Urhiẹvwe ọ hẹroso ọdjodjẹrẹ ọren na no ruẹ iriẹn rọ ha dan gbanhon, nọ ki sabu dan. Ọrẹn ẹdẹ aruọke na orho birhọ, urhiẹvwe ọfuanfon na yọ kiki dan jẹ irhiẹvwe ere hẹrhẹre na vwo. Me yọ yẹ ye omẹgbanhon ọnana?

 Roro kpahen ọnana: Bọmọke aye ina ki dan, irhiẹvwe sansan na riamerhen ọren na rhẹ ibekpe aye ro rhurhuru yanghene ro rhiẹ firhọ ibiesuọn. Ọrẹn, urhiẹvwe ọnana o meviẹ izede oghẹnrensan. Iyẹnrẹn o djerie phia ne taghene nẹ oma urhiẹvwe ọnana ọ sabu djẹrẹ, ọnọ vi kpare ibekpe yi eva rierun neneyo aye i je rhe seri nẹ owuowọnwan. Ona ọnana rọ ha meviẹ na, ọ lẹrhẹ ọdjodjẹrẹ ọren na ruẹ iriẹn urhiẹvwe na ọ ha dan rọ ha uvwre ovwọriẹ riẹ ugbewien, no ruie gbanhan nọ ki dan.

 Egba irherhe ezẹko ri nẹ University ọrẹ Exeter, England rhe, ni guọlọ riaro sẹ aye ina sabu ruẹ ekwakwa ra ha ọren yẹ ọwan ukpẹ rhomurhọ, nyoma rọ nọ họhọ oborẹ urhiẹvwe ọfuanfon na o meviẹ lele. Ọke aye e ruẹ ọnana, aye ni mẹrẹnvwrurhe taghene uchunu omẹgbanhon rẹ aye i mẹrẹnren ọ ha emrẹ akwava rierun vrẹn uchunu omẹgbanhon aye i vwo bi ne.

 Aye i ji mẹrẹnvwrurhe taghene ugboma urhiẹvwe na, o ji lo omamọ. Nyoma aye a hẹrokele oborẹ urhiẹvwe ọfuanfon na o meviẹ lele, aye ni sabu ruẹ ekwakwa ra ha ọren yẹ ọwan ukpẹ ri pharhere, ri ji vwo omẹgbanhon omamọ. Ekwakwa enana ni lẹrhẹ ọgba irherhe re se Richard ffrench-Constant ro rhiẹ owuowọnwan usuẹn ihworho ri guọlọ riaro kpahiẹn, se urhiẹvwe ọfuanfon na, “ọgba ro koko omẹgbanon nẹ ọren na.”

 Me wu rorori? Oborẹ urhiẹvwe ọfuanfon na o meviẹ lele, ọ varhe? Gbinẹ a ma riẹn?