Uvuẹn January 1, 2020, oghọn ukoko rọ ha Britain nọ kwariẹ ekete ọkpokpọ rọ kerẹ Chelmsford, Essex. Uvuẹn ọtonrhọ March 2020, ọsoso imizu ri homakpahontọre rẹn owian oghọn ukoko ni ne ye rhirhiẹ, jeghwai wian uvuẹn ekete ọkpokpọ ọnana.

Oghọn ukoko i Britain ọ ha ekete re se Mill Hill, London bi, a vwẹ ẹgbukpe 1959. Rẹ owian aghwoghwo na ọ riarorhọ jeghwai gbanhanrhọ, oghọn ukoko na no kerabọ ekwakwa owian aye lele ekete sansan. Ọke oru, oghọn ọnana nọ jeghwai rhiẹ esiri ekete re fomu ẹbe, ọ sabu fomu ẹbe buebun ra na sabu ghalẹ rẹn akpọ na. Ọke imashini na o wian ewian ẹbe efomu emrẹ ẹgbukpe ri vrẹn 92 hin, uvuẹn i March 2018, arha ha ye ruiruo ghwomara-an, na rhẹ riẹ. *

Ẹgbukpe isionrin ya ha bọn oghọn ukoko ọkpokpọ rọ ha Britain na. A ha ena ebanbọn eghọn ukoko ephian bọn oghọn ukoko ọnana, ọnana nọ ha userhumu rẹn imizu bọn omamọ eghwa jeghwai sẹrorẹ igho. A bọn eghwa eva ra ha fomu ẹbe, ọfisi sansan, ọrhẹ eghwa erhan rẹ ihworho ri te 400 ine rhirhiẹ. A bọn oghwa ọduado owu ra na ha ruẹ ekete ihworho e koko, ra riẹ emaren, ọrhẹ ekete re ruẹ irueruo sansan.

Uvuẹn ọke ọnana, oghọn ukoko i Britain nọ hẹrote owian aghwoghwo ẹkwotọre sansan jerẹ Falkland Islands, Guernsey, Ireland, ọrhẹ Isle of Man, Jersey, ọrhẹ Malta. Oghọn ọkpokpọ na ọnọ fomu ekwakwa ikpekporo, ividio ọrhẹ ekwakwa itanẹti phia. Habaye, oghọn ukoko na ọ hẹrote ewian ikoko ri te 1,800, ri vwo ighwoghwẹmro ri vrẹn 150,000.

E ruẹ ẹkwaphiẹrhotọre ra na sabu kiẹn Oghọn Ukoko ọkpokpọ na nẹ April 6, 2020. Ihworho ra nya ye kien ina sabu riamerhen ekwakwa ifoto jerẹ ikuegbe i Baibol uvuẹn Britain ọrhẹ Ireland, ọrhẹ ewian oghọn ukoko na o ruẹ uvuẹn ukoko i Jehova.

Omizu Stephen Hardy, ro rhiẹ owuọwan usuẹn Umẹ Oghọn Ukoko i Britain, o fiomarhọ owian na nẹ ọtonrhọ rhe. Ọ hunute iroro ihworho buebun izede omana: “Jehova ọ ha ebrurhọ rẹn omẹhakpahontọre iwionwian buebun ri nẹ ẹkwotọre ame ọrhẹ ihworho ri nẹ ẹkwotọre erọrọ rhe. Oborẹ ọ nẹ erhumie rhe ọ vrẹn oborẹ ame i fiẹrorhọ, ame i kpẹmẹ i Jehova ọrẹ kemru kemru.”—Ephesians 3:20.