Ro vwo jijiri na, ere suẹn, otu isayẹnsi ọrhẹ eri tẹn ona itẹknọlọji, i ta kpahen aruẹ omẹgbanhon ro gberẹ ekwakwa itẹknọlọji ra hẹrokele ituakpọ re se AI. Dedevwo aye i hunute oborẹ ekwakwa enana i rhomu te, ọrẹn aye ji ta taghene ihworho ezẹko ina sabu ha aye ruiruo izede rọ sọre.

•   Kamala Harris, ro rhiẹ vice president ọrẹ United States, nọ tare May 4, 2023 taghene: “Ekwakwa enana i ha usuẹn ekwakwa ri mai vwo omẹgbanhon rẹ ewena i ru ne, rọ sabu lẹrhẹ akpenyerẹn ihworho rhomẹrhọ . . . Ọrẹn, ekwakwa enana ina ji sabu lẹrhiẹ phẹrẹ ni ihworho i ha ẹkuọn rẹn awọrọ, gbe ozighi ji ghwolo emru odjahen awọrọ phia, ọ ji lẹrhẹ ihworho ja hẹroso awọrọ ọrhẹ igọmẹti.”

•   Uvuẹn May 9, 2023, Dr. Frederik Federspiel ọrhẹ idọkitọ erọrọ ri ne emwa sansan rhe, i ta kpahen urhomu-ẹmro ọnana uvuẹn ọbe na BMJ Global Health a taghene: “Dedevwo ekwakwa enana ra hẹrokele ihworho na, i lẹrhẹ omesimo rhomurhọ ne, ọrẹn ọ ji ha ẹkuọn sansan rẹn omọkpokpọ ituakpọ”

•   Iyẹnrẹn rẹ The New York Times, ọ haphia May 1, 2023, nọ tare: “Vwana, a ha ekwakwa itẹknọlọji enana rẹ se AI kpare iyẹnrẹn ofian ne. Phẹrẹkpẹ ọnọ sabu lẹrhẹ iruo ihworho va aye obọ. Habaye, ewena sansan ri rhe kpahen itẹknọlọji i tare taghene, ọnọ sabu suẹ ẹkuọn ri ituakpọ obaro na “

 Ana dabu rhe fiotọre obaro na, sẹ ihworho ina ha ekwakwa enana ruo oborẹ orhomurun yanghene oborẹ obiomurun. Me yi Baibol na ọ tare?

 Baibol na o dje oborẹ ọsoriẹ ituakpọ ina ja sabu rhe sẹ ana ha ekwakwa itẹknọlọji aye ruẹ oborẹ orhomurun ọke ephian.

1.  1. Ihworho ri tobọ ha omamọ ẹhẹn ruẹ ekwakwa enana, i vwe fiẹrorhọ taghene irueruo aye ọnọ ha ẹkuọn rẹn awọrọ-ọ.

   •   “O vwo izede ro gbare uvuẹn ukẹro onyakpọ, ọrẹn obẹtaye no suẹn riẹ uhwu.”​—Proverbs 14:12

2.  2. Ohworho ọ vwọ sabu suẹn oborẹ awọrọ ina ha oborẹ o ruru ruiruo lele-e.

   •   “Mi na vi nyajẹ [owian mẹ] vwo rẹn ohworho rọ ha kpahen mẹ. Habaye, ọrọmo yo rheri sẹ ono rhiẹ ọvwẹghwanren yanghene ọvwidjigbo? Ọrẹn ọye ọnọ vi ha ọsoso ekwakwa ri mi ha omẹgbanhon ọrhẹ ẹghwanren mẹ koko ne riuku uvuẹn otọre ọren na.”​—Ecclesiastes 2:18, 19.

 Ọnana yọ soriẹ a guọlọ ọkpọvi Ọmemama ọwan.

 Ọmemama ọwan o veri taghene o kwe nẹ ituakpọ yanghene ekwakwa itẹknọlọji aye i ruru, nọ ghwọghọ otọrakpọ na yanghene ere rhirhiẹ uvuie-en.

•   “Otọrakpọ na ono rhirhiẹ ye bẹmẹdẹ.”​—Ecclesiastes 1:4.

•   “Evwata na ina ha otọrakpọ na riuku, aye ine nyerẹn uvuien bẹmẹdẹ.”​—Psalm 37:29.

 Ọmemama ọwan ọ nyoma i Baibol na yẹ ọwan ọkpọvi rọ nọ lẹrhẹ ọwan vwo obọdẹn ufuoma ọrhẹ omefuon obaro na. Wu rha guọlọ yono rhọ kpahen oborẹ i Baibol na ọ tare, se irhomu-ẹmro na “Is There a Reliable Guide to a Secure Future?” ọrhẹ “A Real Hope for a Better Tomorrow.”