Me yẹ Omebrurhame?
Ẹkpahenrhọ i Baibol na
Omebrurhame o mevirhọ ọrẹ e dumu ohworho rhẹ uvuẹn ame, jeghwai kpariẹ nẹ uvuien. * Ọnana o dje oborẹ ọsoriẹ e bru i Jesu rhẹ ame uvuẹn urhie ọduado. (Matthew 3:13, 16) Omaran ọ ji havwọ, ọhworhare onyẹ Ethiopia owu ọ tare taghene ono bromarhame ọke ro te “ekete ame ọ havwọ.”—Acts 8:36-40.
Oborẹ omebrurhame o mevirhọ
Baibol na ọ ha omebrurhame dje irueruo orinmi esion. (Romans 6:4; Colossians 2:12) Omebrurhame o mevirhọ ọrẹ ohworho ono tiobọnẹ irueruo ri sọre ro ruẹ bi, jeghwai rhiẹ Olele Kristi rọ homakpahontọre rẹn Osolobrugwẹ ne. Omebrurhame ọrhẹ idjaghwẹ ra kpara e ki bromarhame, ẹkwaphiẹrhotọre Osolobrugwẹ ra lẹrhẹ ohworho vwo ẹhẹn obrorhiẹn rọ fonron, fọkiẹ esegburhomẹmro aye i vwo kpahen izobo otan i Jesu. (1 Peter 3:21) Omarana, Jesu o yono idibo yi taghene aye ine vi bromarhame.—Matthew 28:19, 20.
Omebrurhame o ruẹ ọwan fuan nẹ edandan ephian?
Ẹjo. Baibol na o yonorin taghene nyoma ọbara i Jesu ya na sabu fon nẹ edandan ọwan. (Romans 5:8, 9; 1 John 1:7) Na sabu mẹrẹn erere nẹ izobo otan i Jesu, ohworho ono vi dje esegburhomẹmro kpahen i Jesu, wene akpenyerẹn yen no serhọ rhẹ iyono i Jesu, jeghwai bromarhame.—Acts 2:38; 3:19.
Me yẹ uruemru ra balame ghwẹ emeboban jeghwai mwu odẹ rẹn aye?
Baibol na ọ hobọtua iruemru enana-a. Aye i mevirhọ orẹ rẹ itu ishọshi e ruẹ aye arha guọlọ ‘bru emeboban rhẹ ame,’ nyoma rẹ aye a balame ghwẹ aye, (yanghene rhiẹ ame rhẹ urhomu aye) jeghwai mwu odẹ rẹn aye.
Baibol o yono kpahen uruemru re bru emeboban rhẹ ame?
Ẹjo. Omebrurhame Ilele Kristi o mevirhọ ọrẹ ohworho ro te edje ne ono vwẹruọ oborẹ i Baibol na o yono, ji vwo imwẹro kpahen “iyẹnrẹn esiri Uvie ọrẹ Osolobrugwẹ.” (Acts 8:12) O sekpahen ọrẹ ohworho ono rhon Ẹmro Osolobrugwẹ, haye ruiruo, jeghwai brorhiẹn omobọ ye, ro rhiẹ oborẹ ọmọboban ọnọ jọ sabu ru.—Acts 2:22, 38, 41.
Habaye, Baibol na o djephia taghene Osolobrugwẹ ọ ha ukẹro rọ fonron ni emọ Ilele Kristi, fọkiẹ esegburhomẹmro rẹ eri vwiẹre aye e djephia. (1 Corinthians 7:14) Omebrurhame emeboban o serhọ-ọ, orhianẹ o serhọ bi, manẹ a vwa ta taghene fọkiẹ esegburhomẹmro eri vwiẹre aye yẹ aye ine vwo usimi-i. *
Iroro ri sọre kpahen omebrurhame Ilele Kristi
Iroro rọ sọre: Ra balame ghwẹ ohworho yangene rhiẹ ame rhẹ urhomu ọravwọ, izede ro serhọ re ne bruẹ ohworho rhẹ ame.
