Ẹjo, a ghwọghọ otọrakpọ na-a, a ji ha erhanren torhẹ otọrakpọ na yanghene ha ọrọrọ wenie-e. Baibol na o yonorin taghene Osolobrugwẹ ọ ma otọrakpọ na ne rhirhiẹ ye bẹmẹdẹ.

• “Evwata na ina ha otọrakpọ na riuku, aye ine nyerẹn uvuien bẹmẹdẹ.”—Psalm 37:29.

• “[Osolobrugwẹ] ọ ha otọrakpọ na vi rhẹ erhirhiẹ ye, e ghwie yi nẹ esirie bẹmẹdẹ-ẹ.”—Psalm 104:5.

• “Akpọ na ono rhirhiẹ ye bẹmẹdẹ.”—Ecclesiastes 1:4.

• “Ohworho rọ ma otọrakpọ, ọye yọ hariẹ vi, . . . ọ ma yen fughwẹ-ẹ, ọrẹn, ọ mariẹn ne rhirhiẹ ye.”—Isaiah 45:18.

Osolobrugwẹ ọ ha uphẹn rẹn ituakpọ neneyo aye i ha uvweri ọrhẹ ekwakwa erọrọ ghwọghọ otọrakpọ na phẹlẹphẹlẹ-ẹ. Ukpomaran, ọnọ “ghwọghọ era ghwọghọ otọrakpọ na.” (Revelation 11:18) Marhẹ ono ruẹ ọnana lele?

Osolobrugwẹ ọnọ ha Uvie ọgbagba ọnẹyen rọ ha obẹ odjuwu wene igọmẹti akpọ na, ri vwa sabu sẹrorẹ otọrakpọ na. (Daniel 2:44; Matthew 6:9, 10) Ọmọ Osolobrugwẹ ro rhiẹ Jesu Kristi yo no suẹn Uvie ọrana. (Isaiah 9:6, 7) Ọke i Jesu ọ ha otọrakpọ na, ọ nyoma igbevwunu dobọ ekwakwa ri na sabu ghwọghọ otọrakpọ na ji. (Mark 4:35-41) Ri Jesu o rhiẹ Orodje Uvie Osolobrugwẹ na, ọnọ ha omẹgbanhon ọnẹyen suẹn otọrakpọ na ọrhẹ ekwakwa ri ha uvuien. Ọnọ rharhumu ruẹ ekwakwa ri ha otọrakpọ na kpokpọ, aye ni na họhọ eri ha uvuẹn ogba Eden.—Matthew 19:28; Luke 23:43.

Ẹjo. Ihworho buebun i vwo iroro ọsọsọ ọnana fọkiẹ oborẹ ọ ha uvuẹn 2 Peter 3:7, rọ tare: “Idjuwu ọrhẹ akpọ na i havwiẹ vwana ra hẹrhẹ erhanren.” Roro kpahen iroro eghoghanren eva ri lẹrherẹ ọwan vwẹruọ oborẹ ẹmro erana i mevirhọ:

1. Baibol na ọ sabu ha ẹmro na “idjuwu,” “otọrakpọ,” ọrhẹ erhanren dje ekwakwa buebun. Jerẹ udje, Genesis 11:1 nọ tare: “Ọsoso akpọ na na djẹ edjadjẹ owu.” “Akpọ” ra hunute uvuẹn oghwẹmro ọnana o mevirhọ ituakpọ.

2. Oborẹ ọ ha uvuẹn 2 Peter 3:7 o dje oborẹ idjuwu, otọrakpọ ọrhẹ erhanren ra hunute i mevirhọ. Oghwẹmro 5 ọrhẹ 6 ọ ha riẹ dje oborẹ ọ phiare ọke Ukude Ẹdẹ ọrẹ i Noah. Uvuẹn ọke ọrana, a ghwọghọ evwọkon na, ọrẹn a ghwọghọ otọrakpọ na-a. Ukpomaran, Ukude na o tiẹ ihworho re biomu “akpọ” na nie. (Genesis 6:11) Ọ ji ghwọghọ ihworho re suẹn otọrakpọ na ọke ọrana. Omarana, evwọkon na ya ghwọghọre, rhẹ otọrakpọ na-a. Noah ọrhẹ ekrun ọnẹyen a ghwọghọ-ọ, aye i simirhọ, jeghwai rhirhiẹ otọrakpọ ọke Ukude na ọ phia hin.—Genesis 8:15-18.

Jerẹ oborẹ ọ phiare ọke Ukude na, oghwọghọ yanghene “erhanren” ri 2 Peter 3:7 ọ ta kpahen na, ọnọ ghwọghọ evwọkon ephian nie, ukperẹ ono rhiẹ Otọrakpọ na. Osolobrugwẹ no veri taghene ono “vwo idjuwu ekpokpọ ọrhẹ akpọ ọkpokpọ” rẹ ‘evwata ine rhirhiẹ.’ (2 Peter 3:13) “Odjuwu ọkpokpọ” yanghene usun ọkpokpọ ro rhiẹ Uvie Osolobrugwẹ, yo no suẹn “akpọ ọkpokpọ” yanghene evwata na. Uvuẹn otọre usun ọrẹ Uvie ọrana, otọrakpọ na ono rhiẹ paradais.—Revelation 21:1-4.