Baibol na o jiririe rẹn ọwan ne vwo uruemru re tiobọnẹ nẹ ẹhẹn sa, ọrhẹ omamọ iroro rọ soriẹ ene ruie. O djephia taghene ọro ruẹ ẹghẹlẹ na ọrhẹ ọre rurie riẹn a mẹrẹn erere. (Proverbs 11:25; Luke 6:38) Jesu ọrhọ ta: “Omamerhomẹ ọ havwiẹ harẹn ọro tiobọnẹ ghwẹ ọra yẹre.”—Acts 20:35.

•  Ọkiọgo yẹ uruemru re tiobọnẹ ọ merhen Osolobrugwẹ oma?

•  Ọkiọgo yẹ uruemru re tiobọnẹ ọ sọ?

•  Eghwẹmro i Baibol sekpahen uruemru re tiobọnẹ

A mẹrẹn erere ọke re tiobọnẹ nẹ ẹhẹn sa. Baibol na ọrhọ ta: “Jenẹ owuowọnwan o ru oborẹ o kwerhọ uvuẹn ọmudu ọnẹyen, orhiẹ ọrẹ ekwẹre-e, yanghene ọra gba ohworho ru-u, fọkime Osolobrugwẹ o vwo ẹguọlọ kpahen ohworho ro tiobọnẹ ghwologhwolo.”—2 Corinthians 9:7, ekete ra djokarhọ.

Uruemru re tiobọnẹ nẹ ẹhẹn sa, ọ ha usuẹn “ogame rọ fonron” rẹ Osolobrugwẹ o vwo ekwerhọ kpahen. (James 1:27, ekete ra djokarhọ) Ohworho rọ ha userhumu rẹn awọrọ ri ha erhirhiẹ ọkanronmẹ, ọ wian rhẹ Osolobrugwẹ, Osolobrugwẹ ọ hariẹ taghene ohworho ọrana o momo hariẹn. (Proverbs 19:17) Baibol na o yonirin ọwan taghene Osolobrugwẹ ọnọ kwosa rẹn ohworho ro tiobọnẹ.—Luke 14:12-14.

Erhe ruie rhẹ iroro rọ sọre. Jerẹ udje:

• Nọ lẹrhẹ oma merhen ihworho.—Matthew 6:2.

• Na mẹrẹn emru nie rhe.—Luke 14:12-14.

• Na mẹrẹn usimirhọ nyoma igho ra kwa rhọye.—Psalm 49:6, 7.

Ọrhọ hobọtua irueruo yanghene iruemru Osolobrugwẹ o vwo utuoma kpahen. Jerẹ udje, ọ sọre na yẹ ohworho igho nọ ha fibikoro, ha imwu egbogbanhon yanghene da enyo vroma. (1 Corinthians 6:9, 10; 2 Corinthians 7:1) Omaran ọ ji havwọ, o fo na ha userhumu rẹn ohworho rọ nọ sabu hẹrote omayen, ọrẹn o vwo kwe wia-an.—2 Thessalonians 3:10.

Orhianẹ uruemru re tiobọnẹ ọ lẹrhẹ ọwan sẹrerhumuji ekrun ọwan. Baibol na o yonirin ọwan taghene urhomu ekrun ọnọ vi hẹrote edamẹ ekrun ọnẹyen. (1 Timothy 5:8) Ọsọre orhianẹ urhomu ekrun nọ ha userhumu rẹn awọrọ nyajẹ ekrun ọnẹyen vwo. Omaran ọ ji havwọ, Jesu o brorhiẹn kpe ihworho re vwe kwe hẹrote eri vwiẹre aye ri ho ne, rẹ aye a ta taghene ọsoso enyerẹn aye “ẹghẹlẹ ra ha ve rẹn Osolobrugwẹ.”—Mark 7:9-13.