Vwana yanghene obaro na, emọ ina sabu dẹrughwaroghwu oborẹ ọnọ lẹrhẹ aye ti rierhumu yanghene je ru riaro. Marhẹ wu ne ru sa aye erhumu?

•  Oborẹ o fori ne wu rhe

•  Oborẹ wu na sabu ru

 O vwo ọke re vwe ruẹ riaro. Baibol na ọ tare taghene “ọwan ephian e ruẹ sọ ọgbọ buebun.” (James 3:2) Emọ e ji ruẹ sọ. Ọrẹn, ọnana ọnọ sabu ha userhumu rẹn aye yono oborẹ aye ine ru fi ebẹnbẹn kparobọ. E vwe vwiẹ emọ rhẹ uruemru ọnana-a, ọrẹn, aye ina sabu yonie. Laura ro rhiẹ izu, nọ tare: “Mẹmẹ rhẹ esa mẹ i mẹrẹnvwrurhe taghene o fori na ha uphẹn rẹn emọ na rhe oborẹ aye ine ruo, orhianẹ aye i ru sọ, ukperẹ aye ina ghwai kpariroro vrẹn yen. Aye ina sabu yono oborẹ aye ine ru vwo edirin, ekwakwa i rha phia izede aye i vwe roro rhọ.”

 Emọ buebun e rhe oborẹ aye ine ruo orhianẹ aye i vwe ruẹ riaro-o. Emọ ezẹko i vwe yono nẹ orusọ aye-e, fọkime eri vwiẹrẹ aye i vwa ta rẹn aye taghene aye e ruẹ oborẹ ọsọre-e. Jerẹ udje, orhianẹ ọmọ ọ vrẹn ọdamuni obẹ isukuru-u, emiemọ ezẹko ne kperẹ oyono na. Yanghene orhianẹ ọmọ owu o vwo ẹghwọ rhẹ ugbehian yen, emiemọ ezẹko ne kperẹ ugbehian na.

 Omarana, marhẹ emọ ine ru yono nẹ orusọ aye jeghwai rhe oborẹ aye ine ruo, ọrhọ tobọ rhianẹ eri vwiẹrẹ aye i vwa ta rẹn aye taghene aye i ru sọ-ọ?

•   Yono emọ taghene o vwo oborẹ o nerhumu idjaghwẹ aye i kparare.

   Baibol na ọrhọ ta: “Oborẹ ohworho ọ wọre, ọyẹ ono vuon.”—Galatians 6:7.

   O vwo oborẹ o nerhumu idjaghwẹ ọwan i kparare sa. Emru ọnọ va obọ orhianẹ wu ghwọghọ emru fughwẹ. O vwo oborẹ o nerhumu orusọ ọwan sa. O fori nẹ emọ i rhe oborẹ ọnọ phia, orhianẹ aye i kpare idjaghwẹ ri sọre, o fori nẹ aye i rhe oborẹ a guọlọ mie aye uvuẹn erhirhiẹ ọrana. Omarana, wu vwe kperẹ awọrọ fọkiẹ orusọ emọ-ọ. Ukpomaran, jenẹ aye i rhe oborẹ ono nerhumu oborẹ aye i ruru na rhe, ruie no serhọ rhẹ ẹgbukpe aye i havwọ. O fori nẹ ọmọ na ọ mẹrẹn oborẹ o ru sọ na vwrurhe, jeghwai mẹrẹn oborẹ o nerhumu idjaghwẹ esọsọ ye rhe.

•   Ha userhumu rẹn emọ rhe oborẹ aye ina sabu ru.

   Uruemru-urhi Baibol: “Ọvwata ọnọ sabu se ọgbọ irhiruẹ, ọnọ ji rharhumu vẹnrẹn.”—Proverbs 24:16.

   Evwan ọ vwọ merhen ọwan orhianẹ e ru sọ-ọ, ọrẹn, o vwo oborẹ ana sabu ru kpahiẹn. Ha userhumu rẹn emọ rhe oborẹ aye ina sabu ru, ukperẹ ẹhẹn aye ono seriotọre uvuẹn erhirhiẹ na. Jerẹ udje, orhianẹ ọmọ ọ vrẹn ọdamuni obẹ isukuru-u, ha userhumu riẹn rhe oborẹ ono ruo uvuẹn erhirhiẹ ọrana, nyoma ọnọ dabu fiomarhọ uyono jeghwai brorhiẹn ro no ru riarorhọ ọke ọrọrọ. (Proverbs 20:4) Ọmọ ọgbọtọ orho vwo ẹghwọ rhẹ ugbehian yen, ha userhumu riẹn rhe idjaghwẹ rọ nọ kpare ha kwaphiẹ ẹghwọ na rhọ, o toro ohworho ro ru sọ usuẹn aye awanva na-a.—Romans 12:18; 2 Timothy 2:24.

•   Yono ọmọ no vwo uruemru dẹndẹn.

   Uruemru-urhi Baibol: “Mia ta rẹn kohworho kohworho rọ ha uvwre are taghene are i vwe ni oma are gegerege vrẹn oborẹ o fori-i.”—Romans 12:3.

   Wa rha ta rẹn ọmọ taghene o ruẹ “rhomẹ” ghwẹ awọrọ, o rhiẹ oborẹ ọgbare-e, nime wu vwa ha userhumu riẹn izede ọrana-a. Habaye, emọ re ruẹ riaro, orhiẹ ọke ephian yẹ aye e fiẹkparobọ obẹ isukuru-u. Emọ ezẹko ri tẹn ona iruẹn ezẹko, orhiẹ ọke ephian yẹ aye e fiẹkparobọ-ọ. Emọ ra ha ukẹro ro serhọ ovwan ni oma aye, i rhe oborẹ aye ine ruo orhianẹ aye i ru sọ.

   Baibol na ọ tare taghene ebẹnbẹn a lẹrhẹ ọwan gbanhanrhọ, ọ ji lẹrhẹ ọwan vwo erhionrin. (James 1:2-4) Omarana, dedevwo orusọ ọrhẹ egbanrhọ a lẹrhẹ ẹhẹn ọwan seriotọre, wu na sabu ha userhumu rẹn emọ rhe oborẹ aye ina hẹrote erhirhiẹ na lele.

   Erhe yono emọ oborẹ e ruẹ emru lele, jerẹ oborẹ a dabu yono kpahen emru, ọ ha ọke ọrhẹ omẹdamu. Ọrẹn, aye ina mẹrẹn erere ọke aye a ghwanran ne. “Iphuphẹn ri rhe oborẹ aye ine ruo ọke ebẹnbẹn, i vwe kiki se rhẹ erhirhiẹ imwofẹ-ẹn,” omaran ọbe na Letting Go With Love and Confidence, ọ tare. “Aye e ruẹ riaro uvuẹn erhirhiẹ ekpokpọ ọrhẹ oborẹ aye i vwe fiẹrorhọ.” Itiọrurhomẹmro, ọke ephian ya mẹrẹn erere erhe fi erhirhiẹ ebẹnbẹn kparobọ, a ji mẹriẹn erhe te omirẹghwa ne.

 Urhebro: Dje udje na. Wu rha karorhọ oborẹ wu ruru ọke wa dẹrughwaroghwu erhirhiẹ ebẹnbẹn, ọnọ ha userhumu wẹn rhe oborẹ wu ne yono emọ lele, aye i rha dẹrughwaroghwu aruẹ erhirhiẹ ọrana.