Gaaffii Dubbistootaa

Seexanni samiirraa kan gad darbatame yoomi?—Mul. 12:1-9.

Macaafni Mul’ataa yeroo murtaa’aa Seexanni itti gad darbatame caqasuu baatus, wantoota gurguddaa yommuu inni waaqarraa itti gad darbatame raawwatamaniifi yeroo kana tilmaamuuf nu dandeessisan ni caqasa. Jalqabarratti wantoota raawwataman keessaa tokko, Mootummaan Masiihichaa hundeeffamuusaati. Ittaansuudhaan “waaqa keessatti lolli” ka’ee, Seexanni mo’amuudhaan waaqarraa gad darbatameera.

Caaffanni Qulqullaa’oon barri 1914, yeroo ‘barri warra saba Waaqayyoo hin ta’initti kenname itti raawwatameefi’ Mootummichi itti hundeeffame akka ta’e argisiisu. * (Luq. 21:24) Waraanni waaqarratti banameefi Seexanni akka gad darbatamu godhe, sana booda hammam turee jalqabe?

Mul’anni 12:4, “Bineensi akka jawwee sunis [Seexanni] yeroo dubartittiin deessu mucaa ishee liqimsuudhaaf jedhee, ishee da’uuf jettu sana dura in dhaabate” jedha. Kunis Seexanni utuu danda’ee, Mootummaa haaraa hundeeffame kana battaluma sanatti balleessuu akka barbaade argisiisa. Yihowaan gidduu galuudhaan hammeenya Seexanni raawwachuuf ture kan fashaleesse ta’us, Seexanni Mootummaa hundeeffame kana balleessuuf carraaqqii cimaa godheera. Kanaaf, “Mikaa’el, ergamoota isaa wajjin,” ‘bineensichi akka jawwee suniifi ergamoonnisaa’ Mootummicharratti miidhaa akka hin geessisne, battalumaan waaqarraa isaan balleessuuf tarkaanfii fudhateera. Kunimmoo Seexanni kan mo’ameefi kan gad darbatame, Mootummaan haaraan kun bara 1914⁠tti akkuma hundeeffameen ta’uusaa argisiisa.

Ragaan inni kaanimmoo, du’aa ka’uu Kiristiyaanota dibamoo isa akka Caaffanni Qulqullaa’oon jedhanitti, Mootummichi hundeeffamee utuu baay’ee hin turin jalqabamedha. * (Mul. 20:6) Obboloota Kiristos warra dibamoo keessaa tokkoyyuu Yesusii wajjin ta’uudhaan bineensicha akka jawwee sanaafi ergamootasaa loluurratti hirmaachuunsaa hin caqasamne. Kanaafuu, obboloonni Yesus du’aa ka’uu kan jalqaban, waaqarratti lolli erga ta’ee, akkasumas Seexanniifi ergamoonnisaa erga gad darbatamanii boodadha.

Dhugaadha, Macaafni Qulqulluun Seexanniifi ergamoonnisaa waaqarraa kan gad darbataman yeroo kanatti jedhee hin ibsu. Ta’us, Yesus Kiristos bara 1914⁠tti mootii akkuma ta’een darbatamuusaanii hubachuu dandeenya.

[Miiljaleewwan]