Lele iyẹnrẹn owu uvuẹn America, joma ọsoso iphuphẹn uvuẹn ẹkwotọre na ya nẹrhomo, ọrẹn buebun aye i vwa nẹrhomo kẹdẹkẹdẹ-ẹ. O vwo ẹfro-o, ezẹko usuẹn aye ina sabu rhe roro: ‘Ẹrhomo oborẹ ọ lẹrhẹ oma merhen ohworho, gbinẹ o vwo emru ọrọrọ ro sekpahen?’

•  Me yẹ ẹrhomo?

•  Osolobrugwẹ ọ kerhọ?

•  Me mi na sabu nẹrhomo kpahen?

•  Oborẹ otuẹdẹruọ a ta

 Ẹrhomo obọdẹn ẹmro ẹta kugbe rhẹ Ọmemama na. Gbe roro kpahen oborẹ ọnana o mevirhọ! Jehova ọ do ghwẹ ituakpọ ọrẹ kizede kizede, ọrẹn “o serabọ rẹn owuowọnwan usuẹn ọwan na-a.” (Acts 17:27) Itiọrurhomẹmro, Baibol na o vwo use ọghoghanren ọnana: “Are i ti kẹrẹ Osolobrugwẹ, ọye no no ti kẹrẹ are.”—James 4:8.

 Marhẹ wu ne ru tikẹrẹ Osolobrugwẹ?

•   Izede owu yẹ nyoma ẹrhomo, nọyẹ oborẹ e ru tẹmro rẹn Osolobrugwẹ.

•   Izede ọrọrọ yẹ nyoma i Baibol na, nọyẹ oborẹ Osolobrugwẹ o ru “tẹmro” wẹn.

 Aruẹ ẹmro ẹta kugbe ọrana, nọyẹ ẹrhomo ọrhẹ uyono i Baibol, ọnọ ha userhumu wẹn vwo onyerẹnkugbe rọ gbanhonron rhẹ Osolobrugwẹ.

 “Re leli Jehova ro rhiẹ Ọrọ Maido na tẹmro kugbe, ọnana ọkpẹ uphẹn owu rẹ ituakpọ i vwori.”—Jeremy

 “Ọke mia ta rẹn Jehova kpahen oborẹ mie roro nyoma ẹrhomo, ọ lẹrhe mẹ tikẹriẹ rhọ.”—Miranda

 Orhianẹ wu vwo imwẹro kpahen Osolobrugwẹ jeghwai nẹrhomo vwe yi, ọnọ sabu bẹn ọkezẹko we ne kwerhọ ye taghene Osolobrugwẹ ọ ghini kerhọ ẹrhomo. Ọrẹn, Baibol na o se i Jehova “Ohworho ro rhon ẹrhomo.” (Psalm 65:2) Ọ tobọ ha use wẹn ne wu ‘ha ọfiamu enọ ephian dọn yen.’ Mesoriẹ? ‘Fọkime ọ hẹrote owẹwẹ.’—1 Peter 5:7.

 Oborẹ ene roro kpahen: Wa ghwọghọ ọke lele igbehian enọ tẹmro kugbe ọke ephian? Wu na ji sabu lele Osolobrugwẹ tẹmro kugbe omaran. Bruie nya ọrẹ ẹrhomo kọke kọke, jeghwai ha odẹ ye ro rhiẹ Jehova ruiruo. (Psalm 86:5-7; 88:9) Nọyẹ ọsoriẹ i Baibol na ọ ha use wẹn ne wu “nẹrhomo ọke ephian.”—1 Thessalonians 5:17.

 “Ẹrhomo ọ lẹrhẹ mẹ lele Ọsẹ mẹ rọ ha obẹ odjuwu tẹmro kugbe, ni mia sabu rhiẹ ọmudu mẹ firhọ riẹn.”—Moises

 “Mia ta rẹn i Jehova kpahen ekwakwa odjahen, jerẹ oborẹ mia ta rẹn izu mẹ kpahen emru odjahen yanghene ugbehian mẹmẹ rhẹ ọye i gba kpẹnkpẹn.”—Karen

 Baibol na ọrhọ ta: “Uvuẹn i kemru kemru ọrẹ ẹrhomo kugbe orẹ ọrhẹ ekpẹmẹ, are i ta edamẹ are harẹn Osolobrugwẹ.”—Philippians 4:6.

 Nọyẹ wu na sabu nẹrhomo kpahen ebẹnbẹn enọ? Ee! Itiọrurhomẹmro, Baibol na ọrhọ ta: “Doron ebẹnbẹn enọ vwe i Jehova, Ọye nọ nọ sẹroruọ.”—Psalm 55:22.

 Ọrẹn uvuẹn ẹrhomo wa nẹ vwe Osolobrugwẹ, orhiẹ ebẹnbẹn enọ ọvo ye wu na ghwai hunute-e. Uphuphẹn ọmase owu re se Chantelle nọ tare taghene, “ugbehian mẹ rhẹ i Jehova ọ sabu kpẹnkpẹ-ẹn, orhianẹ userhumu ọvo yi mia nekpẹn mie yi ọke ephian. O fori mi kpẹmiẹ vwẹre, nẹ ekwakwa mia kpẹmẹ Osolobrugwẹ rhọ ni bun.”

 Oborẹ ene roro kpahen: Ekwakwa ego uvuẹn akpenyerẹn ọnọ ye wu guọlọ kpẹmẹ Osolobrugwẹ rhọ? Wu na sabu roro kpahen ekwakwa esa wu guọlọ kpẹmẹ i Jehova rhọ inyenana?

 “Ibiẹ ekwakwa jerẹ idodo orhorhomu, ọnọ sabu mwu ọwan nẹrhomo ekpẹmẹ vwe i Jehova.”—Anita

 “Roro kodo kpahen ekwakwa ri jeruo uvuẹn emama, yanghene oghwẹmro i Baibol rọ ghini hobọto, ne wu kpẹmẹ i Jehova rhọye.”—Brian