Ẹmro na “erhi” uvuẹn i Baibol na, a hariẹ nẹ ẹmro i Hebrew re se neʹphesh ọrhẹ ẹmro i Greek re se psy·kheʹ. Ẹmro na o mevirhọ “emama ro mwuẹhẹn” uvuẹn edjadjẹ i Hebrew, no rho mevirhọ “oborẹ o nyerẹn” uvuẹn edjadjẹ i Greek.” * Omarana, erhi o mevirhọ ọsoso emama na, rhẹ emru ro nẹ uvuẹn oma na ohworho orho hwu-u. Roro kpahen oborẹ i Baibol na o ru djephia taghene erhi onyakpọ o mevirhọ ohworho na:

• Ọke i Jehova ọ ma Adam ro rhiẹ ọhworhare ọrukaro, Baibol na nọ tare taghene “ọhworhare na no rhiẹ erhi ro nyerẹn.” (Genesis 2:7, King James Version) A yẹ Adam erhi-i, ukpomaran Adam no mo rhiẹ erhi yanghene ohworho ro nyerẹn.

• Baibol na ọ tare taghene erhi ọnọ sabu wian, riamerhen emaren, huvwele irhi, jeghwai ha obọ te orinmi. (Leviticus 5:2; 7:20; 23:30; Deuteronomy 12:20; Romans 13:1) Ohworho ro nyerẹn yọ nọ sabu ruẹ ekwakwa enana.

O vwo erhi ro vwo hwuẹ?

Ẹjo, erhi na o hwuẹ. O vwo eghwẹmro i Baibol buebun ri djephia taghene erhi na o hwuẹ. Enana idje ezẹko:

• “Erhi ro ruẹ ọdandan, ono hwuo.”—Ezekiel 18:4, 20, King James Version.

• Uvuẹn Israel ọke ahwanren, “e kpe erhi” ro ruẹ ọdandan ọghwaghwa. (Exodus 12:15, 19; Leviticus 7:20, 21, 27; 19:8, King James Version) Ohworho na, “ene kpe yi hwu.”—Exodus 31:14, King James Version.

• Ohworho orho hwu, ẹmro ra ha ruiruo uvuẹn eghwẹmro i Baibol ezẹko yẹ “orinmi.” (Leviticus 21:11, ekete ra djokarhọ; Numbers 6:6, ekete ra djokarhọ) Dedevwo erhianrhian i Baibol buebun a ha ẹmro na “orinmi” yanghene “ohworho ro hwuru” ruiruo uvuẹn eghwẹmro erana, uvuẹn edjadjẹ i Hebrew ẹmro na neʹphesh, yanghene “erhi” ya ha ruiruo.

“Erhi’ ọnọ sabu mevirhọ “arho”

Ọkezẹko, Baibol na o ji se “erhi” “arhọ.” Jerẹ udje, Job 33:22 ọ rhian ẹmro i Hebrew re se “erhi” (neʹphesh) rhẹ “arhọ.” Omarana, Baibol na no djephia taghene erhi yanghene arhọ ohworho ọnọ sabu ha erhirhiẹ imwofẹn yanghene va ye obọ.—Exodus 4:19; Judges 9:17; Philippians 2:30.

Ẹmro na “erhi” ra ha ruiruo, ọ ha userhumu rẹn ọwan vwẹruọ eghwẹmro i Baibol ri tare taghene erhi na “o nẹ oma na” yanghene “ọ nyarhẹn.” (Genesis 35:18; King James Version) Ẹmro isẹ ọnana o djephia taghene ohworho na o hwuẹ. Erhianrhian i Baibol ezẹko i rhian ẹmro ọnana rọ ha uvuẹn i Genesis 35:18 omana, “no mwuẹhẹn rọ kẹta.”—Good News Translation; New Jerusalem Bible.

Ekete rẹ uyono erhi ro vwo hwuẹ o nurhe

Ẹga ri vwo imwẹro kpahen erhi ro vwo hwuẹ, i vwo irherhe ọnana nyoma uyono itu i Greek ahwanren, rhẹ uvuẹn i Baibol na yẹ aye a mẹrẹn uyono ọnana-a. Ọbe na Encyclopædia Britannica ọrhọ ta: “Ẹbe i Baibol buebun ri ta kpahen erhi, e fiẹ ovẹnẹ rhẹ erhi ọrhẹ ugboma na-a. Uyono erhi ro vwo hwuẹ rẹ Ilele Kristi i vwo imwẹro kpahen, o nẹ uyono i Greek ahwanren rhe.”

Osolobrugwẹ o kwe na ha uyono ọnẹyen ghwa iyono erẹ akpọ na-a, uyono jerẹ erhi ro vwo hwuẹ. Ukpomaran, Baibol na ọrhọ ha orhetio phia: “Are i jomarhotọre nẹ ohworho owuorowu ọ jọ rhọ ha are ruẹ evrẹn nyoma iyono erẹ akpọ na ọrhẹ iyono ọphiẹrhọ sekpahen irueruo ituakpọ.”—Colossians 2:8.