“Ituakpọ e ruẹ ekwakwa buebun ra ghwọghọ otọrakpọ na bibiesuọn. Ukude ọnọ phia uvuẹn emwa eduado. Aruọke ọnọ djẹrẹ omamọ. Ogiribo egbogbanhon ina djofẹn mwu ihworho. Ame ọnọ kanren uvuẹn ekete buebun. Aruẹ eranmo ọrhẹ ewawọ buebun ine hwuo. Ọnana ghwai rhẹ oborẹ e dje vrẹn ovwa-an, yanghene ẹmro osia-a. Ọnana oborẹ otu isayẹnsi i tare taghene ọnọ phia, orhianẹ ere suẹn e ruẹ emru kpahen oborẹ ọ phia uvuẹn akpọ na-a.”—Ọnana oborẹ António Guterres, secretary-general of the United Nations, ọ ta kpahen Intergovernmental Panel, sekpahen ewene ra nẹ iyẹnrẹn kpahen uvuẹn April 4, 2022.

 “Otu isayẹnsi i tare taghene ẹgbukpe ezẹko ra sa obaro na, emrẹ ekete ri te 423 [uvuẹn United States] re ronmoma yi na ghwọghọ, maido fọkiẹ aruọke na ro wene rọ nọ hobọte aye. Ekwakwa ibiobiomu enana re fiẹrorhọ na, i họhọ iyẹnrẹn kpekpa re se kpahen uvuẹn ọbe: jerẹ erhanren ọrhẹ ukude, imito ra vwrorhan, irhie eduado ra kpara ọrhẹ aruọke rọ djẹrẹ.”—“Flooding Chaos in Yellowstone, a Sign of Crises to Come,” The New York Times, June 15, 2022.

 Ana sabu kwaphiẹ ekwakwa ra lẹrhẹ akpọ na ghwọghọ? Orhiomaran, ọrọmo yọ nọ kwaphiẹ aye rhọ? Roro Kpahen oborẹ i Baibol na ọ tare.

 Baibol na ọ tare taghene Osolobrugwẹ ọnọ “ghwọghọ era ghwọghọ otọrakpọ na.” (Revelation 11:18) Ekete i Baibol ọnana o yonirin ọwan ekwakwa esa:

1.  1. Irueruo ituakpọ ọnọ ghwọghọ otọrakpọ na omamọ.

2.  2. Ituakpọ i ghwọghọ otọrakpọ na bẹmẹdẹ-ẹ.

3.  3. Osolobrugwẹ yọ nọ kwaphiẹ otọrakpọ na rhọ, orhiẹ ituakpọ-ọ.

 Baibol na ọ tare taghene “otọrakpọ na ono rhirhiẹ ye bẹmẹdẹ.” (Ecclesiastes 1:4) Ene rhe rhirhiẹ ye ọke ephian.

•   “Evwata na ina ha otọrakpọ na riuku, aye ine nyerẹn uvuien bẹmẹdẹ.”—Psalm 37:29.

 Ana kwaphiẹ i kemru kemru ra ghwọghọre uvuẹn otọrakpọ na.

•   “Ato na ọrhẹ otọre ọkaka na ina ghọghọ, ato na ọnọ ghọghọ ji homaphia gbidigbidi jerẹ idodo re se i saffron.”—Isaiah 35:1.