RHA DẸRẸ!
2022: Ẹgbukpe rọ Vuọnren Rhẹ Otighri Ọrhẹ Ọfiamu—Me yi Baibol na ọ Tare?
Uvwre ẹgbukpe 2022, iyẹnrẹn kpahen uvweri, akpọ ọgbogbanhon ọrhẹ oghwọghọ kpregede yọ vuọn ekete ephian. Baibol na ọvo yọ sabu dje oborẹ ọsoriẹ ekwakwa enana a phia.
Oborẹ ekwakwa ri phiare uvuẹn 2022 i ghini djephia
Ekwakwa ri phiare ẹgbukpe ro rieri na, i haba oborẹ o djephia taghene ọwan e nyerẹn uvuẹn ọke ri Baibol na o seri “ẹdẹ ri koba na.” (2 Timothy 3:1) Ọke ọrana ọ tonrhọ ẹgbukpe 1914. Djokarhọ oborẹ ekwakwa ri phiare ro vwo jijiri na, i ru serhọ rhẹ oborẹ i Baibol na ọ ta kpahen ọke ọwan na:
“Ivweri.”—Matthew 24:6.
Se urhomu-ẹmro na, “Russia i Kparẹ Owọnren Riẹ Ukraine.”
“Emaren ẹkanren.”—Matthew 24:7.
Se urhomu-ẹmro na, “Uvweri re Fiẹ Obẹ i Ukraine ọ Lẹrhẹ Emaren Ẹkanren Gbanhonrhọ Uvuẹn Akpọ na.”
“Emiamo.”—Luke 21:11.
Se urhomu-ẹmro na, “Ihworho ri te Iduduru 6 yẹ Emaimo i COVID o Kpe ne.”
“Ekwakwa re mwuofẹn.”—Luke 21:11.
Ihworho ina karorhọ ọke uvo ọrẹ 2022, nime ọke ọrana yẹ ekwakwa enana a mai phia, rọ suẹ oghwọghọ, kpe ihworho buebun hwu, ji le iduduru ihworho nẹ oghwa aye uvuẹn akpọ na ephian.” d
Se urhomu-ẹmro na, “Aruọke na ọ Djẹrẹ Rhọ ne Uvuẹn Akpọ na Ephian.”
“Iyẹnrẹn ra suẹ uduebro [yanghene, “ọyanghan; ozighi,” ekete ra djokarhọ].”—Luke 21:9.
Se urhomu-ẹmro na, “Ekwakwa ra Ghanran Uvuẹn Akpọ na Ephian.”
Me ye fiẹrorhọ ẹgbukpe rọ sa na?
Uvuẹn ẹgbukpe 2023, o vwo ọrọ nọ sabu rhe ekwakwa ri na phia-a. Ọrẹn e rheri taghene phẹrẹkpẹ, Uvie Osolobrugwẹ, yanghene isuensuon ọnẹyen rọ ha obẹ odjuwu, ono ruẹ ewene ọduado rhẹ otọrakpọ na. (Daniel 2:44) Isuensuon ọrana ono tiẹ ekwakwa ra suẹ ojẹriọ ituakpọ nie, ji ruiẹ ne rhe ruẹ ọhọre Osolobrugwẹ uvuẹn otọrakpọ na.—Matthew 6:9, 10.
Ame i ha urhebro wẹn ne wu nyalele urhebro i Jesu ji “rha dẹrẹ,” ne wu sabu djokarhọ oborẹ irueruo akpọ na o ru ha aruẹmẹrẹn i Baibol te orugba. (Mark 13:37) Biko dje urhomu vwe ame, orhianẹ wu guọlọ yono rhọ kpahen oborẹ i Baibol na ono ru ha userhumu wẹn vwana, ọrhẹ oborẹ ono ru yẹ owẹwẹ ọrhẹ ekrun ọnọ obọdẹn ifiẹrorhọ kpahen obaro na.
a Iyẹnrẹn ọrẹ AP, “Uvwrọke Ezẹko Rhe na, Europe o Vwo Ibiẹ Omefuon nẹ Uvweri, Ọrẹn nọ Rharhumu Tonrhọ Ẹgbukpe 2022,” Jill Lawless yọ tariẹ, December 8, 2022.
b World Food Programme, “Emaren ọ Kanranren Uvuẹn Akpọ na Ephian.”
c JAMA Health Forum, “Ọwan e Nyerẹn Uvuẹn Ọke Emiamo o Bun Omamọ—COVID-19 ọ Rhere, Monkeypox no Rho Lelie, Omaran ji te Polio, Ọrhẹ Emiamo Erọrọ,” Lawrence O. Gostin, JD yọ tariẹ, September 22, 2022.
d Earth.Org, “Me yọ Lẹrhẹ Aruọke na Djẹrẹ Omamọ Uvuẹn Ọke Uvo Ọrẹ 2022?” Martina Igini yọ tariẹ, October 24, 2022.
e Carnegie Endowment for International Peace, “Ihworho ri nẹ Ẹkwotọre Sansan Rhe a Tuekwẹre Fọkiẹ Oborẹ Akpọ Na ọ Gbanhon te, Maido Uvuẹn Ẹgbukpe 2022,” Thomas Carothers ọrhẹ Benjamin Feldman yi tariẹ, December 8, 2022.
You May Also Like
ESSENTIAL BIBLE TEACHINGS
Me Yẹ Uvie Osolobrugwẹ?
Uvuẹn owian aghwoghwo ọnẹyen, Uvie Osolobrugwẹ yẹ oborẹ i Jesu ọ mai ta kpahen ọke ro yono ihworho. O jiri ne rẹ idibo yi a nẹrhomo nẹ Uvie ọrana ọ rhe.
IRUERUO AME
Ta rẹn Oseri Jehova no Bro rhe
Kpahenrhọ onọ ro nẹ i Baibol na rhe, yanghene yono riarorhọ kpahen Iseri Jehova.
