹn uphẹn yen o rhiefirhọ-ọ.

Nime mi tuẹro mi vwa rha sabu hẹrote omamẹ ọrẹ ugboma ọrhẹ iroro-o. Ọke mia kamu, ihworho i gberi mẹ aghwa ọgbọ buebun. Ọrẹn, mia ta rẹn ohworho owuorowu kpahiẹ-ẹn, nime mie roro taghene o vwo ọrọ damerhọ-ọ. Ọ bẹn ihworho e leli mẹ tẹmro, mi vwe ji lele ohworho owuorowu tẹmro-o. Ni mi ha erhirhiẹ kologho, ẹhẹn mẹ no seriotọre, mia ji hẹroso ohworho owuorowu-u.

Ọke mia ha ẹgbukpe 13, esa ọrhẹ ane owu ri rhiẹ Iseri Jehova ni bruru mẹ rhe ọke omeronmo ame obẹ isukuru. Oyono ame owu ro vwo ọdamẹ kpahen erhirhiẹ mi havwọ, yọ ta rẹn aye nẹ aye i bru mẹ rhe. Iseri Jehova na ni ta mẹ kpahen ive i Baibol na taghene ana rhọmọ ihworho ri hwuru, habaye ẹdẹ owu eri tuẹro ina mẹrẹn ude. (Isaiah 35:5; John 5:28, 29) Oborẹ aye i yonirin mẹ na o jeri mẹ, ọrẹn ọ bẹn ha mẹ mi ne lele aye tẹmro, nime mi vwa ghwai lele usuẹn ẹmro ẹta gbọriọ-ọ. Ọrẹn, dedevwo mie tiomaha, aye i ji dje erhionrin ọrhẹ uruemru esiri phia, nyoma aye a kọn bru mẹ rhe nẹ aye i sabu yoni mẹ i Baibol na. Esa ọrhẹ ane ọnana a nya ugbo onya rọ vrẹn iroko erhan (10 km), ji rhenren igbenu aye e ki te amwa mẹ.

Ọke ọmọ ọsẹ mẹ o dje isẹ aye mẹ, nọ ta mẹ taghene ihworho na i sẹ osẹme rọ fonron, ọrẹn aye a ghwai vwo ekwakwa ugboma bu-un. Udabọ ọrana, aye e dje ọdamẹ ha mẹ ọke ephian, nyoma aye a ha ibiẹ ẹghẹlẹ vwe mẹ. Ni mie roro taghene Ilele Kristi urhomẹmro ọvo yi na sabu dje ẹhẹn omẹhaze ọrana phia.

Ni mi yono kpahen i Baibol na nyoma userhumu ẹbe re fomu rhẹ Braille. Dedevwo mie vwẹruọ oborẹ mie yono, ọrẹn uvuẹn ẹhẹn mẹ o vwo ekwakwa ezẹko ra bẹn ha mẹ mi ne kwerhọ. Jerẹ udje, ọ bẹn mi ne kwerhọ ye taghene Osolobrugwẹ ọrhẹ awọrọ i ghini vwo ọdamẹ kpahen mẹ. Mi vwẹruọ oborẹ ọsoriẹ i Jehova ọ ha uphẹn rẹn irueruo ọkon ibiọke, ọrẹn ọ bẹn ha mẹ ọkezẹko mi na ha i Jehova jerẹ Ọsẹ ro vwo ẹguọlọ. *

Bibiesuọn bibiesuọn, oborẹ mie yono uvuẹn i Baibol na nọ ha userhumu mẹ wene iroro mẹ. Jerẹ udje, mi yonorin taghene Osolobrugwẹ o vwo ọdamẹ okokodo kpahen ihworho ra rioja. Harẹn ihworho ra ga ye ra ha oja ria, Osolobrugwẹ ọrhọ ta: “Mi ghini mẹrẹn ojẹriọ ihworho mẹ . . . mi dabu rhe erhirhiẹ omiamiamo aye a dẹrughwaroghwẹ.” (Exodus 3:7) Ọke mie me vwo ẹguọlọ kpahen iruemru eghoghanren i Jehova ne, ọrana no mwurun mẹ ha arhọ mẹ kpahontọre riẹn. Uvuẹn ẹgbukpe 1998, ni mi bromarhame rhiẹ owuọwan usuẹn Iseri Jehova.

