Uvuẹn May 23, 2023, idọkitọ owu ro titiri omamọ uvuẹn ẹkwotọre i United States nọ ha orhetio phia taghene itanẹti ọ suẹ ẹkuọn rẹn iphuphẹn buebun vwana.

•   “Dedevwo ekwakwa itanẹti a rhua erere vwe emọvwerhe ọrhẹ iphuphẹn ezẹko, ọrẹn a ji mẹrẹnvwrurhe ne taghene ọnọ ji sabu suẹ ẹkuọn rẹn aye izede ọrẹ iroro ọrhẹ ọrẹ ugboma.”​—Social Media and Youth Mental Health: The U.S. Surgeon General’s Advisory, 2023.

 Enana iroro ezẹko ra hunute rọ soriẹ o fo na kpare udjoghwẹ ogege.

•   Iphuphẹn ri ha emrẹ ẹgbukpe 12 fiẹ 15 “ra ghwọghọ ghwẹ inọke 3 kẹdẹkẹdẹ uvuẹn itanẹti, ya mai rhiẹromẹrẹn oborẹ ọ suẹ emiamo iroro jerẹ ẹhẹn ro seriotọre ọrhẹ ọfiamu.”

•   Emọ ri ha uvwre ẹgbukpe 14 maido egbọtọ “ra ha ekwakwa itanẹti ruiruo omamọ, i vwa mẹrẹn ọke sabu merhẹ-ẹn, e sehiẹn aye nyoma itanẹti, ẹhẹn aye o ji seriotọre omamọ, nime aye e roro taghene aye e rhomu te emọ erọrọ-ọ.”

 Marhẹ emiemọ ine ru sabu sẹrorẹ emọ aye nẹ imwofẹn enana? Baibol na o tiobọnẹ obọdẹn orhetio.

 Rhe ni emọ sua. O fori nẹ emiemọ i ni erhirhiẹ na so, ji brorhiẹn sẹ aye ine kwe nẹ emọ aye i ha ekwakwa itanẹti ruiruo.

•   Uruemru-urhi Baibol: “Yono ọmọ izede ọnọ nyalele.”​—Proverbs 22:​6, ekete ra djokarhọ.

•   Wu rha guọlọ yono rhọ, se urhomu-ẹmro na “Should My Child Use Social Media?”

 Wu rhe kwe nẹ ọmọ ọ ha ekwakwa itanẹti ruiruo, gba damoma nie so neneyo ekwakwa ro ruẹ uvuẹn itanẹti nọ jọ rhọ suẹ okpetu riẹn. Izede ọgo?

 Ha Userhumu rẹn ọmọ kẹnoma rẹn ekwakwa ri vwe serhọ uvuẹn itanẹti. Yono ọmọ no rhe oborẹ ọnọ sabu ha ẹkuọn riẹn uvuẹn itanẹti ji kẹnoma riẹn.

•   Uruemru-urhi Baibol: “Are i vwe jenẹ irueruo ọfanrhiẹn ọrhẹ kemru kemru ri vwa fon yanghene ufiuvwele, na hunute aye kakaka uvwre are-e, . . . yanghene uruemru ofa, yanghene ẹmro akpa ọrhẹ ẹmro igbegbon ra ha djechẹ.”​—Ephesians 5:​3, 4.

•   Wu rha guọlọ urhebro wu na sabu ha ruiruo, se urhomu-ẹmro na “Teaching Your Teenager Social Media Safety.”

 Jurhi rẹn ọmọ. Jerẹ udje, jurhi kpahen oborẹ ọnọ ha ekwakwa itanẹti ruiruo lele ọrhẹ oborẹ ono jiri te.

•   Uruemru-urhi Baibol: “Are i gba dabu dẹrẹ neneyo oborẹ are a nyalele o rhiẹ ihworho ri vwo ẹghwanren . . . rẹ are a dabu ha ọke are ruiruo.”​—Ephesians 5:​15, 16.

•   Ha ikatunu ra ha ophanphan haphia na, Ha Itanẹti Ruiruo Rhẹ Ẹghwanren ha userhumu rẹn emọ vwẹruọ oborẹ ọsoriẹ irhi enana e serhọ.