Mootummoonni seera baasuu jalqabuu isaanii yeroo dheeraa dura uumaan keenya seera gaaʼelli ittiin geggeeffamu tumeera. Kutaan Kitaaba Qulqulluu inni jalqabaa akkana jedha: “Dhiirri abbaa isaa fi haadha isaa in dhiisa, haadha manaa isaattis in maxxana; isaan lachanuus foon tokko in taʼu.” (Uumama 2:24) Galmeen jechoota Kitaaba Qulqulluu Vaayin qopheesse inni Expository Dictionary of Biblical Words jedhamu akka ibsetti, jechi Afaan Ibrootaa “haadha manaa” jedhamee hiikame, [nama koorniyaan ishii dubartii taʼe argisiisa] ‘dubartii takka kan argisiisu dha.’ Yesuusis, namoonni gaaʼelaan walitti hidhaman “dhiiraa fi dubartii” taʼuu akka qaban mirkaneesseera.—Maatewos 19:4.

 Kanaafuu, kaayyoon Waaqayyoo, gaaʼelli walitti dhufeenya dhaabbataa fi cimaa dhiira tokkoo fi dubartii takka gidduutti uumamu akka taʼuuf ture. Dhiironnii fi dubartoonni hirʼina walii isaanii akka guutan godhamanii uumaman; kanaafuu fedhii miiraa fi qunnamtii saalaa, akkasumas fedhii ijoollee godhachuu qaban walii isaaniitiif guutuu ni dandaʼu.