A MA RIẸN?
Abọ Ọgbogbanhon rẹ Octopus o Vwori
Ihworho re ruẹ irọbọtu e ruẹ ekwakwa ri na ha userhumu rẹn idọkitọ sabu bẹrẹ ekete ri kenkenrin uvuẹn oma ohworho, ọ vwọ rhọ lẹrhẹ aye bẹrẹ ekete na dua-a. Ewena enana i sabu ruẹ ekwakwa enana nyoma aye a hẹrokele oborẹ ocotopus ọ ha abọ ye ruiruo izede rọ guọlọre.
Roro kpahen ọnana: Octopus ọ sabu mwu emru ha, mọriẹn jeghwai chahiẹn rhẹ abọ ye rọ ha ruiruo uvuẹn ekete ri kenkenrin dede. Octopus ọ ji sabu ruẹ omayen nọ sabu riẹ ekete rọ guọlọre, ọ ji sabu ruẹ eghọn sansan uvuẹn abọ ye gbanhan lele oborẹ ọ guọliriẹ rhọ.
Egba irherhe i vwo imwẹro taghene ana sabu ha abọ irọbọtu rọ sabu vẹn bẹrẹ ekete ri kenkenrin uvuẹn oma ohworho. Ana ji sabu haye bẹrẹ ihworho ri dẹrughwaroghwu oma ebẹrẹ ọgbogbanhon.
Gbe ni oborẹ octopus ọ ha abọ ye ruiruo lele
A dabu ruẹ abọ irọbọtu na rhomurhọ ne, a jeghwai haye ruẹ oma ẹbẹrẹ buebun. Owu usuẹn abọ ye ro seri te inches 5 ọ sabu ruẹ ekete ri lọhọre uvuẹn oma na nyoma rọ kpara jeghwai mọrọn aye, ọrẹn, ọ vwọ suẹ ẹkuọn rẹn aye-e, obọ ye ọreva na nọ yọ wian owian oma ẹbẹrẹ na. Idọkitọ re se Tommaso Ranzani, ro rhiẹ owuọwan usuẹn ihworho ri ruẹ irọbọtu na rhomurhọ, nọ tare: “O mwurun ame ẹro taghene ona ọnana, ono rhiẹ ọtonrhọ ena erọrọ ri na homaphia.”
A sabu ha abọ irọbọtu rọ sabu vẹn bẹrẹ oma ohworho
Me wu rorori? Abọ ọgbogbanhon rẹ octopus o vwori na, ọ varhe? Gbinẹ a mariẹn?