Uchunu igho rẹ igọmẹti sansan uvuẹn akpọ na i ghwọghọ rhẹ ekwakwa uvweri ọ ghwẹ 2.24 trillion (U.S.) dollars uvuẹn ẹgbukpe 2022, aye i ghwọghọ igho ọnana fọkiẹ uvweri ri Russia ọ kpare bru i Ukraine. Sekpahen iyẹnrẹn ri Stockholm International Peace Research Institute (SIPRI) o tiobọnu uvuẹn April 2023, aye i tare taghene uvwre ẹgbukpe 2022:

•   Uchunu igho ra ghwọghọre fọkiẹ ekwakwa uvweri, “o rierun omamọ vrẹn igho ra ghwọghọre ẹgbukpe owuowu avwẹ ẹgbukpe 1991 rhe.”

•   “Fọkiẹ oborẹ ẹkwotọre i Russia…i ghwọghọ igho rhẹ ekwakwa uvweri te, aye ni rhiẹ ẹkwotọre ọresa ri mai ghwọghọ igho rhẹ ekwakwa uvweri uvuẹn akpọ na.”

•   Ẹkwotọre i United States “ya ji mai ghwọghọ igho rhẹ ekwakwa uvweri uvuẹn ọsoso akpọ na.”

 Dr. Nan Tian, rọ ha usuẹn eri tiobọnẹ iyẹnrẹn ọrẹ SIPRI nọ tare, “Nime uchunu igho rẹ igọmẹti a ghwọghọ rhẹ ekwakwa uvweri no buẹnrhọ buẹnrhọ, ọnana o djephia taghene ekwakwa ine rhe biomẹrhọ biomẹrhọ.”

 Baibol na ọ mẹraro taghene ere suẹn ina kparehaso omomaye, nọ ji ta kpahen oborẹ ọnọ sabu yẹ ọwan ufuoma.

•   Baibol na ọ tare taghene ọwan e nyerẹn uvuẹn “ọke oba na.”—Daniel 8:19.

•   Ọbe i Daniel ọ mẹraro taghene uvwrọke ọrana, ere suẹn ine rhe simi ẹrhẹ omẹgbanhon akpọ ephian. Emẹgbanhon akpọ enana ina rha wọnrọn owuowọnwan, jeghwai “simi ẹrhẹ” ọrọ mai gbanhonma. Ọnana ọnọ lẹrhẹ aye ghwọghọ igho ọrhẹ “ekwakwa irhorhomu” buebun.—Daniel 11:40, 42, 43.

 Wu rha guọlọ yono rhọ kpahen aruẹmẹrẹn ọnana, ni ividio na Aruẹmẹrẹn ro Rugba—Daniel Urhomu-ẹmro Ọrẹ 11.

•   Baibol na ọ tare taghene Osolobrugwẹ ono tiẹ igọmẹti ituakpọ nie. Ọnọ “ha uvie owu mwu ra na ja sabu ghwọghọ. A ha uvie ọnana rẹn ihworho erọrọ-ọ. Nọ nọ ghwọghọ aye ji fioba rhẹ ọsoso ivie enana, ọye ọvo yo no mevi bẹmẹdẹ.”—Daniel 2:44.

•   Phẹrẹkpẹ, Jehova a Osolobrugwẹ ọ samọ ruẹ oborẹ igọmẹti ituakpọ i vwa sabu ru—ọnọ yẹ ọwan obọdẹn ufuoma rọ nọ tọ bẹmẹdẹ. Marhẹ ono ruie lele? Uvie ọnẹyen rọ ha mwu obẹ odjuwu, ọnọ ghwọghọ ekwakwa uvweri ephian, ji fiobarhọ ozighi.—Psalm 46:8, 9.

 Wu rha guọlọ yono rhọ kpahen oborẹ Uvie Osolobrugwẹ ono ru rẹn ọwan, se urhomu-ẹmro na “Under God’s Kingdom ‘Peace Will Abound.’”