Mi ghwanranren uvuẹn amwa re se Puerto Limón, rọ ha ekete owu ame o kinhariẹ uvuẹn Costa Rica. Eri vwiẹre mẹ i vwiẹ emọ ẹrẹnren, mẹmẹ yẹ ọrẹ irhiruẹ. Ọsẹ mẹ o hwuru ọke mia ha ẹgbukpe ẹrẹnren. Omarana, izu mẹ ọvo yọ mọrenrẹn ame ghwanren.

Mi vwo ẹguọlọ kpahen baseball ẹfa omamọ. Avwọke mia kamu yi mie vwo ẹguọlọ kpahiẹn. Ọke mia joma te ẹgbukpe uze, ni mi homaba ẹko owu re yono oborẹ a fa i baseball. Ọke mia vrẹn ẹgbukpe 20 ne, na ta mẹ mi lele eri tẹn ona iruẹn na omamọ fa ye uvuẹn Nicaragua. Ọrẹn, nime mẹmẹ ya hẹrote izu mẹ ro kpomẹ ọke ọrana, mia rha guọlọ riẹ Nicaragua-a. Omarana, ni mi tiẹn use na. Ọke oru, na rharhumu ha use mẹ ni mi homaba era fa i baseball rẹn ẹkwotọre i Costa Rica, ibiẹ ihworho ọvo ya sanọren. Ọke ọnana, ni mi kwerhọ use na. Mi lelirẹ aye fa nẹ ẹgbukpe 1949 te ẹgbukpe 1952, mi fa ibọru na uvuẹn ekete sansan jerẹ Cuba, Mexico, ọrhẹ Nicaragua. Mi ha usuẹn ere mwu ibọru, mia dabu rheyi mwuẹ, ọke owu, mi tobọ fa ye ọgbọ 17 sansan mie ruẹ orusọ owuorowu-u. Otu na erhe kperi odẹ mẹ, oma nọ merhen mẹ!

Ọrẹ omemwurhọ, mie ji nyerẹn akpọ ọfanrhiẹn. Dedevwo mi vwo igẹfrẹndi owu, ọrẹn mia ji kpare emẹse erọrọ. Mia ji da inyo vrẹn oma. Ẹdẹ owu mia da enyo vrẹn oma, ọke mia rhọmọ urhiọke ẹdẹ ọreva ye, mia tobọ karorhọ oborẹ mi ru te oghwa dede-e! Mie ji fiẹ ibikoro omamọ.

Ọke mie nyerẹn aruẹ akpọ ọrana, izu mẹ no mo rhiẹ owuọwan usuẹn Iseri Jehova. Ọ damoma ro no ghwoghwo mẹ, ọrẹn o fikparobọ ọke ọrukaro-o, fọkime mi fiẹ omamẹ rhẹ iruẹn na omamọ. Mi rha tobọ ha ekete ame e yono, orhọmo o vwo kpe mẹ dede-e! Iruẹn na ọvo yi mie roro kpahan. Mi vwo ẹguọlọ kpahen baseball ẹfa ghwẹ ekwakwa erọrọ!

Ọrẹn, ọke mie te ẹgbukpe 29, ni mi konron gbangbanhon ọke mia guọlọ mwu ibọru owu. Ọke omamẹ ọ sasa, ni mi dobọ iruẹn na ji. Ọrẹn, mie ji yono ihworho ezẹko oborẹ a fa i baseball uvuẹn ekete owu rọ kẹrẹ oghwa me.

Uvuẹn ẹgbukpe 1957, Oseri Jehova owu nọ ha use mẹ ne mi rhiẹ omẹvwa ọduado owu uvuẹn ekete mia fa i baseball, ni mi rhiabọ dede use na. Ọke mia ha uvwre Iseri Jehova na, ni mi mẹrẹn ovẹnẹ rọ ha uvwre aye ọrhẹ ihworho re nughe ame ọke ame a fa i baseball na. Oborẹ mi mẹrẹnren uvuẹn omẹvwa na, no mwurun mẹ tuẹn uyono i Baibol rhọ rhẹ Iseri Jehova, jeghwai tuẹn uyono ẹnya rhọ.

Oma ọ merhenren mẹ kpahen iyono i Baibol sansan mi yonorin. Jerẹ udje, Jesu ọ tare taghene uvuẹn ẹdẹ oba na, idibo yi ine ghwoghwo iyẹnrẹn esiri Uvie Osolobrugwẹ lele ọsoso akpọ na. (Matthew 24:14) Mi ji yono taghene Ilele Kristi urhomẹmro na i vwe ghwoghwo rẹn ihworho na kwosa rẹn aye-e. Jesu nọ tare: “A yẹrẹ are ọrẹ ọphẹ, are i tiobọnu ọrẹ ọphẹ.”—Matthew 10:8.

