Ogiribo ọrhẹ ukude ọduado ọ suẹ akpenyerẹn ọgbogbanhon uvuẹn Democratic Republic of the Congo, uvuẹn central Africa. Oghọn Ukoko ọrẹ Iseri Jehova rọ ha Congo (Kinshasa) ọ nẹ iyẹnrẹn taghene ukude na ọ họbọte imizu buebun. Ọrẹ omemwurhọ, uvuẹn ekete esiri usun ẹkwotọre na re se Kinshasa, omizu ọwan owu o hwuru fọkiẹ ukude na.

Ọnana iyẹnrẹn ro nẹ Oghọn ukoko ọrẹ Congo (Kinshasa) rhe:

• Uvuẹn obọrẹ ọren na o se gbe, obọrhe ọrẹ Kasai, aphẹrẹ ọgbogbanhon ọrhẹ oso ọduado ọ ghwọghọ eghwa imizu awan erhan.

• Ukude na o kuẹ Aghwẹlẹ Uvie rọ ha obọrẹ ọren na o se gbe, obohwẹre ọrẹ Sud-Ubangi. Ikoko esa ri vwo ighwoghwẹmro ri te 69 ya ha Aghwẹlẹ Uvie na ruiruo. Ukude na ọ jeghwai hobọte ekrun ri te 22 uvuẹn okogho ọrana. Oghọn ukoko ọ ha ọkobaro oghẹnrensan ọrhẹ ọkpako ukoko ọrọrọ mwu nẹ aye ha userhumu ugboma ọrhẹ ọrẹ ẹhẹn rẹn imizu rẹ ukude na ọ hobọte.

• Uvuẹn okogho ọrẹ Tshopo, imizu re rhirhiẹ kẹrẹ urhie Congo i kwa nẹ eghwa aye rhirhiẹ. Habaye, ukude na o ku Aghwẹlẹ Uvie owu uvuẹn okogho na.

• Ikoko ri ha ekete esiri usun na re se Kinshasa, i nẹ iyẹnrẹn taghene ekrun ri te 80 yẹ ukude na ọ hobọte ne.

Rẹ ukude na o ruẹ ekete ephian yanghan yanghan rọ nọ sabu suẹ emiamo na, oghọn ukoko nọ ha userhumu rẹn ighwoghwẹmro na oborẹ aye ine ru hẹrote oma aye.

Udabọ erhirhiẹ ọgbogbanhon ọnana, imizu a ha userhumu rẹn owuowọnwan izede ọrẹ ugboma jerẹ emaren ọrhẹ ewun. Umẹ Rọ Ha Userhumu Phia Ọke Oghwọghọ Kpregede rẹ oghọn ukoko ọ ha mwu ọ ji ha userhumu phia.

Ame i rheri taghene ẹrhomo ame, ọrhẹ ekwakwa ugboma kugbe erẹ ẹhẹn rẹ ukoko i Jehova ọ ha phia, ọnọ ha ‘urhebro rẹn ọsoso ihworho re mwuomarhọ’ uvuẹn ẹdẹ egbogbanhon enana.—Isaiah 61:1, 2.