Ẹguọlọ rẹ Iseri Jehova i vwo kpahen Osolobrugwẹ ọrhẹ ereva aye, yo mwu aye ghwoghwo iyẹnrẹn esiri i Baibol na rẹn ihworho ephian rhẹ omamerhomẹ tobọ te ihworho ri tare bi taghene “mia guọlọ kerhọ are-e.” (Matthew 22:​37-​39) Ẹguọlọ rẹ ame i vwo kpahen Osolobrugwẹ yo mwu ame huvwele akama ọmọyen ra na “dabu se oseri.” (Acts 10:42; 1 John 5:3) Nẹ ame i sabu ruẹ ọnana, ame ne ghwoghwo rẹn ihworho ọgbọ buebun jerẹ oborẹ emẹraro Osolobrugwẹ ọke ahwanren i ruru. (Jeremiah 25:4) Fọkiẹ ẹguọlọ rẹ ame i vwo kpahen ereva ame, ame na damoma ghwoghwo rẹn ihworho ephian tobọ te eri vwa guọlọ kerhọ ọke ọrukaro “iyẹnrẹn esiri Uvie na” ro simi arhọ.​—Matthew 24:14.

 Ọgbọ buebun, ame a mẹrẹn ihworho ra kerhọ aghwoghwo ame uvuẹn eghwa rẹ ame a vwa ihworho ri vwa guọlọ kerhọ bi. Fọkiẹ iroro esa enana:

•   Ihworho a kwa.

•   Awọrọ ri ha uvuẹn oghwa na a kerhọ aghwoghwo ame.

•   Ihworho e wene. Ekwakwa ra phia uvuẹn akpọ na yanghene oborẹ ihworho e rhiẹromẹrẹn, ọ sabu lẹrhẹ aye “guọlọ yono kpahen Osolobrugwẹ” ji vwo omamerhomẹ kpahen iyẹnrẹn i Baibol na. (Matthew 5:3) Era tobọ kparahasuẹ iyẹnrẹn esiri i Baibol na ina sabu wene ẹhẹn aye jerẹ oborẹ ọnyikọ Paul o ruru.​—1 Timothy 1:​13.

 Udabọ ọrana, ame i vwa gba ihworho nẹ aye i kerhọ iyẹnrẹn esiri i Baibol na-a. (1 Peter 3:​15) O mwurun ame ẹro taghene owuowọnwan yo no vi brorhiẹn omobọ kpahen ẹmro ro sekpahen ogame.​—Deuteronomy 30:​19, 20.