Ọke mie bromarhame hin emrẹ ẹgbukpe owu ọ vrẹn, ni mi riẹ isukuru ituẹro owu rọ kẹrẹ amwa Escuintla. Ọkpako ukoko owu no rhon kpahen ebẹnbẹn mia dẹrughwaroghwẹ ọke mie nẹ amwa sa ne mi sabu rhiẹ uyono ukoko. Ukoko rọ mai kẹrẹ ọ ha ekete igbenu i havwọ rẹ Iseri Jehova erana e rhenren bru mẹ sa me yono, omarana nọ bẹn mia sabu riẹ uyono. Na sabu ha userhumu mẹ, ọkpako na nọ guọlọ ekrun Iseri Jehova owu uvuẹn Escuintla, ri vwo omwemẹ aye ine fi mẹ rhẹ oghwa aye ji ha userhumu mẹ sabu riẹ uyono ukoko. Me te inyenana, aye a ji hẹrote me kamẹriẹn aye yi vwiẹre mẹ.

Mi na sabu ta kpahen idje obọdẹn ẹguọlọ buebun rẹ imizu ukoko na i dje ha mẹ. Ọsoso oborẹ mi rhiẹromẹrẹn na ọ lẹrhere mẹ vwo imwẹro taghene ri me rhiẹ owuọwan usuẹn Iseri Jehova na, mi ha usuẹn Ilele Kristi urhomẹmro na.—John 13:34, 35.

Mi vwe ni oma mẹ taghene mie fiemru yanghene vwo ifiẹrorhọ ghwomara-an. Vwana, akpenyerẹn mẹ ọ vuọnren rhẹ erere ne. Ri me rhiẹ oghwoghwẹmro ọke ephian ọrẹ Iseri Jehova na, ni mia tẹnroviẹ oborẹ mi ne ru yono ihworho kpahen irhomẹmro eghoghanren uvuẹn i Baibol na, ukperẹ mi na tẹnrovi erhirhiẹ mi havwọ. Habaye, mi vwo uphẹn mia ga ẹrhẹ ọkpako ukoko ji ha ẹmro otu i Baibol phia uvuẹn ukoko na. Mi tobọ vwo uphẹn mia ha ẹmro phia uvuẹn omẹvwa ọduado rẹ uriusionrin ihworho i havwọ.

Uvuẹn ẹgbukpe 2010, ni mi ruotọre nẹ Ministerial Training School (re se Isukuru Ighwoghwẹmro Uvie na vwana) re ruru uvuẹn El Salvador. Isukuru ọnana ọ dabu yoni mẹ ne mi sabu wian ewian mẹ uvuẹn ukoko na rhomurhọ. Iyono ra yẹre mẹ uvuẹn isukuru na ọ lẹrhere mẹ rhe taghene Jehova Osolobrugwẹ o nirin mẹ ghanghanren jeghwai vwo ẹguọlọ kpahen mẹ, ọye ọvo yọ nọ sabu lẹrhẹ ohworho mwuovwan fọkiẹ owian yen.

Jesu nọ tare: “Omamerhomẹ ọ havwiẹ harẹn ọro tiobọnẹ ghwẹ ọra yẹre.” (Acts 20:35) Vwana mi na sabu ta taghene oma ọ merhen mẹ ne, dedevwo ọke bi mie rorie taghene ọ sabu phia-a, vwana mi vwo ẹhẹn mi na ha userhumu rẹn awọrọ ne.