Iroro rọ gbare: Omebrurhame ra hunute uvuẹn i Baibol na, o mevirhọ ọrẹ e dumu ohworho rhẹ uvuẹn ame. Jerẹ udje, ọke odibo Philip o bru ọhworhare onyẹ Ethiopia na rhẹ ame, aye i nya “ruẹ uvuẹn ame na” o ki bruie rhẹ ame. Ọke oru aye ni “nẹ uvuẹn ame na rhe.”—Acts 8:36-39. *
Iroro rọ sọre: Baibol na ọ tare taghene emeboban ina sabu bromarhame ọke ihworho ri ha uvuẹn oghwa na e bromarhame. Jerẹ udje, ọ ta kpahen ohworho owu rọ dẹrẹ ekanron uvuẹn Philippi: “Ọye ọrhẹ ọsoso ekrun ọnẹyen ni bromarhame.”—Acts 16:31-34.
Iroro rọ gbare: Iyẹnrẹn kpahen ohworho re fi rhẹ ekanron na o djephia taghene ihworho ri ha uvuẹn oghwa na i vwẹruọ oborẹ “ẹmro i Jehova” o mevirhọ, oma nọ ji ‘merhen aye omamọ.’ (Acts 16:32, 34) Ẹmro enana ni mevirhọ taghene emeboban ri ha uvuẹn oghwa ọhworhare na i sabu bromarhame-e, nime aye e ji vwẹruọ oborẹ ẹmro i Jehova o mevirhọ-ọ.
Iroro rọ sọre: Jesu o yono kpahen omebrurhame emeboban nyoma rọ ta taghene Uvie na ọ ha obọ aye.—Matthew 19:13-15; Mark 10:13-16.
Iroro rọ gbare: Jesu ọ vwọ tẹmro kpahen omebrurhame ọke ọ ta ẹmro erana-a. Ukpomaran, ọ ta taghene ihworho ri na sabu ha Uvie Osolobrugwẹ riuku ina vi họhọ emọvwerhe, aye ine vwo uruemru dẹndẹn jeghwai rhiẹ ihworho ra sabu yono.—Matthew 18:4; Luke 18:16, 17.
^ Udjoghwẹmro 1 Ẹmro i Greek ra rhian rhẹ “omebrurhame” a ha riẹ nẹ ẹmro owu ro mevirhọ “ọrẹ e dumu ohworho rhẹ uvuẹn ame.” Se Theological Dictionary of the New Testament, Volume I, aruọbe 529.
^ Udjoghwẹmro 6 Sekpahen The International Standard Bible Encyclopedia, “o vwo ekete owuorowu rọ ta kpahen omebrurhame emeboban uvuẹn N[ew] T[estament] na-a.” Ọ ji tobọ ta taghene irueruo enana i sọre,” nime aye a ji ta taghene omebrurhame o ghwe edandan ọwan nie.—Volume 1, aruọbe 416-417.
^ Udjoghwẹmro 8 Urhomu-ẹmro na “Baptism (in the Bible),” rọ ha uvuẹn New Catholic Encyclopedia nọ tare: “O fiotọre taghene omebrurhame uvuẹn ishọshi erukaro o sekpahen ọrẹ e dumu ohworho rhẹ uvuẹn ame.”—Volume 2, aruọbe 59.
You May Also Like
ENỌ I BAIBOL NA Ọ KPAHENRHỌ
Ẹga Ephian Owu? Aye Ephian ye Suẹn Ohworho Bru Osolobrugwẹ?
Baibol na ọ hunute iroro eva ri kpahenrhọ onọ na.
ESSENTIAL BIBLE TEACHINGS
Osolobrugwẹ o Kwerhọ Aruẹ Ẹga Ephian?
Ihworho buebun i vwo imwẹro na taghene o toro ẹga wu nyare-en.
