Ayọmo yi ne Riẹ Odjuwu?
Ẹkpahenrhọ i Baibol na
Osolobrugwẹ ọ sanọ ibiẹ Ilele Kristi krẹn ri fuevwan kpahiẹn, ra na rhọmọ riẹ odjuwu aye i rhe hwu ne. (1 Peter 1:3, 4) Arha djẹ aye ne, aye ina vi fuevwan ji rhe dje esegburhomẹmro phia, neneyo aye i ja rha kpare uphẹn aye ine riẹ odjuwu na fughwẹ.—Ephesians 5:5; Philippians 3:12-14.
Me yẹ eri ne riẹ odjuwu ine ruo oboran?
Aye ine leli Jesu sun ẹrhẹ irodje ọrhẹ irherẹn ẹgbukpe 1,000. (Revelation 5:9, 10; 20:6) Aye yi ne rhiẹ “idjuwu ekpokpọ” yanghene usun odjuwu, ro no suẹn “akpọ ọkpokpọ” rọ sa obaro na. Ihworho enana ri ne leli Jesu sun na, ina dẹrẹ akpọ na rhiẹ paradais ro rhiẹ oborẹ Osolobrugwẹ o vwo rhẹ ẹhẹn bi.—Isaiah 65:17; 2 Peter 3:13.
Awanmwa ya na rhọmọnuhwu riẹ odjuwu?
Baibol na o djephia taghene awan 144,000 ya na rhọmọnuhwu riẹ odjuwu. (Revelation 7:4) Uvuẹn emena arudo rọ ha uvuẹn Revelation 14:1-3, ọnyikọ John nọ mẹrẹn “Ọmogegede na ro mevi oberun Ugbenu i Zion, awan 144,000 i mevi kẹriẹ.” Uvuẹn emena arudo ọnana, “Ọmogegede na” yi Jesu ra rhọmọnuhwu. (John 1:29; 1 Peter 1:19) “Ugbenu i Zion” o mevirhọ ẹrhẹ ọduado i Jesu ọrhẹ awan 144,000 ri ne lelie sun obẹ odjuwu.—Psalm 2:6; Hebrews 12:22.
Ihworho “re seri ra ji djẹha” ni leli Jesu sun obẹ odjuwu, ye seri “ibiẹ igegede” na. (Revelation 17:14; Luke 12:32) Ọnana o djephia taghene aye i buẹn te idibo i Jesu erọrọ ri ne rhirhiẹ otọrakpọ na-a.—John 10:16.
Iroro rọ sọre kpahen eri ne riẹ odjuwu
Iroro rọ sọre: Ihworho irhorhomu ephian ine riẹ odjuwu.
Iroro rọ gbare: Osolobrugwẹ o vive taghene emamọ ihworho ephian ine rhirhiẹ otọrakpọ na bẹmẹdẹ.—Psalm 37:11, 29, 34.
Jesu nọ tare: “O vwo onyakpọ owuorowu ro riẹ odjuwu ne-e.” (John 3:13) No djephia taghene ihworho irhorhomu ri hwuru ọ ki rhe jerẹ Abraham, Moses, Job, ọrhẹ David e riẹ odjuwu-u. (Acts 2:29, 34) Ukpomaran, aye i vwo ifiẹrorhọ ẹrhọmọnuhwu rhiẹ otọrakpọ na.—Job 14:13-15.
Ẹrhọmọnuhwu riẹ odjuwu yẹ “ẹrhọmọnuhwu ọrukaro na.” (Revelation 20:6) Ọnana o djephia taghene ono vwo ẹrhọmọnuhwu ọrọrọ. Ono rhiẹ uvuẹn otọrakpọ na.
Baibol na o yonorin taghene uvuẹn otọre usun Osolobrugwẹ, “uhwu orho rhirhiẹ ye-e.” (Revelation 21:3, 4) Uvuẹn otọrakpọ na yẹ ive ọnana ono rugba nime e vwe hwuẹ obẹ odjuwu-u.
Iroro rọ sọre: Kohworho kohworho yọ nọ djẹ sẹ ono riẹ odjuwu yanghene rhirhiẹ otọrakpọ na.
