ENỌ IPHUPHẸN A NỌ
Ra Kọn Rhọ—Obọrẹ Ukaro: Mi Mwuegbe mi ne Lele Ohworho Kọn Rhọ ne?
Uvuẹn urhomu-ẹmro ọnana
Me yo mevirhọ ne lele ohworho kọn rhọ?
Ihworho ezẹko e roro taghene ne lele ohworho kọn rhọ, oborẹ ana sabu ru odedede. Ọrẹn, uvuẹn urhomu-ẹmro ọnana, “ra kọn rhọ” o mevirhọ ọrẹ awanva a ghwọghọ ọke kugbe, neneyo aye i sabu rhe sẹ aye ina rọnmọ owuowọnwan. Omarana, a vwa kpara kọn rhọ rhẹ ohworho-o. E vwe ruie na sabu riamerhen okugbe ọrhẹ ẹruete ohworho ọreva na-a.
Awanva arha kọn rhọ, ọnana ọnọ lẹrhẹ aye rhe sẹ o fori nẹ aye i rọnmọ yanghene fiobarhọ onyerẹnkugbe na. We rhe lele ohworho kọn rhọ, vwo yi rhẹ ẹhẹn taghene ọkezẹko o lele fi orọnmo-o.
Oborẹ ọ mai ghanren: Ẹhọn orho kwe wẹn ne wu lele ohworho kọn rhọ, gbe vwo yi rhẹ ẹhẹn taghene ọnọ sabu lele fiẹ orọnmo.
Ra kọn rhọ odedede, ọ họhọ ọke ra kpara guọlọ iruo ọrẹn a guọlọ wian owian na-a
Wu mwuegbe wu ne lele ohworho kọn rhọ ne?
Ra kọn rhọ rhẹ ohworho ọnọ sabu lele fiẹ orọnmo, omarana gba dabu roro kpahen oborẹ iruemru wu vwori ọnọ hobọte onyerẹnkugbe na lele. Jerẹ udje, roro kpahen erhirhiẹ enana:
Onyerẹnkugbe Ekrun. Oborẹ we ruẹ eri vwẹruọ ọrhẹ imizuo lele vwana, maido uvuẹn ọke ekwakwa i vwe serhọ wẹn—ye wu ne ji ruẹ ohworho wu rọnmọren.
Uruemru-urhi Baibol: “Are i tiobọnu aruẹ ekwẹre ọgbogbanhon ephian, evwenbiomu, ekwẹre, ovan, kugbe ẹmro obiobiomu ọrhẹ kemru kemru rọ suẹ ẹkuọn.”—Ephesians 4:31.
Nọ oma: ‘Eri vwiẹre mẹ ọrhẹ imizu mẹ ina ta taghene mia họghọ rẹn aye? Mi rhe lele aye vwo ẹghwọ, mia kpara van ji tuekwẹre, gbinẹ mie lele aye kwaphiẹ ẹghwọ na rhọ izede bọrọbọrọ?’
Orhianẹ wu vwa sabu kwaphiẹ ẹghwọ rhọ vwana uvwre eri vwiẹruọ ọrhẹ imizuo-o, wu ne ghini sabu ruie wu rha rọnmọ ne?
Rha guọlọ edamẹ awọrọ. Wu rha rọnmọ ne, wu ne vi rhe roro kpahen oborẹ ohworho wa rọnmọ ọ guọlọre, ji vwo omwemẹ wu ne ruie riẹn ọrhọ tobọ rhianẹ o serhọ wẹ-ẹn.
Uruemru-urhi Baibol: “E jenẹ owuowọnwan guọlọ ọdamẹ ọreva ye, o vwo rhiẹ ọdamẹ ọnẹyen ọvo-o.”—1 Corinthians 10:24.
Nọ oma: ‘Oborẹ o rhiẹ ọdamẹ ha mẹ ọvo yi mia guọlọ ọke ephian? E rheri mẹ rhẹ ohworho ro roro rẹn awan? Marhẹ mi ru djephia ne taghene mia guọlọ ọdamẹ awọrọ, orhiẹ ọnẹmẹ ọvo-o?’
Omeriotọre. O fori nẹ ohworho ro mwuegbe orọnmo, o vwo uruemru re kwe orusọ jeghwai rhomunu fọkiẹ orusọ na.
Uruemru-urhi Baibol: “Ọwan ephian e ruẹ sọ ọgbọ buebun.”—James 3:2, ekete ra djokarhọ.
Nọ oma: ‘Mie kwe orusọ mẹ gbinẹ mia djikilo kpahiẹn? Arha yẹ mẹ urhebro kpahen ekete ro fori mi wian kpahen, ọnana ọ lẹrhẹ evwan biomi mẹ?’
Igho. Ohworho orho rhe oborẹ a ha igho ruiruo izede ẹghwanren, ọnọ kẹnoma rẹn ebẹnbẹn rẹ igho ọ sua uvuẹn orọnmo.
Uruemru-urhi Baibol: “Ọrọmo usuẹn are na rọ guọlọ bọn ọkponghwa ro no jo siyẹ roro kpahen uchunu igho ro no mwuien vwẹre, sẹ o vwo igho ro no te ha bọn ye hin?”—Luke 14:28.
Nọ oma: ‘Mia sabu suẹn oborẹ mia ghwọghọ igho lele, gbinẹ mia kpara osa ria? Marhẹ mi ru djephia ne taghene mi vwa kpare igho ghwọghọ-ọ?’
Onyerẹnkugbe ọnọ rhẹ i Jehova. Orhianẹ wẹwẹ Oseri Jehova, nọyẹ wu ghwanriẹn vwo obọdẹn ẹkwaphiẹrhotọre uyono i Baibol ọrhẹ uyono ẹnya ne.
Uruemru-urhi Baibol: “Omamerhomẹ ọ havwiẹ rẹn ihworho ri guọlọ yono kpahen Osolobrugwẹ.”—Matthew 5:3.
Nọ oma: ‘Mia damoma ruẹ onyerẹnkugbe mẹ rhẹ i Jehova gbanhan ọke ephian? Ogame i Jehova yẹ emru ukaro uvuẹn akpenyerẹn mẹ, gbinẹ mia lẹrhẹ ekwakwa erọrọ jaghwẹrhọ ye?’
Oborẹ ọ mai ghanren: O fori ne wu rhiẹ omamọ ọreva harẹn ohworho wa guọlọ rọnmọ. Wu rha damoma rhiẹ aruẹ ohworho ọrana, o fiotọre taghene ohworho wu na rọnmọ ono ji rhiẹ omamọ ọreva wẹn.
