Isodja Russia i kpare uvweri haso Ukraine ẹdẹ ọrẹ February 24, 2022. Ọnana nọ so erhirhiẹ ọgbogbanhon ro fiẹ arhọ ihworho rhẹ imwofẹn, nọ jeghwai lẹrhẹ iduduru ihworho zẹ nẹ ẹkwotọre na. a

 “Ibọmbu na sa. A tobọ rhe oborẹ ene dje ehrirhiẹ na rhọ-ọ, nime o mwofẹn omamọ. Ọke ame e rhon taghene o vwo i traini ra kpare ihworho, ame ni brorhiẹn ame ine nẹ amwa na. Ame nyajẹ ekwakwa ephian vwo jokpanẹ ibiẹ ẹkpa vo yẹ ame i kparare. Ẹbe, imwu, ame, ọrhẹ ibiẹ emaren ọvo yẹ ame i sabu kpare leloma. Ọsoso ekwakwa ri hẹrhẹre, ame ni nyajẹ aye vwo ya ruẹ i traini, ọrẹn tobonẹ tobonẹ, ibọmbu a sa.”—Nataliia, ro nẹ Kharkiv, Ukraine rhe.

 “Ame e roro taghene uvweri ọ sa-a. Mi rhon edon uvuẹn ekete ezẹko uvuẹn amwa na, ivakpo ri ha eghwa a jeghwai kpogho. Ne mi brorhiẹn mi ne nẹ amwa na rhẹ ibiẹ ekwakwa ezẹko ọvo mi kparare. Mi nẹ oghwa ughwọjọ 8:00 urhiọke, ne mi ruẹ itraini ro riẹ Lviv, ọke o ru, ne mi ruẹ i bọsu ro riẹ Poland.”—Nadija ro nẹ Kharkiv, Ukraine rhe.

Uvuẹn urhomu-ẹmro ọnana

•  Me yọ lẹrhẹ ihworho zẹ nẹ ẹkwotọre aye?

•  Bọgo yẹ ihworho ri zẹ nẹ ẹkwotọre aye ina mẹrẹn ifiẹrorhọ?

•  Baibol na ọnọ sabu ha userhumu rẹn ihworho ri zẹ nẹ ẹkwotọre aye inyenana?

 Me yọ lẹrhẹ ihworho zẹ nẹ ẹkwotọre aye?

 Ihworho ra zẹ nẹ Ukraine, e ruẹ omaran fọkiẹ uvweri ri Russia i haso ẹkwotọre na. Ọrẹn i Baibol na ọ dabu dje fiotọre oborẹ ọ vi lẹrhẹ ihworho zẹ nẹ ẹkwotọre aye:

•   Usun ituakpọ a ji sabu yẹ emọ ituakpọ oborẹ aye i guọlọre-e. Eri ha omẹgbanhon usun a ha omẹgbanhon aye sehiẹn ihworhọ.—Ecclesiastes 4:1; 8:9.

•   Echu ro rhiẹ Idẹbolo, ro rhiẹ ‘ọro sun akpọ na,’ ọ hobọte emọ ituakpọ izede ọvwiavwia te erhirhiẹ ri Baibol na ọ ta: “ọsoso akpọ na, ọ ha omẹgbanhon ọrẹ ọvwọkon na.” —John 14:30; 1 John 5:19.

•   Gbobọhiẹn ebẹnbẹn rọ laha emọ ituakpọ ikpe uzusionrin buenbun rhe ne na, ọwan e nyerẹn uvuẹn ọke ri Baibol na ọ mẹraro kpahen taghene: “Uvuẹn ẹdẹ ri koba na ọke egbogbanhon ra bẹn enyerẹn ine rhirhiẹ ye.” (2 Timothy 3:1) Habaye, ẹdẹ oba na ọnọ vuọn rhẹ ivweri, oghwọghọ kpregede, emaren ọnọ kanren, ọrhẹ emiamo. Enana ekwakwa ra lẹrhẹ ihworho zẹ nẹ oghwa.—Luke 21:10, 11.

 Bọgo yẹ ihworho ri zẹ nẹ ẹkwotọre aye ina mẹrẹn ifiẹrorhọ?

