“Wanti Waaqayyo dubbatee utuu hin raawwatamin hafu tokko illee hin jiru.”—Luqaas 1:37, Hiika Addunyaa Haaraa.

 “Waaqayyoof wanti dadhabamu hin jiru.”—Luqaas 1:37, Hiika Bara 1997.

 Waaqni hundumaa dandaʼu wanta ilmaan namootaatiif kan hin dandaʼamne fakkaatu raawwachuu ni dandaʼa. Qaamni wanta inni dubbate ykn abdachiise akka hin raawwatamne dhorkuu dandaʼu tokko illee hin jiru.

 Afaan jalqaba Kitaabni Qulqulluun ittiin barreeffameen jechi “dubbate” jedhu “jecha” ykn “dubbii” Waaqayyoo dubbate kan argisiisudha. Buʼaa wanta Waaqni keenya Yihowaan a dubbates argisiisu dandaʼa. Wanti Waaqayyo dubbate yoom iyyuu waan raawwatamuuf, Luqaas 1:37 akkana jedhamees hiikamuu dandaʼa: “Abdiin Waaqayyo kenne matumaa utuu hin raawwatamin hin hafu” ykn “Waaqayyoof wanti dadhabamu hin jiru.” Hiikni yaada jalqaba Afaan Giriikiin ture irratti hundaaʼe kun dhugaa buʼuuraa tokko dabarsa: Waaqayyoof wanti hin dandaʼamne tokko illee waan hin jirreef wanti inni dubbate ykn abdiin inni kenne matumaa utuu hin raawwatamin hin hafu.—Isaayyaas 55:10, 11.

 Abdiiwwan Waaqayyoo kennee wajjin haala walqabateen yaanni kanaa wajjin wal fakkaatu guutummaa Kitaaba Qulqulluu keessatti ibsameera. Fakkeenyaaf, Yihowaan maleekaa isaatti fayyadamee Saaraan, jechuunis haati manaa Abrahaam ishiin dhala hin godhanne bara dulluma ishii keessa akka ulfooftu raajii dubbatee ture. Itti dabaluudhaan Waaqayyo, “Wanti Yihowaadhaaf hin dandaʼamne jiraa?” jedheera. (Uumama 18:13, 14) Iyyoob uumamawwan Waaqayyoo irratti erga xiinxalee booda, “Wanti gochuuf yaadde kam iyyuu siif rakkisaa [miti]” jedhuudhaan dubbateera. (Iyyoob 42:2) Kana malees, barattoonni Yesuus ulaagaalee fayyuuf barbaachisu guutuu akka hin dandeenye yommuu isaanitti dhagaʼametti, Yesuus ‘Waaqayyoof wanti hundi akka dandaʼamu’ isaan yaadachiiseera.—Maatewos 19:25, 26. b

 Gabriʼeel yaada Luqaas 1:37 irra jiru kan dubbate shamarree Yihudii Maariyaam jedhamtuttidha. Gabriʼeel “Ilma Isa Hundaa Olii” akka deessuu, ‘maqaa isaas Yesuus jettee akka moggaastu’ ishiitti himeera. Innis Mootii Mootummaa Waaqayyoo taʼuudhaan bara baraaf bulcha.—Luqaas 1:26-33; Mulʼata 11:15.

 Maariyaam waan hin heerumnee fi ‘dhiiraa wajjin saalqunnamtii raawwattee waan hin beekneef’ kun akkamitti taʼuu akka dandaʼu gaafatteetti. (Luqaas 1:34, 35) Gabriʼeelis Waaqayyo hafuura qulqulluu ykn humna isaa isa hojii irra jirutti akka fayyadamu ishiitti hime. Yeroo sanatti Yesuus ilma Waaqayyoo qaama hafuuraa qabuu fi samii irra jiru ture. Kanaafuu, Waaqayyo hafuura qulqulluu isaatti fayyadamee jireenya Ilma isaa samii irraa gara gadameessa Maariyaamitti dabarse. (Yohaannis 1:14; Filiphisiyus 2:5-7) Ishiinis dinqiidhaan ulfoofte. Maleekichi amantii humna Waaqayyoo irratti qabdu ishiidhaaf cimsuuf, firri ishii Elsaabexis dhiheenyatti “bara dulluma ishiitti” ilma akka ulfoofte ishiitti hime. Elsaabexii fi abbaan manaa ishii Zakkaariyaas Elsaabex dhabduu waan taateef dhala hin qaban turan. (Luqaas 1:36) Ilmi isaanii Yohaannis Cuuphaa isa Yihowaan waaʼee tajaajila isaa dursee raajii dubbatee ture.—Luqaas 1:10-16; 3:1-6.

 Gabriʼeel yaada Luqaas 1:37 irra jiru kan dubbate, tarii Maariyaamii fi Elsaabexiin yaadatti qabatee taʼuu dandaʼa. Tajaajiltoota Yihowaa yeroo harʼaatti jiraniifis waadaa gale eeguu isaa akka itti fufu isaaniif mirkaneessa. Kunis abdii inni bulchiinsa ilmaan namootaa bulchiinsa qajeelaa Ilma isaa Yesuus Kiristoos isa Mootii Mootummaa Waaqayyoo taʼeen bakka buusuuf kenne kan dabalatudha.—Daaniʼel 2:44; 7:13, 14.

 Viidiyoo kitaaba Luqaas gabaabsee ibsu kana ilaali.