RHA DẸRẸ!
Ẹga Ọrhẹ Uvweri re Fiẹ Obẹ i Ukraine—Me yi Baibol na ọ Tare?
Se iyẹnrẹn kpahen oborẹ ilori ẹga a kpahanrhọ uvweri re fiẹ obẹ i Ukraine:
“Olori ẹga re se Patriarch Kirill ọrẹ ishọshi rọ mai titi rọ ha uvuẹn i Russia re se Orthodox, ọ ji tẹmro owuorowu kpahen uvweri rẹ ẹkwotọre i Russia i kpare bru i Ukraine na-a. . . . Ukpomaran, ishọshi na o kerabọ iyẹnrẹn efian kpahen i Ukraine, nẹ ọrana yi Putin ọ ha kpahen obọ rọ lẹrhiẹ fiuvweri na.”—EUobserver, March 7, 2022.
“Patriarch Kirill . . . ọ chochọn ẹkwotọre i Russia ọgbọ buebun ne, nyoma rọ ta taghene uvweri ri Russia ọ kpare bru i Ukraine—owọnren hasuẹ ọdandan.”—AP News, March 8, 2022.
“Olori ẹga re se Metropolitan Epiphanius I ọrẹ Kyiv ro suẹn ishọshi re se Orthodox uvuẹn Ukraine, nọ nẹrhomo rẹn ihworho yi nẹ aye i ye ‘fiuvweri hasuẹ isodja i Russia’ . . . [Ọye] ọ ji ta taghene rhẹ ọdandan re ne kpe isodja i Russia-a.”—Jerusalem Post, March 16, 2022.
“Ọwan ri rhiẹ [Ukrainian Council of Churches and Religious Organizations (UCCRO)] i hobọtua isodja i Ukraine ọrhẹ ọsoso ihworho ra wọnrọn chochọn ẹkwotọre na, ame i nẹrhomo nẹ aye i fikparobọ ji sẹrorẹ i Ukraine nẹ abọ ọvwreghrẹn yen, nẹ aye i ji vwo ebrurhọ.”—UCCRO a Statement, February 24, 2022.
Me wu rorori? O fori nẹ ẹga re dje oma rhiẹ Ilele Kristi, i ha urhebro rẹn ihworho ẹga aye nẹ aye i ye fiuvweri? Me yi Baibol na ọ tare?
Ikuegbe oborẹ ẹga o ru homaba irueruo uvweri
Ikuegbe o djephia ne taghene o jiri ne rẹ ẹga ọ chochọn ere fiuvweri yanghene hobọtua ye, ọkezẹko aye a gemai ruẹ kamẹriẹn nyoma uvweri yẹ akpọ na ọnọ tobọ vwo ufuoma. Uvwre ẹgbukpe buebun, Iseri Jehova i guolo uruemru omeru ọnana rẹ ẹga e djephia ne. Djokarhọ idje ezẹko ra rionbọrhọ uvuẹn ẹbe ukoko ame.
Urhomu-ẹmro na “The Crusades—A ‘Tragic Illusion’”, o dje oborẹ ishọshi Roman Catholic o ru kpe ihworho buebun ọrẹ erhierhi, ji ta taghene aye ruie fọkiẹ odẹ Osolobrugwẹ ọrhẹ Kristi.
Urhomu-ẹmro na “The Catholic Church in Africa,” o dje udje kpahen oborẹ ega o ru toroba uvweri ri homaphia fọkiẹ edjadjẹ ọrhẹ amwa re nurhe.
Irhomu-ẹmro na “Is Religion to Blame?,” “Religion’s Role in Man’s Wars,” ọrhẹ ““Religion Takes Sides,” i dje oborẹ ilori ẹga ishọsi Catholic, Orthodox, ọrhẹ Protestant i ru hobọtua emwa sansan ra wọnrọn hasuẹ omomaye.
O fori nẹ ẹga Ilele Kristi hobọtua uvweri?
