“Gaarummaan koo inni guddaan si gaʼa; sababiin isaas, humni koo guutuu kan taʼu yeroo ati dadhabdutti dha.”—2 Qorontos 12:9, Hiika Addunyaa Haaraa.

 “Ayyaanni koo si ga’a, humni koo dadhabaa keessaan akeeka isaa in raawwata.”—2 Qorontos 12:9, Hiika Bara 1997.

 Waaqayyo Phaawulos ergamaan qorumsa isa mudatuu fi dadhabina qabu moʼuuf cimina isa barbaachisu akka isaaf kennu waadaa isaaf galeera.

 “Gaarummaan koo inni guddaan si gaʼa.” Deebiin Waaqayyoo kadhannaa Phaawulos irra deddeebiʼee dhiheesseef kenne, “wanti si barbaachisu inni guddaan gaarummaa kooti” jedhamees hiikamuu dandaʼa. Karaa garabiraatiin, Phaawulos qorumsawwan isa mudatan akka dandamatu isa gargaaruuf gaarummaan Waaqayyoo qofti gaʼaa ture.Akkas kan jennu maaliifi? Jechi ‘gaarummaa’ ykn ‘ayyaana’ jedhamee hiikame, kennaa tolaa argachuun nuuf hin mallee fi Waaqayyo arjummaadhaan kennu kan ibsudha. Wanti Phaawulos barreesse gaarummaa Waaqayyoo irraa faayidaa guddaa akka argate kan argisiisudha. Phaawulos sanaan dura Kiristiyaanota ariʼachaa kan ture taʼus, Waaqayyo cimina amala isaa akka jijjiiruu fi namoonni kaan Kiristiyaanota akka taʼan gargaaruuf isa barbaachisu isaaf kenneera. (1 Qorontos 15:9, 10; 1 Ximotewos 1:12-14) Phaawulos rakkina ykn qorumsa akkamiiyyuu moʼuuf gargaarsa Waaqayyoo irratti amanannaa guddaa qabaachuu dandaʼa ture.

 “Sababiin isaas, humni koo guutuu kan taʼu yeroo ati dadhabdutti dha.” Yihowaan a keessumaa humni isaa ilmaan namootaa dadhaboo fi mudaa qaban yommuu gargaarutti caalaatti akka mulʼatu Phaawulosiin yaadachiiseera. (2 Qorontos 4:7; 12:8) Kiristiyaanonni dadhabina isaanii yommuu hubatanii fi gargaarsaaf Yihowaa yommuu kadhatanitti, humni Waaqayyoo guutummaatti isaan keessatti akka hojjetu heyyamu. (Efesoon 3:16; Filiphisiyus 4:13) Haala kanaan, humni Waaqayyoo ilmaan namootaa yeroo dadhabanitti isaan keessatti hojjeta.

 Phaawulos hafuuraan kakaʼee Kiristiyaanota Qorontosiif ergaa kana kan barreesse Dh.K.B. naannoo bara 55​tti ture. Xalayaa isaa gara xumuraarratti ergamaa jedhamee waamamuuf aboo akka qabu ibseera. Akkana jechuuf kan isa kakaase, namoonni barsiistota ofiin jedhan tokko tokko waan isa qeeqaniif, tariimmoo qaama isaatiin ykn dandeettii dubbachuu isaatiin waan isa tuffataniif taʼuu dandaʼa.—2 Qorontos 10:7-10; 11:5, 6, 13; 12:11.

 Phaawulos namoota isa qeeqaniif deebii kennuuf, tajaajila isaa kan raawwatee fi qorumsa hedduu moʼuu kan dandaʼe humna isaatiin akka hin taane ibseera. (2 Qorontos 6:4; 11:23-27; 12:12) Boqonnaa 12 irratti, tarii dhibee qaamaa ykn miiraa yeroo hunda isa rakkisu fakkeenyaan “qoreen foon koo waraanu” jechuudhaan waameera. (2 Qorontos 12:7) Phaawulos dhibeen isaa maal akka taʼe ibsuu baatus, gargaarsa Waaqayyootiin moʼuu akka dandaʼu mirkanaaʼaa taʼuu dandaʼeera.

 Kiristiyaanonni yeroo harʼaas rakkinaa fi ariʼatamni isaanirra gaʼuu dandaʼa. Humni Waaqayyoo rakkina isaan mudatu akkamiiyyuu moʼuuf isaan gargaaruu akka dandaʼu beekuun isaanii isaan jajjabeessa. Nutis akkuma Phaawulos amanannaa guutuudhaan, “Yeroon dadhabu yeroo sanatti humna nan qabaadha” jechuu ni dandeenya.—2 Qorontos 12:10.

 Viidiyoo qabiyyee kitaaba 2 Qorontos gabaabsee ibsu kana daawwadhu.