Uvuẹn March 23, 2020, uvuẹn ẹkwotọre i Russia’s re se Khabarovsk, elọkpa re se Federal Security Services (FSB) i kpare oghwa omizu re se Igor Avramenko yanghan, ẹdọke erhan ọke emiamọ udu o kpe omizu na hin. Elọkpa na i ha ọbe re kwenu rẹn aye, ra ya odẹ Omizu Avramenko rhọ nẹ aye guọlọ oghwa ye, aye ni kpare ikọmputa, ikamẹra ọrhẹ ekwakwa eghoghanren erọrọ rẹ aniẹ ro hwu jovwo re se Yelena o vwori.

Uvuẹn ọtonrhọ ẹdẹ ọrana, elọkpa i riẹ ekete Omizu ọmase Avramenko o ruẹ iruo, nẹ aye sun rie riẹ oghwa ye, ya vwa olori olokpa re se Stanislav Grebenkin rọ hẹriẹ nọ guọlọ oghwa ye. Omizu Ọmase Avramenko nọ ta rẹn Mr. Grebenkin taghene esa ye o hwu ne. Olọkpa o rheri, ọrẹn nọ tare taghene e kwenu rẹn aye nẹ aye guọlọ oghwa ye bọmọke aye i ki rhe kpahen uhwu omizu Ọhwarhare Avramenko.

Olori olọkpa na nọ ta rẹn Omizu ọmase Avramenko taghene elọkpa na i shẹghẹ oghwa na-a, ọrẹn nọ tare taghene o fori nẹ aye guọlọ oghwa neneyo “a sabu fioba rhẹ ẹzọn na jeghwai sẹrorẹ iyẹnrẹn rhẹ ekete [FSB] a sẹrorẹ iyẹnrẹn aye rhọ.” Ọrẹn, aye ni shẹghẹre jeghwai yanghẹn oghwa na.

Uvuẹn okogho Khabarovsk, a mọrọn ẹzon haso Iseri awan ikpe. Dedevwo omẹgbanhon usun na a damoma aye ina ghwọghọ esegburhomẹmro imizu ri ha uvuẹn Russia, ame i rheri taghene “omẹgbanhon ame ọrẹ ana sẹrorẹ erhirhiẹ ufuoma jeghwai hẹroso” Ọsẹ ọwan ẹguọlọ ro rhiẹ Jehova.—Isaiah 30:15.