Jesu o simi ituakpọ ri fuevwan kpahiẹn ọke rọ ha arhọ ye ruẹ otan. (Matthew 20:28) Omarana, Baibol na no se i Jesu “Osimi ọrẹ akpọ na.” (1 John 4:14) Baibol na ọ ji ta: “O vwo usimi nyoma ohworho ọrọrọ rhe-e, nime o vwo odẹ ọrọrọ rọ ha otọre odjuwu ra harẹn ituakpọ rọ nọ sabu rhua usimi rhe-e.”—Acts 4:12.

Jesu ‘ọ rioja uhwu fọkiẹ ihworho ephian’ ri vwo esegburhomẹmro kpahiẹn. (Hebrews 2:9; John 3:16) Ọke oru, “Osolobrugwẹ nọ rhọmeriẹn nẹ uhwu,” Jesu nọ ghwẹrioma riẹ odjuwu jerẹ ohworho ẹhẹn. (Acts 3:15) Obẹ odjuwu, Jesu ono “simi ihworho re bru Osolobrugwẹ sa nyoma yen, fọkime o nyerẹn ọke ephian rọ nọ rẹ fọkiẹ aye.”—Hebrews 7:25.

Mesoriẹ ọwan a guọlọ i Jesu nọ rẹ fọkiẹ ọwan?

Ọwan ephian eruedandan. (Romans 3:23) Ọdandan o gberẹ ughwru rhẹ uvwre ọwan ọrhẹ Osolobrugwẹ, o ji lele fiẹ uhwu. (Romans 6:23) Ọrẹn Jesu “yo meviẹ rẹn” ihworho ri dje esegburhomẹmro phia kpahen izobo otan yen. (1 John 2:1, ekete ra djokarhọ) Jesu ọ rẹ Osolobrugwẹ fọkiẹ aye, ọ ji rẹ ye nọ kpahenrhọ ẹrhomo aye jeghwai harhomu aye fọkiẹ izobo otan ọnẹyen. (Matthew 1:21; Romans 8:34) Osolobrugwẹ ọ kpahanrhọ orẹ i Jesu, fọkime aye i serhọ rhẹ ọhọre Ọnẹyen. Osolobrugwẹ o dje i Jesu rhiẹ otọrakpọ na “nẹ ihworho i vwo esimirhọ nyoma yen.”—John 3:17.

Erhe vwo imwẹro kpahen i Jesu, ọrana ọvo ọnọ sabu lẹrhẹ ọwan vwo esimirhọ?

Ẹjo. Dedevwo ene vi vwo imwẹro kpahen i Jesu na ki sabu vwo esimirhọ, ọrẹn o ji vwo ekwakwa erọrọ re ne ruo. (Acts 16:30, 31) Baibol na ọ tare: “Jerẹ oborẹ ohworho ro vwo mwuẹhẹn orhiẹ orinmi, omaran esegburhomẹmro rọ vwọ wian o ji rhiẹ orinmi.” (James 2:26) Na ki sabu vwo esimirhọ, ene vi:

• Yono kpahen i Jesu ọrhẹ Ọsẹ ye ro rhiẹ i Jehova.—John 17:3.

• Vwo esegburhomẹmro kpahen aye.—John 12:44; 14:1.

• Dje esegburhomẹmro ọwan phia nyoma ra na huvwele irhi aye. (Luke 6:46; 1 John 2:17) Jesu o yonorin taghene rhẹ ihworho ephian ri serie “Ọrovwori” yi ne simirhọ-ọ, ọrẹn ihworho re ruẹ “ọhọre Ọsẹ [ye] rọ ha obẹ odjuwu ọvo.”—Matthew 7:21.

• Rhe dje esegburhomẹmro phia udabọ ebẹnbẹn. Jesu o dje ọrana fiotọre ọke rọ ta: “Ọro vwo edirin ye toba yo no simirhọ.”—Matthew 24:13.