Orho riotọre, ihworho ri bun te five billion ye fiẹrorhọ taghene ine ni ibọru ọrẹ FIFA World Cup ra na fa nẹ November 20 fiẹ December 18, 2022. Ihworho buebun e nie taghene aruẹ iruẹn ọnana, ọnọ sabu kuẹ ihworho re nie kugbe, yanghene ru vrẹn omaran dede.

•   “Iruẹn o vwo omẹgbanhon rọ nọ wẹnẹ akpọ na. Ọ lẹrhẹ ihworho kpare idjaghwẹ. O ji kuẹ ihworho kugbe izede oghẹnrensan.”—Nelson Mandela, ro suẹn ẹkwotọre i South Africa bi.

•   Ibọru ẹfa . . . o kuẹ ihworho ri nẹ ekete sansan rhe kugbe, ji yẹ aye aghọghọ, ẹguọlọ ọrhẹ ifiẹrorhọ taghene aye ina sabu ru kugbe.”—Gianni Infantino, president of FIFA. a

 World Cup na yanghene iruẹn ọrọrọ, ọnọ ghini sabu kuẹ ihworho kugbe? Ifiẹrorhọ ọ havwiẹ taghene ene vwo ufuoma ọrhẹ okugbe?

 Orhiẹ ukẹro iruẹn ọvo yẹ ihworho buebun i ha ni World Cup ẹgbukpe ọnana-a. Ọ lẹrhẹ ihworho frẹfro kpahen ẹmro jerẹ ugbomọphẹ ituakpọ, usun oseghe, ọrhẹ ẹkwotọre rọ mai rhomu.

 Udabọ ọrana, ihworho buebun e ji nie taghene iruẹn rẹ ẹkwotọre buebun e kwomakugbe ruẹ jerẹ World Cup na ọ merhoma san. Ọrẹn, ọrẹ omemwurhọ, aruẹ iruẹn enana i vwa sabu yẹ ituakpọ okugbe rọ nọ tọ-ọ. Ukpomaran, iruemru ọrhẹ irueruo rẹ ihworho e djephia ọ hobọtua oborẹ i Baibol na o seri “ẹdẹ ri koba na.”—2 Timothy 3:1-5.

 Baibol na ọ ta kpahen oborẹ ọnọ sabu rhua okugbe rhiẹ akpọ na. O veri taghene ihworho ephian uvuẹn otọrakpọ na ine vwo okugbe, otọre “Uvie Osolobrugwẹ” rọ ha obẹ odjuwu.—Luke 4:43; Matthew 6:10.

 Jesu ro rhiẹ Orodje Uvie ọrana, ono ruie neneyo ọsoso otọrakpọ na, no vwo ufuoma. Baibol na ọrhọ ta:

•   “Evwata na ine buon omamọ, ufuoma no no gbephe.”—Psalm 72:7.

•   “Ono simi ivwiegbere ra nekpẹn userhumu . . . Ono simi aye nẹ abọ osehiẹn ọrhẹ ozighi.”—Psalm 72:12, 14.

 Inyenana dede, iyono i Jesu ọ lẹrhẹ iduduru ihworho uvuẹn ẹkwotọre ri te 239 vwo okugbe ne. Aye i sabu kpariroro vrẹn utuoma ne. Wu rha guọlọ yono riarorhọ, se ifi urhomu-ẹmro na, “Breaking the Cycle of Hatred.”