Waggaa waggaatti namoonni kuma kudhaniin lakkaaʼaman gamoowwan waajjira damee Yunaayitid Isteetisii fi waajjira muummee Dhugaa Baatota Yihowaa Niiwu Yoorki Isteetitti argaman ni daawwatu. Iddoowwan akkasii afaan Ibrootaatiin Betʼel kan jedhaman yommuu taʼu, hiikni isaas “Mana Waaqayyoo” jechuu dha. Barreeffamoonni keenya akkamitti akka qophaaʼan ilaaluuf, hojiin keenya akkamitti akka gurmaaʼe baruu fi hiriyoota isaanii achi tajaajilan dubbisuuf namoonni fagoodhaas taʼe dhihoodhaa ni dhaqu. Namichi yeroo dhihoottii daawwate tokko iddoo kana dhaqee daawwachuuf kaayyoodhaan murteessee ture.

Maarseelas, inni Dhugaa Baatuu Yihowaa taʼee fi Ankoreej, Alaaskaa, U.S.A. jiraatu waggoota muraasa dura dhiigni isaa erga kantaree kaasee baayʼee dubbachuu hin dandaʼu. a Wiilcheriitti kan fayyadamu siʼa taʼu, waan tokko hojjechuuf gargaarsi isa barbaachisa. Rakkinoota kana hunda qabaatus, Betʼeliin daawwachuuf fedhii guddaa qaba. Akkuma hawwee ture yeroo dhihootti Betʼeliin daawwachuu dandaʼeera.

Kooreey hiriyaan isaa inni adeemsi Maarseelas akka milkaaʼu gargaare akkas jedheera: “Ejjennoon isaa kan hin laafne ture. Wanta haaraa natti himuuf yeroo hundumaa na waama. Maarseelas jecha baayʼee dubbachuu waan hin dandeenyeef, yeroo baayʼee ‘Eeyyee’ fi ‘Lakki’ qofa jedha; kanaaf yeroo inni na waamu walitti aansuudhaan gaaffii isa gaafachuun qaban ture.” Mareen isaanii kan armaan gadii fakkaata ture:

“Akkan dhufu barbaaddaa?”

“Lakki.”

“Doktoorii akkan waamu barbaaddaa?”

“Lakki.”

“Waaʼee deemsa Betʼeliif na barbaaddee?”

“Eeyyee.”

“Achiis daawwannicha ilaalchisee maal irra akkan gaʼen itti hima. Galma isaa irra gaʼee yommuun isa argu baayʼeen gammade.”

Maarseelas gara Betʼel deemuuf gufuuwwan hedduu keessa darbuu qaba ture. Galiin isaa muraasa waan taʼeef, qarshii kiilomeetira 5,400 gara Niiwu Yoorki deemuuf isa dandeessisu kaffaluuf waggaa lama walitti qabateera. Sababa fayyaa isaatiin kan kaʼe, miiltoo gaarii isa gargaaruu dandaʼu tokko barbaaddachuu qaba ture. Dhuma irratti deemsa kanaaf doktoora isaa irraa heyyama argachuu qaba; heyyama kanas deemuu isaa guyyoota muraasa dura argate.

Maarseelas, Niiwu Yoorkiin erga gaʼee booda waajjiroota Biruukiliin, Paatarsanii fi Woolkiilitti argaman daawwateera. Meeshaa guddaa kitaabotaa fi Macaafa Qulqulluu maxxansu kan arge siʼa taʼu, hojiin keenya akkamitti akka gurmaaʼe caalaatti barachuu dandaʼeera. Akkasumas egzibiishinii mata duree “The Bible and the Divine Name (Macaafa Qulqulluu fi Maqaa Waaqayyoo)” fi “A People for Jehovah’s Name (Saba Maqaa Yihowaatiif Adda Baʼe) jedhaman argeera.” Yeroo daawwannaa isaa kanatti hiriyoota haaraa hedduu argateera. Dhuguma iyyuu deemsa lammata hin agamne ture!

Namoonni baayʼeen daawwannaa Betʼel keessatti taasisan ibsuu akka hin dandeenye dubbatu. Maarseelas garuu daawwannaan Betʼel akka isa kiise yeroo gaafatamu wanti inni jechuu dandaʼu “Eeyyee. Eeyyee. Eeyyee.” kan jedhu dha!”

Akkuma Maarseelasiif taʼe daawwanaan Betʼel siifis taʼe maatii keetiif muuxannoo nama jajjabeessu taʼa. Waajjiroota damee keenya addunyaa maratti argaman daawwachuun ni dandaʼama. Maaliif dhufte nu daawwattu?