Kitaabni Qulqulluun gara samii kan deeman uumamawwan lafarra jiran keessaa ilmaan namootaa qofa akka taʼe barsiisa. (Mulʼata 14:1, 3) Gara samii kan deeman Yesuusii wajjin lubootaa fi mootota taʼuufi. (Luqaas 22:28-30; Mulʼata 5:9, 10) Ilmaan namootaa hedduunimmoo duʼaa kaʼanii lafa jannata taaturra jiraatu.—Faarfannaa 37:11, 29.

 Kitaabni Qulqulluun beelladni ykn sareen samiirra jiraatu akka jiru hin dubbatu; kanaafis sababii quubsaan jira. Bineeldonni ulaagaalee “waamicha isa samii irraa” argachuuf barbaachisan guutuu hin dandaʼan. (Ibroota 3:1) Ulaagaaleen kunis beekumsa argachuu, amantii akka qaban argisiisuu fi ulaagaalee Waaqayyootiif ajajamuudha. (Maatewos 19:17; Yohaannis 3:16; 17:3) Abdii bara baraaf jiraachuu kan qaban ilmaan namootaa qofadha.—Uumama 2:16, 17; 3:22, 23.

 Uumamawwan lafarra jiran gara samii deemuuf duʼaa kaʼuu qabu. (1 Qorontos 15:42) Kitaabni Qulqulluun waaʼee duʼaa kaʼuu kanaan dura raawwatame garaa garaa ni dubbata. (1 Mootota 17:17-24; 2 Mootota 4:32-37; 13:20, 21; Luqaas 7:11-15; 8:41, 42, 49-56; Yohaannis 11:38-44; Hojii Ergamootaa 9:36-42; 20:7-12) Haa taʼu malee, duʼaa kan kaafaman hundisaanii ilmaan namootaati malee bineeldota miti.

•  Bineeldonni lubbuu qabuu?

•  Lubbuun ni duutii?

•  Bineeldonni cubbuu ni raawwatuu?

•  Bineeldotatti garaa jabaachuun fudhatama qabaa?

 Lakki. Kitaabni Qulqulluun bineeldonnii fi namoonni matuma isaaniitiin iyyuu lubbuu akka taʼan dubbata. (Lakkoofsa 31:28) Addaam inni nama jalqabaa taʼe yeroo uumame lubbuun isaaf hin kennamne; kanaa mannaa“lubbuu jiraataa taʼe.” (Uumama 2:7, miiljalee) Lubbuun wantoota lamarraa jechuunis, “biyyoo lafaa” fi “hafuura jireenyaa” irraa uumame.

 Eeyyee. Kitaabni Qulqulluun lubbuun akka duutu barsiisa. (Leewwota 21:11, miiljalee; Hisqi’el 18:20) Bineeldonnii fi ilmaan namootaa yeroo duʼan biyyoo lafaatti deebiʼu. (Lallaba 3:19, 20) Akkas jechuun jireenyaa ala taʼu jechuudha. a

 Lakki. Cubbuu jechuun yaada, miira ykn gocha ulaagaalee Waaqaa wajjin wal faallessu jechuudha. Uumamni tokko cubbuu raawwachuuf naamusaa wajjin haala wal qabateen murtoo gochuu qaba; bineeldonni garuu dandeettii akkasii hin qaban. Jireenyasaanii isa gabaabaa taʼe keessatti dandeettii uumamumaan qabaniin wantoota tokko tokko raawwatu. (2 Pheexiros 2:12) Cubbuu kan hin raawwanne taʼus, dhumarratti ni duʼu.

 Lakki. Waaqayyo ilmaan namootaatiif bineeldotarratti aangoo kenneera; garuu, garaa akka isaanitti jabaatan isaaniif hin heyyamne. (Uumama 1:28; Faarfannaa 8:6-8) Waaqayyo simbirroota xixinnoo dabalatee tokkoon tokkoon bineeldotaatiif ni yaada. (Yoonaas 4:11; Maatewos 10:29) Waaqeffattoonnisaa bineeldotaaf akka yaadan ajajeera.—Baʼuu 23:12; Keessa Deebii 25:4; Fakkeenya 12:10.