“Ọke mia dua, ehworhare jerẹ omẹmẹ e je mẹ omamọ, ọnana emru owu rọ mai bẹn ha mẹ. Mie roro bi taghene mi na dobọ ye ji orho ru, ọrẹn o ji kpokpi mẹ.”—David, 23.

 David Olele Kristi rọ guọlọ ruẹ oborẹ ono merhen Osolobrugwẹ oma. Ọnọ sabu ruẹ ọrana orhianẹ ehworhare ye je yi? Ukẹro ọgo yẹ Osolobrugwẹ ọ ha nẹ uruemru rẹ ehworhare a gbẹ ehworhare yanghene emẹse a gbẹ emẹse?

•  Me yi Baibol na ọ tare?

•  Ọrana no mevirhọ taghene . . . ?

•  Ọrẹn, orhianẹ . . . ?

 Ukẹro ihworho a ha ni uruemru ọnana uvuẹn ekete ọrhẹ ọke sansan ọ vẹnẹren. Ọrẹn, Ilele Kristi i vwa bọn imwẹro aye kpahen iroro ituakpọ-ọ, yanghene ‘aphẹrẹ iyono ephian i vwa kpara aye sa kpara aye rie-e.’ (Ephesians 4:14) Ukpomaran, imwẹro aye kpahen uruemru ọnana (ọrhẹ irueruo erọrọ), aye i bọnriẹn kpahen iruemru-urhi Baibol na.

 Oborẹ i Baibol ọ ta kpahen uruemru rẹ ehworhare a gbẹ ehworhare yanghene emẹse a gbẹ emẹse o fiotọre. Baibol na ọrhọ ta:

•  “Are i vwe lele ọhworhare mẹronma jerẹ oborẹ e lele ọmase mẹronma-a.”—Leviticus 18:22.

•  “Fọkiẹ ojemẹ ofefe rọ ha uvuẹn ọmudu aye, . . . yọ lẹrhẹ Osolobrugwẹ tiobọnu aye rẹn ojemẹ ehware re vwe suẹn, fọkime emẹse aye a ha ojemẹ ehware oma aye ruiruo izede rọ kparehasuẹ oborẹ Osolobrugwẹ ọ mariẹn lele.”—Romans 1:24, 26.

•  “Are i vwe jene sun are vru-u. Eri vwo uruemru ọfanrhiẹn, egehọ, eghwọwe, ehworhare ri kwerhọ uruemru rẹ ehworhare a gbẹ ehworhare, ehworhare ra gbẹ ehworhare, ihi, evwuvwele, idinyo, era tẹmro evwiavwia, kugbe ere ken emru awan ha, i ha Uvie Osolobrugwẹ riuku-u.”—1 Corinthians 6:9, 10.

 Itiọrurhomẹmro, iruemru-urhi Osolobrugwẹ o hobọte ihworho ephian, sẹ ehworhare ra gbẹ ehworhare yanghene emẹse ra gbẹ emẹse, yanghene eri vwo ojemẹ ehware re vwe suẹn. O fori nẹ ihworho ephian i vwo omerhesun orhianẹ aye i vwo ojemẹ aye ine ruẹ oborẹ i Jehova o vwo utuoma kpahen.—Colossians 3:5.

 Ọrana no mevirhọ taghene Baibol no jirie ne vwo utuoma kpahen ehworhare ra gbẹ ehworhare yanghene emẹse ra gbẹ emẹse?

 Ẹjo. Baibol na ọ ta rẹn ọwan ne vwo utuoma kpahen aruẹ ihworho enana-a. Ukpomaran, ọ ta rẹn ọwan ne “lele ihworho ephian nyerẹnkugbe ọrẹ ufuoma,” o toro oborẹ aye i havwọ-ọ. (Hebrews 12:14) Omarana, ọ sọre re ne sehiẹn ihworho re ruẹ irueruo ọnana, vwo utuoma kpahen aye, yanghene ha oja re aye.

