“Omẹgbanhon ra djẹ edjadjẹ sansan,” o mevirhọ omẹgbanhon igbevwunu rẹ Ilele Kristi erukaro i vwori, rọ ha userhumu rẹn aye djẹ edjadjẹ sansan, dedevwo aye e yonie vwẹre-e. (Acts 10:46, New International Version) Ihworho ra djẹ edjadjẹ erana a dabu vwẹruọ oborẹ ohworho na ọ ta. (Acts 2:4-8) Omẹgbanhon ra djẹ edjadjẹ sansan, owu usuẹn ẹghẹlẹ ẹhẹn ọfuanfon na rẹ Osolobrugwẹ o tiobọnu rẹn Ilele Kristi erukaro.—Hebrews 2:4; 1 Corinthians 12:4, 30.

•  Bọgọ ọrhẹ ọkiọgo yẹ omẹgbanhon ra djẹ edjadjẹ sansan ọ tonrhọ?

•  Mesoriẹ e tiobọnu omẹgbanhon ra djẹ edjadjẹ sansan?

•  E tiobọnu omẹgbanhon ra djẹ edjadjẹ sansan no rhirhiẹ ye bẹmẹdẹ?

•  Ọkiọgo yẹ omẹgbanhon ra djẹ edjadjẹ sansan o toba?

•  Omẹgbanhon ra djẹ edjadjẹ sansan uvuẹn ọke ọwan na vwo?

•  Marhẹ ene ru vwrurhe Ilele Kristi urhomẹmro?

Igbevwunu ọnana, ọ kiki phia urhiọke ọke Orẹ itu i Jew ọrẹ Pentecost ẹgbukpe 33 C.E uvuẹn i Jerusalem. Idibo i Jesu ri te awan 120 “ne vuọnren rhẹ ẹhẹn ọfuanfon nẹ aye a djẹ edjadjẹ sansan,” ọke aye e koko. (Acts 1:15; 2:1-4) Otu buebun “ri nẹ egbamwa erọrọ rhe” ni kokori, “aye owuowu e rhon ọke aye a djẹ edjadjẹ aye.”—Acts 2:5, 6.

1. No djephia taghene Osolobrugwẹ ọ hobọtua Ilele Kristi. Ọke ahwanren, Osolobrugwẹ o tiobọnu omẹgbanhon igbevwunu no djephia taghene ọ hobọtua ihworho yi, jerẹ oborẹ ọ hobọtua i Moses. (Exodus 4:1-9, 29-31; Numbers 17:10) Omaran ọ ji havwọ sekpahen omẹgbanhon ra djẹ edjadjẹ sansan, ro djephia taghene Osolobrugwẹ ọ hobọtua ukoko Ilele Kristi rọ tonrhọ obọ na. Ọnyikọ Paul nọ yare: “Edjadjẹ o rhiẹ oka rẹn eri vwo esegburhomẹmro-o, ọrẹn harẹn eri vwe vwo esegburhomẹmro.”—1 Corinthians 14:22.

2. Nọ ha userhumu rẹn Ilele Kristi ghwoghwo iyẹnrẹn esiri na fiotọre. Ihworho ri rhon idibo i Jesu uvuẹn ẹdẹ i Pentecost na ni tare: “Ọwan i rhon rẹ aye, ọke aye a ta kpahen ekwakwa igbevwunu Osolobrugwẹ uvuẹn edjadjẹ ọwan.” (Acts 2:11) Habaye, e tiobọnu omẹgbanhon igbevwunu ọnana, nọ lẹrhẹ aye sẹ “oseri ro fiotọre,” jeghwai “ruẹ idibo ihworho uvuẹn egbamwa na ephian,” jerẹ oborẹ i Jesu ọ ta rẹn aye. (Acts 10:42; Matthew 28:19) Ihworho ri te 3,000 ri rhiẹromẹrẹn igbevwunu ọnana, ji kerhọ aghwoghwo inyikọ na ni rhiẹ idibo i Jesu ẹdẹ ọrana.—Acts 2:41.

Ẹjo. Ẹghẹlẹ ẹhẹn ọfuanfon na, tobọ te omẹgbanhon ra djẹ edjadjẹ sansan, ẹkwaphiẹrhotọre ibiọke. Baibol na ọrhọ ta: “Ọrẹn, orhianẹ o vwo ẹghẹlẹ aruẹmẹrẹn, aye ine nie; orhianẹ o vwo ẹghẹlẹ edjadjẹ, aye ine fuen; orhianẹ o vwo ẹghẹlẹ irherhe, ono toba.”—1 Corinthians 13:8.

E tiobọnu eghẹlẹ ẹhẹn ọfuanfon na rẹn Ilele Kristi erọrọ udaro inyiko na, nyoma aye ha obọ kpahen Ilele Kristi enana. (Acts 8:18; 10:44-46) Nọ họhọre taghene eri vwo ẹghẹlẹ omẹgbanhon ọnana nyoma inyikọ na, a haye rẹn awọrọ-ọ. (Acts 8:5-7, 14-17) Ne dje udje yi, ọrọ wian rẹn igọmẹti ọnọ sabu tiobọnu ọbe re kwenu rẹn ohworho ro mwuovwan rọ nọ ghwa imoto, ọrẹn ohworho ọrana o vwo omẹgbanhon ro no ruẹ ẹbe ọrana rẹn awọrọ-ọ. Itiọrurhomẹmro, omẹgbanhon ra djẹ edjadjẹ sansan o toba ọke inyikọ na, ọrhẹ ere tiobọnu omẹgbanhon ọnana riẹn.

Omẹgbanhon igbevwunu ra djẹ edjadjẹ sansan o toba ọke inyikọ na. Omarana, o vwo ohworho owuorowu rọ nọ sabu ta taghene ọye o vwo omẹgbanhon ra djẹ edjadjẹ sansan nyoma omẹgbanhon Osolobrugwẹ uvuẹn ọke ọwan na-a. *

Jesu ọ tare taghene ene vwrurhe idibo yi nyoma ẹguọlọ rọ vabọ omeru rẹ aye ine djephia. (John 13:34, 35) Habaye, ọnyikọ Paul o yonorin taghene ẹguọlọ ọnana ye ne vwrurhe Ilele Kristi urhomẹmro ọke ephian. (1 Corinthians 13:1, 8) O djephia taghene ẹhẹn ọfuanfon Osolobrugwẹ, ọnọ lẹrhẹ Ilele Kristi vwo iruemru ri rhiẹ “omamọ ẹhẹn ọfuanfon na,” uruemru ọrukaro vwọye yẹ ẹguọlọ.—Galatians 5:22, 23.