“Isin karaa koo nagaa akka argattaniif, ani wantoota kana isinitti himeera. Addunyaa keessatti rakkinni isin irra gaʼa, garuu jabaadhaa! Ani addunyaa mo’eera.”—Yohaannis 16:33, Hiika Addunyaa Haaraa.

 “Anatti qabamtanii nagaa akka qabaattaniif ani kana hundumaa isinitti hime; biyya lafaatti rakkina qabdu, garuu jabaadhaa! Ani biyya lafaa moʼeera.”—Yohaannis 16:33, hiika bara 1997.

 Qorumsawwanii fi mormiiwwan jiraatanis isaanis Waaqayyoon gammachiisuudhaan milkaaʼina argachuu akka dandaʼan jechoota kana dubbachuudhaan isaaniif mirkaneesseera.

 “Isin karaa koo a nagaa akka argattaniif, ani wantoota kana isinitti himeera.” Yaanni caqasa kanaa inni kaan, namni tokko jireenya isaa keessatti lola irraa walaba akka taʼe kan ibsu miti. Kanaa mannaa nagaa keessaa fi sammuu qabaachuu jechuu dha. Nagaan keessaa kun “karaa” Yesuus isa hafuura qulqulluu nuu erguuf abdachiiseen kan argamu dha. “Gargaaraan” kun barattoonni Yesuus rakkoowwan isaan mudatan akkamii iyyuu keessatti milkaaʼina argachuuf isaan dandeessisa.—Yohaannis 14:16, 26, 27.

 “Addunyaa keessatti rakkinni isin irra gaʼa, garuu jabaadhaa!” Yesuus barattoonni isaa qorumsawwan kanneen akka murtoo haqaa dhabuu fi ariʼatamni kan isaan irra gaʼu taʼuu isaa dubbateera. (Maatewos 24:9; 2 Ximotewos 3:12) Taʼus, sababa itti ‘jabaatanʼ qabu.—Yohaannis 16:33.

 “Ani addunyaa moʼeera.” Jechi as irratti “addunyaa” jedhu hawaasa ilmaan namaa hariiroo Waaqayyo biratti fudhatama hin qabne argisiisu dha. b Tokkoffaa Yohaannis 5:19 akkana jedha: “Nuti kan Waaqayyoo akka taane beekna, guutummaan addunyaa garuu humna isa hamaa sanaa jala jira.” Hamaa inni jedhame Seexana dha. Kanaafuu namoonni “addunyaa” wanta fedhii Waaqayyoo irraa adda taʼe yaadu akkasumas hojjetu.—1 Yohaannis 2:15-17.

 Seexannii fi addunyaan isaan geggeeffamu Yesuus fedhii Waaqayyoo akka hin raawwanne gochuuf yaalanii turan. Kun immoo akka inni waaʼee Waaqayyoo warra kaan hin barsiisee fi lubbuu isaa isa mudaa hin qabne aarsaa godhee akka hin dhiheessine gochuu kan dabalatu ture. (Maatewos 20:28; Luqaas 4:13; Yohaannis 18:37) Haa taʼu malee Yesuus addunyaan kun ilaalcha isaa irratti dhiibbaa akka godhuu fi Waaqayyo irraa akka gara galu akka isa godhu hin heyyamne. Kanaa mannaa hamma duʼaatti amanamaa taʼeera. Kanaafuu, Yesuus addunyaa moʼeera akkasumas Seexanni inni ‘bulchaa addunyaaʼ ‘dhiibbaa isa irratti gochuu akka hin dandeenyeʼ dubbateera.—Yohaannis 14:30.

 Yesuus fakkeenya ofii isaatti fayyadamuudhaan duuka buutonni isaas ejjennoon isaanii yeroo qoramutti illee Waaqayyoof amanamoo taʼuu akka dandaʼan argisiiseera. Kanas Yesuus akkana akka jedhetti fudhachuu dandeenya: “Ani addunyaa moʼeera, isinis moʼuu ni dandeessu.”

 Yesuus yaada kana kan dubbate galgala duʼuu isaa dura turetti dha. Yesuus akka ajjeefamu waan beekuuf carraa kanatti fayyadamuudhaan ergamoota isaa amanamoo taʼanitti gorsa barbaachisaa taʼe tokko himeera. Wanta bakka guddaa qabuu fi irratti yaaduu qaban isaanitti himeera. Kunis kana booda deebiʼanii akka isa hin argine, akka ariʼataman fi akka ajjeefaman illee isaanitti hime. (Yohaannis 15:20; 16:2, 10) Kun ergamoota isaa waan sodaachiseef Yesuus yaada Yohaannis 16:33 irra jiru dubbachuudhaan isaan jajjabeesseera.

 Jechoonnii fi fakkeenyi Yesuus duuka buutota isaa yeroo harʼaa jiranis kan jajjabeessu dha. Rakkinni akkamii isaan mudatu illee Kiristiyaanonni hundi amanamoo ni taʼu.