Seenaan kun namoota ariitiidhaan dubbisan tokko tokkotti gaaffii taʼuu dandaʼa. Haa taʼu malee, caqasoota kana irratti maqaa Mefibosheet jedhamuun kan waamaman namoota garaa garaa lama dha. Wanta raawwatame qoruudhaan barumsa irraa argachuu dandeenya.

Saaʼol inni mootii Israaʼel ture ilmaan torbaa fi ijoollee durbaa lama qaba ture. Ilmi Saaʼol inni angafaa Yonaataani. Yeroo booda mootichi haadha manaa isaa lammaffaa Rizphaa irraa mucaa Mefibosheet jedhamu godhate. Kan nama dinqisiisu Yonaataanis ilma Mefibosheet jedhamu qaba. Kanaafuu, Saaʼol Mootichi ilma Mefibosheet jedhamuu fi ilma ilmaa maqaa kanaan waamamu qaba.

Yeroo taʼe tokkotti Saaʼol Mootichi Gibeʼonota Israaʼelota gidduu jiraatan irratti kaʼee isaan balleessuuf yaale. Haala isaa irraa hubachuun akka dandaʼamutti muraasni isaanii ajjeefamaniiru. Kun dogoggora akka taʼe ifa dha. Maaliif? Sababiin isaas bara Iyyaasuutti geggeessitoonni Israaʼel Gibeʼonotaa wajjin kakuu nagaa galanii turan.—Iya. 9:3-27.

Kakuun sun bara Saaʼol Mootichaattis ni hojjeta ture. Mootichi kakuu kana cabsuudhaan Gibeʼonota haxaaʼee balleessuuf yaale. Kun immoo, ‘Saaʼolii fi manni isaa dhiiga dhangalaasuudhaan akka itti gaafataman’ godheera. (2 Sam. 21:1) Yeroo booda Daawit mootii taʼee bulchuu jalqabe. Gibeʼononni badiisa sana irraa oolanis waaʼee balleessaa cimaa isaan irratti raawwatame kanaa Daawititti himan. Daawitis dogoggora cimaa Saaʼol raawwateef araara buusuunii fi Yihowaan biyyattii akka eebbisu gochuun kan dandaʼamu akkamitti akka taʼe isaan gaafate. Gibeʼononni garuu maallaqa gaafachuu mannaa, Saaʼol isaan ‘fixuuf isaan irratti malatee’ waan tureef, ilmaan isaa keessaa torba akka isaaniif kennamanii fi akka ajjeefaman gaafatan. (Lak. 35:30, 31) Daawitis wanti isaan gaafatan akka isaaniif raawwatamu heyyame.—2 Sam. 21:2-6.

Yeroo sanatti Saaʼolii fi Yonaataan waraana irratti kan ajjeefaman taʼus, ilmi Yonaataan Mefibosheet garuu lubbuudhaan jira ture. Mefibosheet balaa ijoollummaa isaatti isarra gaʼeen kan kaʼe naafa taʼee ture; kanaafuu, haleellaa akaakayyuun isaa Gibeʼonota irratti bane irratti hin hirmaanne. Daawit Yonaataan wajjin kakuu michummaa galee ture; kun immoo Mefibosheet ilma Yonaataan dabalatee sanyii isaatiif faayidaa argamsiisa. (1 Sam. 18:1; 20:42) Seenaan isaa akkana jedha: “Kakaa . . . Yihowaa duratti galameen kan kaʼe, [Daawit] mootichi Mefibosheet ilma Yonaataan ilma Saaʼolitti gara laafina ni argisiise.”—2 Sam. 21:7.

Taʼus, Daawit wanti Gibeʼononni gaafatan akka isaaniif raawwatamu heyyameera. Ilmaan Saaʼol lamaan dabarsee kenne; isaan keessaa tokko Mefibosheet jedhama ture; akkasumas ilmaan intala Saaʼol shanan dabarsee kenneera. (2 Sam. 21:8, 9) Tarkaanfiin Daawit fudhate biyyattiin sana booda dhiiga dhangalaasuudhaan akka itti hin gaafatamne godheera.

Taʼeen kun seenaa qofa miti. Seerri Waaqayyoo, “Wanta abbootiin [godhaniif] ijoolleen ajjeefamuu hin qaban” jechuudhaan ifatti dubbata. (Kes. 24:16) Ilmaan Saaʼol lamaanii fi ilmaan intala isaa shanan balleessaa hin qaban utuu taʼee Yihowaan akka ajjeefaman hin heyyamu ture. Seerichi itti fufuudhaan, “Namni tokko cubbuu ofii isaatiif qofa ajjeefamuu qaba” jedha. Ilmaan Saaʼol lamaanii fi ilmaan intala isaa shanan warri ajjeefaman, duguuggaa sanyii Saaʼol Gibeʼonota irratti raawwachuuf yaale irratti karaa taʼe tokkoon hirmaataniiru. Kanaan kan kaʼes, torban isaanii iyyuu gocha dogoggoraa raawwataniif adabamaniiru.

Seenaan kun, namni tokko qajeelfama hordofaa akka jiru yaaduudhaan ykn dubbachuudhaan wanta dogoggora taʼe raawwachuuf sababa dhiheessuu akka hin dandeenye nu barsiisa. Fakkeenyi ogummaa irratti hundaaʼe tokko, “Daandii miila keetii wal qixxeeffadhu, daandiin kee hundis amansiisaa ni taʼa” jedha.—Fak. 4:24-27; Efe. 5:15.