Ohworho rọ damoma ro no kpe unye, o rhe oborẹ ọ gbanhon te. Jerẹ oborẹ aruọke ọ braro phẹphẹrẹ, omaran inye enana a dan ogege a guọlọ mwu aye.

 Ihworho ri yono kpahen isayẹnsi i mẹrẹnvwrurhe taghene aruẹ unye ọnana rọ riẹ omamọ na, ọ sabu dan dẹriẹ oma ọgbọ buebun jerẹ ijẹti ra ha wọnrọn, ọrẹn emrẹ ibrẹro owu ọvo. Erhe vwiẹ aye obọ “aye a sabu dan phẹphẹrẹ omamọ,” omaran ọgba irherhe re se Michael Dickinson ọ tare. “Ọ họhọ ọke ra kpare ọmọvwerhe rhẹ uvuẹn ijẹti ra wọnrọn ro ji rhe oborẹ ono ru.”

 Ihworho ra guọlọ oborẹ emru ọ havwọ, i dabu ha ikẹmẹra ni omẹgbanhon inye i vwori jeghwai mẹrẹnvwrurhe taghene aye a sabu phieghe ibekpe aye te ọgbọ 200 ubrẹro owu. Habaye, aye i rhe phieghe ibekpe aye ukwọgbọ ọvo, o te rẹn aye rẹ aye a sabu kpare ugboma aye dan.

 Arha djofẹn mwu aye vwo? Ihworho ra guọlọ oborẹ emru ọ havwọ i mẹrẹnvwrurhe taghene, inye enana a sabu dan phẹrẹ ogege arha djofẹn mwu aye, emrẹ ọgbọ 50 phẹrẹ ghwẹ ọke ohworho ọrhọ braro. “Unye ọ sabu rhe oborẹ ọ guọlọ ru, rhẹ ibiẹ ọke ro vwori, ọ sabu rhe ekete imwofẹn na ọ havwọ jeghwai rhe oborẹ ọnọ dan lele nọ sabu vabọ,” omaran ọhworhare owu re se Dickinson ọ tare.

 Oborẹ ibiẹ aphẹrhiẹn unye rọ riẹ omamọ ọ wian lele, ji emru igbevwunu rẹ egba irherhe i guọlọ yono kodo kpahen.

 Me wu rorori? Omẹgbanhon unye rọ riẹ omamọ na ọ sabu dan ọ varhe? Gbinẹ a ma riẹn?