Michael yẹ odẹ re mwu rẹn i Jesu obẹ odjuwu ọ ki rhiẹ otọrakpọ na, ẹga ezẹko e ji se yi “Olori Michael.” * Michael o lele Echu frẹfro ọke i Moses o hwu hin, nọ ji ha userhumu rẹn ọmakashe owu kpare urhomedje Osolobrugwẹ vwe ọmẹraro Daniel. (Daniel 10:13, 21; Jude 9) Odẹ na Michael o mevirhọ “Ọrọmo Yọ Họhọ Osolobrugwẹ?”—Michael ọ nyamwuẹ odẹ ye nyoma rọ chochọn usun Osolobrugwẹ, jeghwai wọnrọn hasuẹ evwreghrẹn Osolobrugwẹ.—Daniel 12:1; Revelation 12:7.

Roro kpahen oborẹ Ọsoriẹ o fo na ta taghene Jesu yẹ olotu emakashe na re se Michael.

• Michael yẹ “olotu emakashe na.” (Jude 9) Odovan na “olotu emakashe” ro ji mevirhọ “olori harẹn emakashe na,” ọ homaphia uvuẹn eghwẹmro eva ọvo uvuẹn i Baibol na. Uvuẹn erhirhiẹ eva na, ẹmro na ọ rionbọrhọ owuọwan owu ọvo, ro djephia taghene ọmakashe owu ọvo yo vwo odovan na. Owu usuẹn eghwẹmro na o djephia taghene ẹrhọmọnuhwu Ọrovwori Jesu, “ono nẹ odjuwu rhe, rhẹ use gorigori ọrhẹ uvwele ọrẹ olotu emakashe.” (1 Thessalonians 4:16) Jesu o vwo “uvwele ọrẹ olotu emakashe,” fọkime ọye yẹ olotu emakashe na re se i Michael.

• Michael o suẹn emakashe ri ha obẹ odjuwu. “Michael ọrhẹ emakashe enẹyen ni lele agbakara na [Echu] wọnrọn.” (Revelation 12:7) Michael o vwo omẹgbanhon usun obẹ odjuwu, nime e serie “owu usuẹn ekakuro” na ọrhẹ “ọmọ orodje ọduado.” (Daniel 10:13, 21; 12:1) Edevan enana i djephia taghene Michael yẹ “olotu ro suẹn emakashe ri ha obẹ odjuwu,” jerẹ oborẹ ọgba irherhe ọrẹ New Testament re se David E. Aune ọ tare.

  Owuọwan ọvo yi Baibol na ọ hunute taghene o vwo omẹgbanhon usun ghwẹ emakashe ri ha obẹ odjuwu. Ọ ji ta kpahen “ọke omẹhaphia Ọrovwori Jesu nẹ odjuwu rhe, rhẹ emakashe enẹyen ri vwo omẹgbanhon uvuẹn erhanren rọ bara gidigidi, rọ nọ ha oja riẹ ihworho.” (2 Thessalonians 1:7, 8; Matthew 16:27) Jesu “o riẹ odjuwu, na ha emakashe na ọrhẹ usun kugbe omẹgbanhon sansan kpahontọre riẹn.” (1 Peter 3:21, 22) Orhianẹ Jesu ọrhẹ Michael ihworho sansan, o dje ọhọ phia rẹ Osolobrugwẹ ono fi aye awanva rhẹ ẹrhẹ olotu emakashe na-a. Ukpomaran, o dje ọhọ phia ra na ta taghene Jesu ọrhẹ Michael ohworho owu ọvo.

• Uvwre “ọke ukpokpogho” re vwe fiẹrorhọ, Michael “ono mevi.” (Daniel 12:1) Ọgbọ buebun, uvuẹn ọbe i Daniel, orodje ọrhọ guọlọ kpare udjoghwẹ oghẹnrensan, na ha ẹmro na “mevi” ruiruo. (Daniel 11:2-4, 21) Jesu Kristi re rhe rhẹ “Ẹmro Osolobrugwẹ,” ọnọ kpare udjoghwẹ oghẹnrensan nime ọye yẹ “Orodje ọrẹ irodje,” ọnọ ghwọghọ ọsoso evwreghrẹn Osolobrugwẹ, jeghwai sẹrorẹ ihworho Osolobrugwẹ. (Revelation 19:11-16) Ono ruẹ ọnana uvwre ọke “ukpokpogho rode ra vwa ji mẹrẹn aruiẹ dẹ nẹ ọke akpọ na ọtonrhọ me te ọke ọnana.”—Matthew 24:21, 42.