Ọke mie yono i Baibol na, ni mia ha oborẹ ọ tare vwanvwọn oborẹ mia mẹrẹn uvwre Iseri Jehova. Oma ọ merhen mẹ kpahen omẹdamu aye djephia, nẹ aye i sabu ghwoghwo iyẹnrẹn esiri Uvie Osolobrugwẹ lele ọsoso akpọ na. Mi ghini mẹrẹnvwrurhe taghene aye i vwo ẹhẹn aye ine tiobọnu jerẹ oborẹ i Jesu o jurhie rẹn idibo yi. Omarana, ọke mie se Mark 10:21 ji mẹrẹn use i Jesu rọ tare “nyaleli mẹ,” ni mi vwo ẹhẹn mi ne rhiẹ Oseri Jehova.

Ọrẹn, ọ ha ibiọke mi ki fiomarhọ ye vuọnvuọn. Jerẹ udje, uvwre ẹgbukpe buebun rhe ne, mie fiẹ ibikoro kọkprughwre kọkprughwre nime mi vwo imwẹro kpahen “atarhe.” Ọrẹn, ni mi yonorin uvuẹn i Baibol na taghene Osolobrugwẹ o vwo utuoma kpahen ihworho ra ha ẹga rẹn “osolobrugwẹ Atarhe,” ọrhẹ ihworho ri vwo ufiuvwele. (Isaiah 65:11; Colossians 3:5) Omarana, ni mi dobọ ibikoro ji. Uvuẹn Sọnde ọrukaro mia dobọ ibikoro ji, inọba mia ha fiẹ ibikoro avwodẹrhe no fikparobọ! Ihworho na ha mẹ djechẹẹ nime mia fa ibikoro ọkprughwre ọrana-a, aye ni ta mẹ taghene mi rharhumu ya fa ye, ọrẹn mia nya-a. Mie rhe fiẹ ibikoro ghwomara-an.

Uvuẹn ẹdẹ mie bromarhame uvuẹn omẹvwa Iseri Jehova, ni mi rhiẹromẹrẹn ọdamuni ọrọrọ fọkiẹ “uruemru ọkpokpọ” mi vwori. (Ephesians 4:24) Owuọwọn ẹdẹ ọrana, ọke mie te hotel mie rhirhiẹ, ni mi mẹrẹn igẹfrẹndi mẹ bi rọ hẹrhi mẹ uvuẹn anurẹsẹ. Nọ ta mẹ, “Biko mọ Sammy. Jenẹ a riakpọ!” Ọrẹn, ni mi tenren ogege! Ni mi karorhọ ye taghene mia nyalele iruemru-urhi Baibol vwana ne. (1 Corinthians 6:18) No kperi phia, “Me wa haye ta?” Nọ damoma rọ nọ rharhumu rhiẹ igẹfrẹndi mẹ, ji lẹrhi mẹ roro taghene irueruo ọfanrhiẹn ọ sọ-ọ. Ọrẹn, ni mi ruẹ obuvun mẹ, jeghwai kanren ighwe ze oma. Vwana, oma ọ merhenren mẹ taghene avwọke mie rhiẹ Oseri Jehova uvuẹn ẹgbukpe 1958, mi fuevwan nyamwu ewene mi ruru uvuẹn akpenyerẹn mẹ ne.

Mi rha ta taghene mi na ya erere mi mẹrẹn ne nime mi nyalele ọkpọvi Baibol, mi na ya ọbe vuọn! Ezẹko usuẹn erere na yẹ obọdẹn igbehian mi vwori, obọdẹn akpenyerẹn ọrhẹ obọdẹn omamerhomẹ.

Mi ji vwo ẹguọlọ kpahen baseball ẹfa, ọrẹn mi vwa rha fa ye jerẹ ọke bi-i. Mi mẹrẹn igho ọrhẹ otitimẹ uvuẹn iruẹn i baseball na, ọrẹn aye a tọ-ọ. Ọrẹn, onyerẹnkugbe mẹ rhẹ Osolobrugwẹ kugbe imizu ukoko na ọnọ tọ bẹmẹdẹ. Baibol na ọ tare: “Akpọ na ọ nyavrẹn ọrhẹ ojemẹ ọnẹyen, ọrẹn, ohworho ro ruẹ ọhọre Osolobrugwẹ, yo no rhirhiẹ ye bẹmẹdẹ.” (1 John 2:17) Vwana, mi vwo ẹguọlọ kpahen i Jehova ọrhẹ ihworho yi ghwẹ ekwakwa erọrọ ne!