Iroro rọ gbare: Osolobrugwẹ yo tiobọnẹ “osa ọrẹ odjuwu na” rẹn Ilele Kristi ri fuevwan, nọyẹ ifiẹrorhọ aye ine riẹ odjuwu. (Philippians 3:14) Rhẹ oborẹ ohworho o vwo ẹguọlọ kpahen yọ nọ lẹrhẹ Osolobrugwẹ djẹ ye ha-a.—Matthew 20:20-23.
Iroro rọ sọre: Ihworho ra djẹha ni riẹ odjuwu, i rhomu ghwẹ eri ne rhirhiẹ otọrakpọ na.
Iroro rọ gbare: Osolobrugwẹ o se ihworho ri vwo ifiẹrorhọ aye ine rhirhiẹ otọrakpọ na “ihworho mẹ,” “ihworho mi djẹha,” ọrhẹ “ihworho i Jehova ọ ha ebrurhọ riẹn ne.” (Isaiah 65:21-23) Aye ine vwo uphẹn aye ina ha ọhọre Osolobrugwẹ kpahen ituakpọ te orugba, nọyẹ akpọ rọ gbare uvuẹn i paradais.—Genesis 1:28; Psalm 115:16; Isaiah 45:18.
Iroro rọ sọre: Awan 144,000 ra hunute uvuẹn ọbe i Revelation emru udje.
Iroro rọ gbare: Dedevwo ọbe i Revelation o vwo idje buebun, ọrẹn ẹmro ezẹko rọ ha ruiruo rhẹ udje-e. Jerẹ udje, ọ ta kpahen “odẹ inyikọ awan 12 ọrẹ Ọmogegede na.” (Revelation 21:14) Roro kpahen oborẹ ọsoriẹ o mwu ọwan ẹro taghene awan 144,000 ra hunute rhẹ udje kpekpa-a.
Revelation 7:4 ọ hunute “uchunu ihworho ra kokarhọ [yanghene ra djẹha ni riẹ odjuwu], aye i te 144,000.” Uvuẹn oghwẹmro ọrọrọ uvuẹn ekete i Baibol ọnana, na hunute ẹko ọrọrọ: “otu gbidigbidi rẹ onyakpọ owuorowu ọ vwọ sabu kele.” Eri ha usuẹn “otu gbidigbidi” na, ine ji vwo usimirhọ nẹ obẹ Osolobrugwẹ rhe. (Revelation 7:9, 10) Orhianẹ awan 144,000 na udje kpekpa, manẹ e vwe fiẹ ovẹnẹ rhẹ ẹko eva na-a. *
Habaye, a tare taghene “usuẹn ituakpọ ya dẹ” awan 144,000 na, “nẹ aye i rhiẹ emọ erukaro rẹn Osolobrugwẹ.” (Revelation 14:4) Ẹmro na “emọ erukaro” ọ rionbọrhọ ibiẹ otu krẹn ra djẹha. Ọ rionbọrhọ eri ne leli Jesu sun obẹ odjuwu, aye ine suẹn uchunu ihworho buebun re vwe rhe uchunu aye uvuẹn otọrakpọ na.—Revelation 5:10.
^ Udjoghwẹmro 16 Omaran ọ ji havwọ, Ọgba Irherhe Robert L. Thomas nọ ya kpahen awan 144,000 ra hunute uvuẹn Revelation 7:4 taghene: “Ovẹnẹ ọ ha uvwre uchunu ihworho enana ọrhẹ era hunute uvuẹn Revelation 7:9. Arha ta taghene uchunu ihworho na ghwai udje kpekpa, nọyẹ ekete erọrọ ra hunute uvuẹn i Baibol na jẹ udje kpekpa.”—Revelation 1-7: An Exegetical Commentary, aruọbe 474.
You May Also Like
ESSENTIAL BIBLE TEACHINGS
Me Yẹ Uvie Osolobrugwẹ?
Uvuẹn owian aghwoghwo ọnẹyen, Uvie Osolobrugwẹ yẹ oborẹ i Jesu ọ mai ta kpahen ọke ro yono ihworho. O jiri ne rẹ idibo yi a nẹrhomo nẹ Uvie ọrana ọ rhe.