 Baibol na ọ tare taghene Ọmemama ọwan, Jehova, b Osolobrugwẹ ro vwo ẹguọlọ kpahen ihworho ri zẹ nẹ ẹkwotọre aye, ọ jeghwai dje aruẹdọn phia rẹn aye. (Deuteronomy 10:18) O veri taghene ọnọ ha ebẹnbẹn ihworho ri zẹ nẹ ẹkwotọre aye toba nyoma usun ọnẹyen, re se Uvie Osolobrugwẹ, usun ọnana yọ nọ ha usun emọ ituakpọ toba. (Daniel 2:44; Matthew 6:10) Nyoma Uvie yi, Jehova ono tiẹ Echu ro rhiẹ Idẹbolọ na nie. (Romans 16:20) Uvie ọrana ono rhiẹ usun akpọ ephian, ro no tiẹ oghalẹ rọ ha uvwre ẹkwotọre sansan nie. Emọ ituakpọ ni ne rhiẹ ekrun owu ri kugbe uvuẹn ọsoso akpọ na. Orho vwo ọrẹ ọnọ zẹ jẹ oghwa ye vwo-o, nime i Baibol na o veri: “Owuowọnwan ono siyẹ obotọre orhan ọrẹ i vine ọrhẹ i fig ọnẹyen, orho vwo ọrẹ ọnọ djofẹn mwu aye-e, nime ọnana ẹmro i Jehova ro sun emakashe na ọ tare.” —Micah 4:4.

 Uvie Osolobrugwẹ ọvo yọ nọ sabu ha ebẹnbẹn ihworho ra zẹ nẹ ẹkwotọre aye, re rhiẹromẹrẹn inyenana toba. Jehova ọnọ ha Uvie yi tiẹ oborẹ ọ lẹrhẹ ihworho zẹ nẹ ẹkwotọre aye nie. Roro kpahen idje ezẹko:

•   Uvweri. “[Jehova] ọnọ ha uvweri toba.” (Psalm 46:9) Ne rhe oborẹ Osolobrugwẹ ono ruie lele, se urhomu-ẹmro na “Peace on Earth—How Will It Come?”

•   Osehiẹn ọrhẹ ozighi. “[Jehova] ono simi aye nẹ abọ osehiẹn ọrhẹ ozighi.” (Psalm 72:14) Na mẹrẹn iyẹnrẹn kpahen oborẹ ihworho ine ru wẹnẹ nẹ uruemru ro gbereri aye ọke jijiri ne, se ufi urhomu-ẹmro na “Breaking the Cycle of Hatred.”

•   Ogbere. “[Jehova] ono simi ivwiegbere ra nekpẹn userhumu.” (Psalm 72:12) Ne rhe oborẹ i Jehova ono kpomavi rẹn oborẹ ọ suẹ ogbere, se urhomu-ẹmro na “Is a Fair Economic System Possible?”

•   Emaren ọnọ kanren. “Emaren no no gbephe uvuẹn akpọ na.” (Psalm 72:16) Na mẹrẹn oborẹ i Jehova ono ruie lele nẹ orhọmo o jo rhirhiẹ ye ghwomaran, se urhomu-ẹmro na, “A World Without Hunger?”

 Baibol na ọnọ sabu ha userhumu rẹn ihworho ri zẹ nẹ ẹkwotọre aye inyenana?

 Ee. Gbobọhiẹn ifiẹrorhọ rọ sa obaro na ri Baibol na ọ ha rẹn ihworho ri zẹ nẹ ekwotọre aye, Baibol na ọnọ ji sabu ha userhumu rẹn aye nyerẹn ghele ebẹnbẹn aye e rhiẹromẹrẹn ekete ọke ọ havwọ na.

 Uruemru-urhi Baibol: “Are i vwe brudu kpahen emru owuorowu-u, ọrẹn, uvuẹn i kemru kemru ọrẹ ẹrhomo kugbe orẹ ọrhẹ ekpẹmẹ, are i ta edamẹ are harẹn Osolobrugwẹ; ọke ọrana, ufuoma ọrẹ Osolobrugwẹ rọ ghwẹ ọmẹrẹnvwrurhe ephian, nọ nọ sẹrorẹ ọmudu ọrhẹ oghwa iroro are.”—Philippians 4:6, 7.

 Oborẹ o Mevirhọ: Rẹ Ọsolobrugwẹ nọ yọ ẹhẹn ọrhẹ ọmudu ro totọre uvuẹn erhirhiẹ ephian wu mẹrẹn oma rhọ. Se urhomu-ẹmro na “Philippians 4:6, 7—‘Do Not Be Anxious About Anything.’”