Iseri Jehova ri te iduduru buebun ọrhẹ ihworho ri vwo omamerhomẹ kpahen i Baibol na ina vwoma i Tuesday, April 7, 2020, fọkiẹ irueruo rọ mai ghanren uvuẹn ẹgbukpe ọnana, nọyẹ Ẹkarorhọ Uhwu i Jesu. Ọrẹn uvuẹn ẹgbukpe ọnana, fọkiẹ emiamo akpọ ephian re se COVID-19, irueruo na ono rhiẹ ọrẹ oghẹnrensan. Buebun uvuẹn akpọ na ina vwoma nyoma ividio.

Fọkiẹ emiamo re se coronavirus na, omẹgbanhon usun uvuẹn ẹkwotọre buebun i fioba rhẹ irueruo rẹ ihworho buebun e koko uvuẹn ekete owu. Fọkiẹ ọnana, ikoko buebun ri ha uvuẹn ẹkwotọre sansan a ha ividio ruẹ uyono ukoko kọkprughwre kọkprughwre. Ikoko enana ina jeghwai ha ividio ruẹ Ẹkarorhọ Uhwu i Jesu. Ọrẹn harẹn ihworho ephian, ene fiẹ ẹkwaphiẹrhotọre re ru rhotọre ne rhẹ ividio uvuẹn jw.org.

Ihworho ri vrẹn iduduru 20 yi ruẹ Ẹkarorhọ Uhwu i Jesu ẹgbukpe ro riẹri na. E fiẹrorhọ taghene iduduru ihworho buebun ri ha akpọ na ine ruẹ Ẹkarorhọ Uhwu i Jesu na nyoma ividio, ifonu yanghene aye ine ni ọrẹ ru rhotọre uvuẹn jw.org.

Uvuẹn ẹkwotọre buebun, emiamọ na o kpe ihworho buebun ne. Nẹ imizu i sabu vwo omefuon, a guọlọre taghene a nyalele ọkpọvi oborẹ ene ru kẹnoma rẹn emiamo na bọmọke emiamo na ono nẹ otọre. Udabọ ọrana, ọwan i hẹroso i Jehova jeghwai vwo omwemẹ ra na nyalele akama i Jesu taghene “are i rhe ruẹ ọnana ha karorhọ mẹ.”—Luke 22:19.