Osolobrugwẹ ọ ha Ekete Ephian?
Ẹkpahenrhọ i Baibol na
Osolobrugwẹ ọnọ sabu mẹrẹn kemru kemru, jeghwai kpare idjaghwẹ uvuẹn ekete ephian rọ guọlọre. (Proverbs 15:3; Hebrews 4:13) Ọrẹn, Baibol na o yono taghene Osolobrugwẹ ọ ha ekete ephia-an, nọyẹ ọ ha uvuẹn ọsoso ekwakwa ephia-an. Ukpomaran, Baibol na o djerie phia taghene Osolobrugwẹ ohworho, o ji vwo ekete ro rhirhiẹ.
Oborẹ Osolobrugwẹ ọ havwọ: Osolobrugwẹ ohworho ẹhẹn. (John 4:24) Ituakpọ i sabu mẹriẹ-ẹn. (John 1:18) Aruẹmẹrẹn arudo ri ha uvuẹn i Baibol na, i djephia taghene Osolobrugwẹ ọ ha uvuẹn ekete owu. Ọ ta taghene Osolobrugwẹ o rhirhiẹ ekete ephia-an.—Isaiah 6:1, 2; Revelation 4:2, 3, 8.
Ekete Osolobrugwẹ o rhirhiẹ: Osolobrugwẹ o rhirhiẹ ekete ra vwa mẹrẹn, rọ vẹnẹ otọrakpọ na. Osolobrugwẹ o vwo ‘ekete ro rhirhiẹ obẹ idjuwu na.’ (1 Kings 8:30) Baibol na ọ hunute erhirhiẹ rẹ emakashe na “e mevi obaro i Jehova,” * ro djephia taghene Osolobrugwẹ o rhirhiẹ ekete owu.—Job 1:6.
Orhianẹ Osolobrugwẹ ọ ha ekete ephia-an, ọnọ ghini sabu hẹrote mẹ?
Ee. Osolobrugwẹ o vwo ọdamẹ okokodo kpahen owuowọnwan. Dedevwo Osolobrugwẹ o rhirhiẹ obẹ odjuwu, ọ djokarhọ ihworho ra damoma lẹrhẹ oma merhiẹn uvuẹn otọrakpọ na, nọ ji sa aye erhumu. (1 Kings 8:39; 2 Chronicles 16:9) Djokarhọ oborẹ i Jehova o ru dje ẹruete ọnẹyen rẹn idibo yi ra ga ye nẹ ẹhẹn sa:
● Ọke wa rha nẹrhomo: Jehova ọ sabu rhon ẹrhomo ọnọ ogege wu rha ta ye phia.—2 Chronicles 18:31.
Ẹhọn orho seriotọre: “Jehova ọ kẹrẹ ihworho rẹ ẹhẹn aye o seriotọre; o simi ihworho rẹ ẹhẹn aye ọ ghwọghọre.”—Psalms 34:18.
Ọke wu rha guọlọ ọkpọvi: Jehova ọnọ “yọ ọmẹrẹnvwrurhe ọrhẹ ọkpọvi” nyoma Ẹmro ọnẹyen ro rhiẹ i Baibol na.—Psalms 32:8.
Iroro rọ sọre kpahen Osolobrugwẹ rọ ha ekete ephian
Iroro rọ sọre: Osolobrugwẹ ọ ha ekete ephian uvuẹn emama.
Iroro rọ gbare: Osolobrugwẹ o vwo rhirhiẹ otọrakpọ na, yanghene ekete ọrọrọ uvuẹn otọrakpọ na-a. (1 Kings 8:27) Urhomẹmro taghene ikereti na kugbe emama erọrọ “e dje odidi Osolobrugwẹ phia.” (Psalm 19:1) Ọrẹn, Osolobrugwẹ o vwo rhirhiẹ uvuẹn emama enẹye-en, jerẹ oborẹ ọro sin ifoto ọnọ jọ sabu rhirhiẹ uvuẹn ifoto ro sinrin. Ọrẹn, ifoto ọnọ sabu ta rẹn ọwan kpahen ohworho ro sin ifoto na. Omaran ọ ji havwọ, ekwakwa ra ma rhẹ akpọ na a ta rẹn ọwan kpahen ‘iruemru Ọmemama ra vwa mẹrẹn na,’ iruemru jerẹ omẹgbanhon, ẹghwanren, ọrhẹ ẹguọlọ ọnẹyen.—Romans 1:20.
Iroro rọ sọre: Osolobrugwẹ ọnọ vi ha ekete ephian vwẹre nọ ki sabu rhe ekwakwa ephian, ji rhiẹ ọrọ mai gbanhonma.
Iroro rọ gbare: Ẹhẹn ọfuanfon Osolobrugwẹ yẹ omẹgbanhon rẹ Osolobrugwẹ ọ ha ruiruo. Nyoma ẹhẹn ọfuanfon ọnẹyen, Osolobrugwẹ ọnọ sabu mẹrẹn ji ruẹ kemru kemru uvuẹn ekete ephian, ọrhẹ uvuẹn ọke ephian, ọrẹn o nẹ ekete rọ havwọ-ọ.—Psalm 139:7.
Iroro rọ sọre: Psalm 139:8 o djephia taghene Osolobrugwẹ ọ ha ekete ephian nyoma rọ ta: “Mi rhe tobọ riẹ odjuwu, wu na ha avwaye, mi rha tobọ kpa ekpa mẹ rhẹ uvuẹn Usin, nughe! wu na ha avwaye.”
Iroro rọ gbare: Ekete i Baibol ọnana ọ vwọ ta kpahen ekete Osolobrugwẹ ọ havwọ-ọ. Ọnana ijoro isẹ ro yono ọwan taghene o vwo ekete ro tiomanu rẹn Osolobrugwẹ, rọ nọ jọ sabu ha userhumu rẹn ọwa-an.
^ Udjoghwẹmro 3 Jehova yẹ odẹ Osolobrugwẹ jerẹ oborẹ i Baibol na ọ tare.
You May Also Like
IYONO I BAIBOL KIRIGHWO
Osolobrugwẹ ọ Havwiẹ?
Roro kpahen eka ri lẹrheriẹ dje ọhọ phia, taghene o fori ne vwo imwẹro kpahen Osolobrugwẹ.
ENỌ I BAIBOL NA Ọ KPAHENRHỌ
Me yẹ Ẹhẹn Ọfuanfon na?
O vwo oborẹ ọsoriẹ i Baibol na ọ se ẹhẹn ọfuanfon na “abọ” Osolobrugwẹ.
IRUERUO AME
Ta rẹn Oseri Jehova no Bro rhe
Kpahenrhọ onọ ro nẹ i Baibol na rhe, yanghene yono riarorhọ kpahen Iseri Jehova.