Yeroo dheeraadhaaf walitti dhufeenya jaalalaa qabaachaa kan turte taʼus, shakkiin sitti uumamuu jalqabe. Maarree walitti dhufeenya keessan itti fufuu moo dhaabuu qabda? Mata dureen kun murtoo akka gootu si gargaaruuf qophaaʼe.

Mata duree kana keessatti

•  Shakkii dandamachuu

•  Murtoo gochuu

•  Walitti dhufeenya keessan addaan kutuuf yoo murteessite

 Dargaggeessi tokkoo fi shamarreen tokko yeroo dheeraadhaaf walitti dhufeenya jaalalaa erga uumanii booda, akka jalqaba irratti yaadanii turan utuu hin taʼin garaagarummaa akka qaban hubatu taʼa. Fakkeenyaaf:

•   Inni tokko naannoo haroon jiru deemee bashannanuu jaallata; inni kaanimmoo miillaan karaa dheeraa deemuu filata.

•   Inni tokko namoota baayʼee wajjin yeroo dabarsuu jaallata; inni kaanimmoo hamma kana namatti hin dhihaatu.

•   Inni tokko yeroo baayʼee hin amanamu; inni kaanimmoo yeroo hunda amanamaadha.

 Haalawwan caqasaman kunneen garaagara akka taʼan hubadhu. Inni tokkoffaan garaagarummaa fedhii, inni lammaffaan garaagarummaa amala, inni sadaffaanimmoo garaagarummaa naamusa gaarii akka qaban argisiisa.

 Qabxiiwwan irratti yaadamuu qaban: Sababawwan olitti caqasaman keessaa caalaatti lamaan keessan kan rakkise isa kamidha? Gama kanaan lamaan keessaniyyuu jijjiirama gochuu ni dandeessuu?

 Abbaan manaa fi haati manaa fedhii ykn amalaan garaagara taʼanis, gaaʼela gammachiisaa qabaachuu ni dandaʼu. Walsimuu jechuun guutummaatti tokko taʼuu jechuu miti. Yeroo tokko tokko, abbaan manaa fi haati manaa wanta hiriyaan gaaʼelaa isaanii jaallatuuf xiyyeeffannaa kennuu barachuu ykn amalawwan isaani argisiisanirraa fayyadamuullee ni dandaʼu. a

 Karaa gara biraammoo, namni gaaʼela wajjin godhattu sun ulaagaalee ati ittiin geggeeffamtu kan hordofu, jechuunis amantii, naamusa, akkasumas wanta sirrii taʼee fi dogoggora taʼe ilaalchisee ulaagaa tokko kan hordofu taʼuun isaa barbaachisaadha. Gama kanaan garaagarummaa qabdu taanaan, itti seenuu kee dura irratti yaaduu qabda.

 Amantiidhaan gargar taʼuu akka fakkeenyaatti haa ilaallu. Kitaabni Fighting for Your Marriage jedhamu akkas jedheera: “Qorannoo hedduun akka argisiisutti, namoonni amantaa garaagaraa utuma hordofanii gaaʼela dhaabbatan, carraa isaan wal hiikuuf qaban balʼaadha.”

 Qajeelfama Kitaaba Qulqulluu: “Warra hin amannee wajjin walitti hin hidhatinaa!”—2 Qorontos 6:14, Hiika Bara 1997.

 Kitaabni Qulqulluun warri gaaʼela godhatan, “Foon isaaniitti rakkinni ni dhufa” jedha. (1 Qorontos 7:28) Yeroo walitti dhufeenya jaalalaa qabaachaa jirtutti wantoonni kun si mudataniiru taanaan kun si dinqisiisuu hin qabu.

 Waldhabiinsi xixinnoon isin gidduutti uumamu walitti dhufeenyi keessan akka itti hin fufne godha jechuu miti. ‘Walitti buʼiinsa kana tasgabbiidhaan hiikuu nan dandaʼa?’ jettee of gaafachuu qabda. Gaaʼela yommuu godhattan waan isin fayyaduuf dandeettii kana qabaachuun keessan barbaachisaadha.

 Qajeelfama Kitaaba Qulqulluu: “Gaarummaa walitti argisiisaa, akkasumas garaa waliif laafaa; akkuma Waaqayyo karaa Kiristoos tola isiniif dhiise, isinis tola waliif dhiisaa.”—Efesoon 4:32.

 Karaa gara biraammoo, yeroo hunda waldhabdee cimaan gidduu keessan kan jiru taanaan, lamaan keessan akka wal hin simne argisiisuu dandaʼa. Akkas taanaan, gaaʼela erga godhattanii booda wal baruuf yaaluu mannaa, ammuma akka gaariitti wal baruuf yaaluu qabdu.

 Yaada ijoo: Nama walitti dhufeenya jaalalaa gochaa jirtu ilaalchisee shakkii cimaa kan qabdu ykn ati gaaʼelaaf hin qophoofne taanaan shakkii qabdu kana callistee hin ilaalin.

 Qajeelfama Kitaaba Qulqulluu: “Namni abshaalli balaa ni arga, jalaas ni dhokata, namni muuxannoo hin qabne garuu ittuma deema, miidhaanis isa irra gaʼa.”—Fakkeenya 22:3.

 Gargar baʼuun miira irratti miidhaa cimaa geessisa. Haa taʼu malee, tokko ykn lamaan keessan waaʼee hariiroo keessanii shakkii guddaa qabdu taanaan gargar baʼuun gaarii taʼuu dandaʼa.

 Tarkaanfii kana fudhachuu kan qabdan akkamitti taʼuu qaba? Murtoo gootan qaamaan wal argitanii waliif ibsuun rakkisaa miti taanaan, karaa ergaa gabaabaa bilbilaa ykn karaa iimeelii waliif barreessuudhaan gargar baʼuun gaarii miti. Kanaa mannaa, dhimma cimaa kana irratti mariʼachuuf yeroo fi bakka mijataa taʼe filadhaa.

 Qajeelfama Kitaaba Qulqulluu: “Walii keessanitti dhugaa dubbadhaa.”—Zakkaariyaas 8:16.

 Gargar baatan jechuun wanta taʼe tokkoon milkaaʼina dhabde jechuudhaa? Matumaa. Walitti dhufeenya jaalalaa qabaachuu jechuun, nama sanaa wajjin gaaʼela godhachuuf ykn dhiisuuf murteessuuf si gargaaruu akka qabu yaadadhu. Walitti dhufeenyi keessan addaan citullee muuxannoo kanarraa barumsa guddaa argatta.

 Akkana jedhii of gaafadhu: ‘Walitti dhufeenya kana irraa waaʼee ofii koo barumsa akkamiin argadhe? Muuxannoon kun wanta barbaachisaa ani fooyyessuu qabu na barsiise qabaa? Gara fuulduraatti walitti dhufeenya jaalalaa yoon uume kanarraa haala adda taʼeen maal gochuun qaba?’