Irhi Osolobrugwẹ Kpahen Omẹfuọn o Serhọ Uvuẹn Ọke Ephian
Bọmọke emọ Israel i ki ruẹ Otọre Ive na emrẹ ẹgbukpe 3,500 ri vrẹnren na, Osolobrugwẹ nọ tare taghene ọye ọnọ sẹrorẹ aye nẹ erharhere emiamo rẹ aye i rheri uvuẹn Egypt. (Deuteronomy 7:15) Izede owu o ru ruẹ ọnana yẹ, nyoma ro tiobọnẹ ọkpọvi ri fiotọre kpahen omẹfuọn ọrhẹ oborẹ ene ru kẹnoma rẹn emiamo. Jerẹ udje:
Osolobrugwẹ o jurhi ri sekpahen ẹwọ ọrhẹ ewun erufon.—Leviticus 15:4-27.
Sekpahen isọn ituakpọ, Osolobrugwẹ nọ tare: “O fori nẹ ekete are ine kpitanghwẹ o rhiẹ otafe ọko na, oboran yo fori nẹ are i nya. O fori nẹ are i ji vwo ibiẹ orhan are ine dumu rhotọre. Ọke are e rhe ye kpitanghwẹ otafe, are i tọn otọre, orho ru are i gbe rhurhu isọn na.”—Deuteronomy 23:12, 13.
Ihworho re rorori taghene aye i vwo emiamo ri na sabu mwu awọrọ, ne fi aye rhẹ ekete san rẹ ihworho i vwa havwọ uvwre ibiọke. Bọmọke ihworho ri vwo emiamo ina ki ghwẹrioma, aye ine kiki fọnrhọn ewun aye jeghwai wọ vwẹre, orhianẹ aye i guọlọre ne ni aye jerẹ ihworho ri fonron.—Leviticus 14:8, 9.
Kohworho kohworho rọ hobọte orinmi, ne fi aye rhẹ ekete san.—Leviticus 5:2, 3; Numbers 19:16.
Irhi ra yẹ emọ Israel o surhobọmwu irueruo omesimo ọrhẹ ukẹro ra ha ni omẹfuọn ro serhọ harẹn ọke ephian.
Uvuẹn ekete erọrọ, ukẹro ra ha ni omẹfuọn ọke ahwanren o titiri omamọ. Jerẹ udje:
E donron itele rhẹ uvuẹn udumu. Ame igbegbe, emaren ri biomu ne, ọrhẹ aruẹ itele erọrọ a lẹrhẹ ihworho buebun vwo emiamo jeghwai suẹ uhwu rẹn emọvwerhe buebun.
Idọkitọ ri havwiẹ ọke ahwanren, e rhe ekwakwa buebun kpahen itele ọrhẹ ekwakwa ra suẹ emiamo-o. Itu Egypt a ha ekwakwa jerẹ ọbara i kpọkpọrọkpọ, isọn ilebe, aranmoghwa ro hwu ne, eka, ọrhẹ ibrẹdi ro biomu ne ruẹ “ifuen” rẹn emiamo. Aye a ji ha isọn ituakpọ ọrhẹ eranmo ruiruo uvuẹn omesimo aye.
Itu Egypt ọke ọrana a kpare emiamo sansan nẹ ame igbegbe ọrẹ urhie i Nile ọrhẹ ekete sansan rẹ ame na ọ zẹ vrẹn. Omaran ọ ji havwọ, emọvwerhe buebun uvuẹn Egypt ne hwuẹ fọkiẹ emiamo re tuevwan ọrhẹ aruẹ emiamo erọrọ.
Ọrẹn, emọ Israel i mẹrẹn erere jeghwai vwo omọkpokpọ fọkime aye i nyalele Irhi Osolobrugwẹ.