Oborẹ i Jesu o yonorin: “Wu ne vi vwo ẹguọlọ kpahen ọreva jerẹ oma ọnọ.” (Matthew 22:39) “Are i rhe vwo ẹguọlọ kpahen evwreghrẹn are.”—Matthew 5:44-47.
Roro kpahen ọnana: Ẹga ọnọ sabu ta taghene ọ huvwele urhi Jesu kpahen ẹguọlọ, ji rha ha urhebro rẹn ihworho ẹga aye nẹ aye i kpe awọrọ uvuẹn uvweri? Ẹkpahenrhọ na ọ ha uvuẹn irhomu-ẹmro na “True Christians and War” ọrhẹ “Is It Possible to Love One’s Enemies?”
Oborẹ i Jesu ọ tare: “Uvie mẹ ọ ha usuẹn akpọ ọnana-a. Orhianẹ Uvie mẹ ọ ha usuẹn akpọ ọnana, manẹ idibo mẹ a wọnrọn mẹ neneyo a ja rha ha mẹ” kpahontọre. (John 18:36) “Ihworho ri ha odan ọlọkọ wọnrọn, aye ine hwuo nyoma odan ọlọkọ.”—Matthew 26:47-52.
Roro kpahen ọnana: Ra mẹriẹn taghene Jesu o kwe nẹ Ilele Kristi wọnrọn chochọn ye-e, o fori nẹ aye i wọnrọn fọkiẹ iroro erọrọ? Se urhomu-ẹmro na “Is War Compatible With Christianity?” ne wu mẹrẹn oborẹ o jiri te ne, rẹ Ilele Kristi a fuevwan nyalele udje ọrhẹ iyono i Jesu.
Me yọ nọ phia rẹn ẹga re jiri uvweri?
Baibol na o yonorin taghene Osolobrugwẹ o vwo utuoma kpahen ẹga ra gemai ruẹ taghene aye Ilele Kristi, ọrẹn aye i vwa huvwele iyono i Jesu-u.—Matthew 7:21-23; Titus 1:16.
Ọbe i Revelation o djephia taghene Osolobrugwẹ ọnọ nekpẹn “ọbara ọsoso ihworho re kperi uvuẹn otọrakpọ na,” mie ẹga ri suẹ uhwu kpe aye. (Revelation 18:21, 24) Ne wu sabu rhe oborẹ ọsoriẹ, se urhomu-ẹmro na “What Is Babylon the Great?”
Jesu ọ tare taghene “orhan rọ vwọ mọ emamọ orhorhomu, ana hẹn ye se, jeghwai donrien rhẹ uvuẹn erhanren,” omaran ana ji ghwọghọ ọsoso ẹga ra tenren fọkiẹ ewian ibiobiomu aye. (Matthew 7:15-20) Se urhomu-ẹmro na “The End of False Religion Is Near!” ne wu sabu rhe oborẹ ọnana ọnọ phia lele.
Ifoto, obohwẹre riẹ obọrhe: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a UCCRO, yanghene Ukrainian Council of Churches and Religious Organizations, o vwo ishọshi 15 ri mevi rẹn Orthodox, Greek ọrhẹ Roman Catholic, Protestant, ọrhẹ Evangelical denominations kugbe otu i Jew ọrhẹ Muslims.
You May Also Like
Russia i Kparẹ Owọnren Riẹ Ukraine—Aruẹmẹrẹn i Baibol o Ruẹgba ne?
Orho rhiomaran, i Baibol na ọ ta rẹn ọwan oborẹ orugba na ono toba lele?
ESSENTIAL BIBLE TEACHINGS
Me Yẹ Uvie Osolobrugwẹ?
Uvuẹn owian aghwoghwo ọnẹyen, Uvie Osolobrugwẹ yẹ oborẹ i Jesu ọ mai ta kpahen ọke ro yono ihworho. O jiri ne rẹ idibo yi a nẹrhomo nẹ Uvie ọrana ọ rhe.
