Ọro suẹn World Bank Group nọ tare uvuẹn iyẹnrẹn owu ọrẹ June 2022 taghene, “ekwakwa a kpara ghanran uvuẹn akpọ na. Ọrọ tobọ mai biomu, ihworho e vwo igho rẹ aye ina dẹ ekwakwa na-a.”

 International Monetary Fund nọ tare taghene “uchunu igho ra ha dẹ ipẹtrol ọrhẹ emaren o rierun omamọ ne, ọnana ọ hobọte ihworho ri ha uvuẹn ẹkwotọre ri vwe vwo igho bun.”

 Baibol na ọ ha userhumu rẹn ọwan vwẹruọ oborẹ ọsoriẹ ekwakwa a gbanhon uvuẹn akpọ na, oborẹ ene ru nyerẹn ghelie, ọrhẹ oborẹ e fiẹrorhọ ro no fiobarhọ ye bẹmẹdẹ.

•   Baibol na o se ọke ọwan na “ẹdẹ ri koba na.”—2 Timothy 3:1.

•   Jesu ọ tare taghene “ekwakwa ri mwuofẹn” ina phia uvwrọke ọnana. (Luke 21:11) Ekwakwa ra ghanran ọ suẹ ofẹn. Ihworho e brudu kpahen obaro na, aye e ji brudu sẹ aye ina sabu hẹrote ekrun aye.

•   Ọbe i Revelation ọ mẹraro taghene emaren ina ghanren uvwrọke ọnana. “Ni mi rhon oborẹ ọ họhọ uvwele. . . . Nọ tare, ‘Uchunu igho ikilo i wheat owu ọrhẹ uchunu igho ikilo i barley esa, ono bun te igho ra kwa rẹn ohworho rọ wianren ọsoso ẹdẹ na.’”—Revelation 6:6, Easy-to-Read Version.

 Wu rha guọlọ yono rhọ kpahen “ẹdẹ ri koba na” ọrhẹ aruẹmẹrẹn rọ ha uvuẹn ọbe i Revelation, ni ividio na Akpọ na o Wene ne Avwẹ Ẹgbukpe 1914 Rhe, ji se urhomu-ẹmro na “The Four Horsemen—Who Are They?”

•   “Aye ina bọn eghwa jeghwai rhirhiẹ uvuẹn aye, aye ina wọ i vine jeghwai riẹ emamọ aye. Aye i bọn nẹ awọrọ i rhirhiẹ uvuie-en, yanghene aye i wọ nẹ awọrọ i riẹ-ẹ.”—Isaiah 65:21, 22.

•   “Emaren no no gbephe uvuẹn akpọ na; ono gbephe omamọ uvuẹn oberun igbenu na.”—Psalm 72:16.

•   “Jehova nọ tare, ‘Mi na kpare udjoghwẹ fọkime e sehiẹn era rioja, ọrhẹ fọkime ivwiegbere na e brenu.’”—Psalm 12:5. a

 Phẹrẹkpẹ, Osolobrugwẹ ono fiobarhọ akpọ ọgbogbanhon, uvuẹn ẹkwotọre ephian uvuẹn akpọ na. Wu rha guọlọ rhe oborẹ ono ruie lele, se urhomu-ẹmro na “Is a Fair Economic System Possible?”

 Ọrẹn vwana, Baibol na ọnọ sabu ha userhumu wẹn nyerẹn udabọ ekwakwa ra ghanran. Izede ọgo? Baibol na o vwo urhebro ri na ha userhumu wẹn ha igho ọnọ ruiruo izede ẹghwanren. (Proverbs 23:4, 5; Ecclesiastes 7:12) Wu rha guọlọ yono rhọ, se irhomu-ẹmro na “Protect Your Livelihood” ọrhẹ “How to Live on Less.”