Abbaa fi Haati kan wal jaallatanii fi kan wal kabajan taanaan, mucaan tokko haala gaariidhaan akka guddatu gargaara. (Qolosaayis 3:14, 19) Abbaa fi haati gaariin ijoollee isaanii ni jaallatu, akkasumas akkuma Yihowaan ilma isaa jajate, isaanis isaan jajatu.—Maatewos 3:17 dubbisi.

Abbaan keenya inni samii tajaajiltoota isaa ni dhaggeeffata, miira isaaniitiifis xiyyeeffannaa ni kenna. Warris fakkeenya isaa hordofuudhaan wanta ijoolleen isaanii jedhan dhaggeeffachuun isaanii gaarii dha. (Yaaqoob 1:19) Wanti tokko sirrii akka hin taane yeroo dubbatan dabalatee, miira ijoollee isaanii hunda hubachuu qabu.—Lakkoobsa 11:11, 15 dubbisi.

Warra waan taataniif, seera baasuuf aangoo qabdu. (Efesoon 6:1) Fakkeenya waaqayyoo hordofaa. Waaqayyo Ijoollee isaatiif seera ifa taʼe baasuu fi seera sana cabsuun miidhaa akkamii akka qabu isaaniif ibsuudhaan akka isaan jaallatu argisiiseera. (Uumama 3:3) Haa taʼu malee, namoonni akka isaaf abboomaman dirqisiisuu mannaa, wanta sirrii taʼe raawwachuudhaan faayidaa argachuu kan dandaʼan akkamitti akka taʼe isaan barsiisa.—Isaayaas 48:18, 19 dubbisi.

Ijoolleen keessan Waaqayyoon akka jaallatan gargaaruuf galma baafadhaa. Akkas taanaan yeroo isinii wajjin hin jirretti illee ogummaadhaan deddeebiʼu. Akkuma Waaqayyo fakkeenya taʼuudhaan barsiisu, isinis ijoollee keessaniif fakkeenya taʼuudhaan isaan barsiisaa.—Keessa Deebii 6:5-7; Efesoon 4:32; 5:1 dubbisi.