 Ọrana no mevirhọ taghene Ilele Kristi i kparehasuẹ irhi ri kwerhọ ye nẹ ehworhare i rọnmọ ehworhare yanghene nẹ emẹse i rọnmọ emẹse?

 Baibol na o djephia taghene Osolobrugwẹ ọ ha orọnmo mwu no rhirhiẹ ye uvwre ọhworhare owu ọrhẹ ọmase owu. (Matthew 19:4-6) Ọrẹn, igọmẹti ye jurhi sẹ o fori nẹ ehworhare i rọnmọ ehworhare yanghene nẹ emẹse i rọnmọ emẹse, ọrana rhẹ ẹmro ro teri ọwa-an. Baibol na ọ ta rẹn Ilele Kristi nẹ aye i tiomanẹ irueruo usun oseghe. (John 18:36) Omarana, aye i vwa hobọtua ji kparahasuẹ irhi igọmẹti o jiri kpahen ọrẹ ehworhare ina rọnmọ ehworhare yanghene ọrẹ emẹse ina rọnmọ emẹse-e, omaran ji te uruemru rẹ ehworhare a gbẹ ehworhare yanghene emẹse a gbẹ emẹse.

 Ọrẹn, orhianẹ ọhworhare o vwo uruemru ra gbẹ ehworhare yanghene ọmase o vwo uruemru ra gbẹ emẹse, ọravwọ ọnọ sabu wene?

 Ee. Ọke ahwanren, o vwo ihworho ezẹko ri wenerin! Ọke i Baibol na ọ ta taghene ere ruẹ irueruo enana i ha Uvie Osolobrugwẹ riuku-u, nọ habaye taghene: “Omaran ihworho ezẹko usuẹn are i havwọ bi.”—1 Corinthians 6:11.

 Ọrana no mevirhọ taghene ihworho ri dobọ irueruo enana ji ne, i vwe rhe vwo oruru aye ina rharhumu vwobọrhọ ye ọkezẹko-ọ? Ẹjo. Baibol na ọ tare taghene: “Are i ku uruemru ọkpokpọ na rhọ, re ruẹ kpokpọ rhọ nyoma irherhe ọgbagba.” (Colossians 3:10) Ewene o vwo hiẹ-ẹn.

 Ohworho rọ guọlọ ga i Jehova, ọnọ ji sabu vwo oruru ro no vwobọrhọ aruẹ irueruo enana?

 Aruẹ oruru ọnana ọnọ sabu homaphia, ọrẹn owuowọnwan yo no brorhiẹn sẹ ono ru lelie yanghene tiẹn. Izede ọgo? Baibol na ọ tare taghene: “Are i rha nyalele ọkpọvi ọrẹ ẹhẹn na, are i rhe ruẹ lele ojemẹ ọrẹ ugboma na-a.”—Galatians 5:16.

 Djokarhọ ye taghene ohworho na ọnọ ji sabu vwo ojemẹ ugboma ọkezẹko. Ọrẹn, nyoma isese i Baibol ọke ephian ọrhẹ ẹrhomo ẹnẹ, ọravwọ ọnọ sabu vwo omẹgbanhon rọ nọ tiẹn aruẹ ojemẹ erana.

 David ra hunute vrẹn ne, ọ mẹrẹnvwrurhe taghene ẹmro erana urhomẹmro, maido ọke ro lele eri vwiẹriẹ ta kpahen obẹnbẹn ro vwori. Nọ tare, “Nọ họhọre taghene a kpare ohwan ọghwaghwa nẹ urhomu mẹ, mi kiki lele aye tẹmro bi, manẹ akpenyerẹn mẹ ọke uphuphẹn o vwo rhiẹ omana-a.”

 Itiọrurhomẹmro, oma ọ merhen ọwan arha nyalele iruemru-urhi Osolobrugwẹ. Ọwan i vwo imwẹro taghene aye “ọsoso, aye a lẹrhẹ ọmudu na ghọghọ, . . . arha nyalele aye, o vwo erere ọduado.”—Psalms 19:8, 11.