Uvwre July 2022, oborẹ a sa ekpogho lele uvuẹn ekete sansan uvuẹn akpọ na, o gbe ihworho buebun unu omamọ:

•   “O gbe ihworho buebun unu uvuẹn akpọ na, ọke ra sa [former Prime Minister Shinzo Abe] ọrẹ ẹkwotọre i Japan kpe, maido ra mẹriẹn taghene a vwa kpara gbozighi ji ha okpọghọ ruiruo uvuẹn ẹkwotọre na-a.”—July 10, 2022, The Japan Times.

•   “Ofẹn o mwu ihworho re rhirhiẹ ẹkwotọre i Denmark omamọ, ọke ra ha okpọghọ sa awansa kpe uvuẹn ekete ra dẹ ekwakwa uvuẹn Copenhagen.”—July 4, 2022, Reuters.

•   “South Africa: Awan 15 yi hwuru ọke ihworho ezẹko a kpare ekpọghọ sa, uvuẹn ekete owu ra rhẹ inyo uvuẹn Soweto.”—July 10, 2022, The Guardian.

•   “Uvuẹn ehion ọkprughwre ọrẹ July 4, ihworho ri vrẹn 220, ya ha okpọghọ sa kpe uvuẹn U.S., ọke ozighi owu ọ homaphia.”—July 5, 2022, CBS News.

 E vwo ifiẹrorhọ taghene aruẹ ozighi ọnana ono toba? Me yi Baibol na ọ tare?

 Baibol na o dje ọke ọwan na taghene “ẹdẹ ri koba na,” ro rhiẹ ọke ihworho ina djoma, ruẹ ọkon, ji rhe ruẹ ekwakwa ibiobiomu. (2 Timothy 3:1, 3) Aruẹ irueruo ozighi enana nọ lẹrhẹ ofẹn mwu ihworho omamọ. (Luke 21:11) Ọrẹn, Baibol na o vive kpahen ọke re ne tiẹ ozighi nie, ‘ihworho ni ne rhirhiẹ uvuẹn ekete ufuoma, ekete omefuon ọrhẹ ekete ẹhẹn aye ono totọre.’ (Isaiah 32:18) Marhẹ ene ru fiobarhọ ozighi?

 Osolobrugwẹ ọnọ ghwọghọ evwọkon na, ọrhẹ ekwakwa owọnren ephian.

•   “Sekpahen evwọkon na, ana ghwọghọ aye nẹ otọrakpọ na.”—Proverbs 2:22.

•   “[Osolobrugwẹ] ono fiobarhẹ ivweri uvuẹn otọrakpọ na ephian. Ọye ọ ghwọghọ ikpitanbọ ọrhẹ akarhẹ na; ọye ọ torhẹ ekalokpọ owọnren na.”—Psalm 46:9.

 Osolobrugwẹ ono tiẹ oborẹ ọ suẹ ozighi nie, nyoma ro no yono ihworho nẹ aye i nyerẹn ọrẹ ufuoma.

•   “Aye i suẹ ẹkuọn yanghene oghwọghọ owuorowu uvuẹn ọsoso ugbenu ọfuanfon mẹ na-a, fọkime irherhe i Jehova ọnọ vuọn otọrakpọ na, jerẹ oborẹ ame ọ vuọn urhie ọduado na.”—Isaiah 11:9.

•   Vwana dede, Osolobrugwẹ o yono ihworho uvuẹn akpọ na nẹ aye i kẹnoma rẹn ozighi egbe, ọrhẹ ekwakwa owọnren ra ha ruiruo, ji “dumu odan ọlọkọ aye rhiẹ ikwro, jeghwai dumu egiọ aye rhiẹ egbage.”—Micah 4:3.

 Wu rha guọlọ yono rhọ kpahen ive i Baibol na kpahen akpọ ro vwo vwo ofẹn, se urhomu-ẹmro na “Freedom From Fear—Is It Possible?”

 Wu rha guọlọ yono rhọ kpahen oborẹ ene ru fiobarhọ ozighi bẹmẹdẹ, se urhomu-ẹmro na “Peace on Earth at Last!”