Me yi wa karorhọ wu rhe rhon ẹmro na apokalipsi? Wu na sabu roro taghene oghwọghọ akpọ ephian, ọkezẹko ọrẹ ọnọ ghwọghọ kemru kemru re nyerẹn. Ihworho ezẹko ne kwerhọ ye taghene akpọ na ọ dẹraroghwu oghwọghọ, maido ọke rẹ aye e se iyẹnrẹn jerẹ enana:

•   “Uvweri ra ha Bọmbu fiẹ​—Ituakpọ ina sabu ha arudo tuiẹnrhọ, jẹ rhe te, yanghene fọkiẹ ibiẹ ẹghwọ dede. Uvweri ọnana ọnọ sabu homaphia.”​—Bulletin of the Atomic Scientists

•   “Ẹgbukpe ikpe ri vrẹnren na, igiribo egbogbanhon buebun i homaphia, omaran ji te egbo ra torhẹ, okaka, ekwakwa ri se coral rẹ ituakpọ a kpẹn rhiefirhọ, odjedjẹre rọ homaphia, ọrhẹ ukude.”​—National Geographic.

•   “Ebaka re kuẹ Africa i me bun ghwẹ oborẹ aye e bun te bi, aye a jeghwai suẹ oghwọghọ vrẹn ọke bi.”​—The Associated Press.

 Ana ghwọghọ otọrakpọ na? Me yi Baibol na ọ tare?

 Ẹjo. I Baibol na ro rhiẹ Ẹmro Osolobrugwẹ, ọ ta rẹn ọwan taghene otọrakpọ na ono rhirhiẹ ye bẹmẹdẹ. (Ecclesiastes 1:4) Ukperẹ ọye ọnọ ghwọghọ otọrakpọ na, Osolobrugwẹ ọnọ “ghwọghọ era ghwọghọ otọrakpọ na.”.​—Revelation 11:18.

 Lele oborẹ i Baibol na ọ tare, “akpọ” ro no toba yẹ akpọ ituakpọ ri vwe dje ọghọ phia rẹn Osolobrugwẹ, ri jeghwai hatua ojẹmẹ erẹ aye. Jerẹ oborẹ ọye o ruru ọke Noah, Osolobrugwẹ ọnọ ghwọghọ “akpọ ihworho ri vwe rhe Osolobrugwẹ.”​—2 Peter 2:5; 3:7.

 Jerẹ oborẹ 1 John 2:17 ọ tare, “akpọ na ọ nyavrẹn ọrhẹ ojemẹ ọnẹyen.” Oghwẹmro ọnana o djephia taghene rhẹ otọrakpọ re rhirhiẹ na yẹ Osolobrugwẹ ọnọ ghwọghọ-ọ, ọrẹn ihworho re gbroma rhẹ ogbiruo eruo.

 I Baibol na ọ ta rẹn ọwan ọke oba na ono rhe-e. (Matthew 24:36) Ọrẹn ọ tare taghene e hion akpọ na o tikẹrẹ ne. Enana aruẹmẹrẹn ezẹko ri Baibol na ọ ta kpahen:

•   Ekwakwa jerẹ uvweri, emaren ẹ kanren, emiamo, ọrhẹ otọre e mwukpogho gbangbanhon “nẹ ekete owu riẹ ọreva.” ​—Matthew 24:3, 7, 14; Luke 21:10, 11; Revelation 6:1-8.

•   Ituakpọ ine vwo ufiuvwele ọduado. Jerẹ udje, “aye ine vwo ẹguọlọ igho,” “aye i dje ekpẹmẹ phia-a,” ‘aye i ji rhe oma aye suẹ-ẹn’​—2 Timothy 3:1-5.

 Ihworho buebun i vwo ekwerhọ taghene nẹ ẹgbukpe 1914 rhe, ekwakwa ra phia uvuẹn akpọ na i serhọ rhẹ aruẹmẹrẹn i Baibol, jeghwai djephia taghene oba na o tikẹrẹ ne. Ne wu sabu mẹrẹn iyẹnrẹn erọrọ, se irhomu-ẹmro enana “What Does Bible Chronology Indicate About the Year 1914?” ọrhẹ “What Is the Sign of ‘the Last Days,’ or ‘End Times’?”

 Edjadjẹ i Greek ra rhian rhẹ apokalipsi uvuẹn i Baibol na o mevirhọ re rhie emru firhọ. Ọgbọ buebuen ẹmro ọrana o dje kpahen iyẹnrẹn re ti nu, re ghwolophia. I Baibol na ọ ji ta kpahen “oghwolophia na [yan, apokalipsi] ọrẹ Ọrovwori na Jesu, rọ homaphia ọke ra ta taghene i Jesu yẹ ohworho ro vwo omẹgbanhon ro no tiẹ evwọkon ephian nẹ otọrakpọ na, jeghwai ha ebrurhọ rẹn era ga Osolobrugwẹ.​—2 Thessalonians 1:6, 7; 1 Peter 1:7, 13

 Ọbe rọ kẹta uvuẹn i Baibol na e serie A·po·kaʹly·psis yan Oghwolophia, fọkime ọ ta kpahen ekwakwa ri na phia obaro na. (Revelation 1:1) Ọbe ọrana o vwo iyẹnrẹn esiri ọrhẹ urhomu edje ifiẹrorhọ. (Revelation 1:3) Ọ tare taghene Osolobrugwẹ ono tiẹ irueruo ri vwe rhiẹ ọsoso ephian nie phẹlẹphẹlẹ jegwhai ghwẹriẹ otọrakpọ na rhiẹ i paradise. Ọke ọrana, ituakpọ i rhe rhiẹromẹrẹn omiamiamo, ojẹriọ, yanghene uhwu ghwomara-an.​—Revelation 21:3, 4.

 Wu guọlọ yono riarhọ kpahen ive irhorhomu enana? Iseri Jehova a ha uyono i Baibol ọphẹ phia, iyono enana ina ha userhumu wẹn. Damoma wu guọlọ aye mẹrẹn.