•   “Ẹkwotọre i China ọ nẹ iyẹnrẹn taghene ẹgbukpe ọnana yẹ aruọke na ọ ‘mai djẹrẹ’ kparobọ, ọgbesa yẹ aruọke na ọ djẹrẹre omaran ne.”—The Guardian, September 7, 2022.

•   “Greater Horn of Africa ọ tare taghene ọnana ẹgbukpe ọrẹ isionrin rẹ okaka ọ homaphia uvuẹn Africa ne, ihworho ina rioja uvuẹn ekete ezẹko omamọ.”—UN News, August 26, 2022.

•   “Joma ọsoso Europe yẹ okaka ọnọ homaphia, ọnana ọnọ sabu rhiẹ okaka rọ mai gbanhon re rhiẹromẹrẹn ne vwre ẹgbukpe 500.”—BBC News, August 23, 2022.

 Ewena ri rhe kpahen aruọke na i tare taghene ọkezẹko okaka na ọnọ gbanhonrhọ obaro na. Ifiẹrorhọ ọ havwiẹ taghene ekwakwa ine serhọ obaro na? Me yi Baibol na ọ tare?

 Baibol na ọ mẹraro taghene uvuẹn ọke ọwan:

•   “Nẹ ekete owu riẹ ọreva, emaren ina kanren.”—Luke 21:11.

 Okaka ọ lẹrhẹ emaren kanran. Emaren ẹkanren, ojẹriọ ọrhẹ uhwu ro nerhumie sa, ọ ha aruẹmẹrẹn i Baibol te orugba.—Revelation 6:6, 8.

 Baibol na ọ hunute iroro owu kirighwo rọ soriẹ okaka na ọ gbanhanrhọ. Nọ tare:

•   “Ọ havwiẹ harẹn onyakpọ rọ nya nọ kpọ udjoghwẹ onya yen vi-i.”—Jeremiah 10:23.

 Ọnana o mevirhọ taghene ituakpọ i sabu ‘kpọ udjoghwẹ [aye] viẹ-ẹ,’ yanghene sun oma aye-e. Orhienbro esọsọ aye yọ suẹ okaka ọrhẹ ame ẹkanren.

•   Egba isayẹnsi buebun i kwerhọ ye taghene irueruo ituakpọ, yọ lẹrhẹ aruọke na biomẹrhọ, rọ ji suẹ okaka ọgbogbanhon uvuẹn akpọ na ephian.

•   Ufiuvwele ituakpọ ọrhẹ erharhere irhi aye i jiri, yọ lẹrhẹ ihworho kpe erhan eduado, gbe otọrakpọ na, ji ha ekwakwa ri ha uvuien ruiruo izede rọ sọre, fọkiẹ ọnana, e vwe rhe kiki mẹrẹn omamọ ame-e.

 Ọrẹn, Baibol na ọ yẹrẹ ọwan ifiẹrorhọ.

 Baibol na o veri taghene Osolobrugwẹ ono ruiẹ nẹ ame o vuọn ekete ephian. Izede ọgo?

1.  1. Osolobrugwẹ ọnọ “ghwọghọ era ghwọghọ otọrakpọ na.” (Revelation 11:18) Ono tiẹ oborẹ ọ lẹrhẹ ame kanran nie, nọyẹ evwọkon na, ọrhẹ eri vwo ufiuvwele ra ghwọghọ otọrakpọ na.—2 Timothy 3:1, 2.

2.  2. “Otọre rọ kare omamọ na, ọnọ dẹrẹrhiẹ ekete ro vwo ame buebun.” (Isaiah 35:1, 6, 7) Osolobrugwẹ ọnọ kwaphiẹ oborẹ okaka na ọ ghwọghọre, ji dẹrẹ akpọ na rhiẹ paradais rọ vuọnren rhẹ ame.

3.  3. “Wa hẹrote otọrakpọ na, ji ruie no rhomu emaren ji rhoma omamọ.” (Psalm 65:9) Nyoma ebrurhọ i Jehova, otọrakpọ na ọnọ vuọn rhẹ emamọ emaren, ọrhẹ ame rọ fonron.