Phaawulos ergamaan, xalayaa Tiitoodhaaf barreesse irratti, isa dabalatee dargaggoonni dhiirota taʼan “hojii gaarii hojjechuudhaan karaa hundumaatiin fakkeenya” taʼuuf carraaquu akka qaban barreesseera. (Tit 2:6, 7) Yeroo booda boqonnaadhuma kana irratti, sabni Yihowaa waan qulqulleeffamaniif ‘hojii gaariidhaaf hinaafuu’ akka qaban ibseera. (Tit 2:14) Hojiiwwan gaarii jedhaman keessaa tokko waaʼee Mootummaa Waaqayyoo lallabuu fi barsiisuu dha. Dargaggeessa yoo taate, jabina qabdutti fayyadamtee qajeelchaa gargaaraa ykn qajeelchaa yeroo hundaa taatee tajaajiluu ni dandeessaa?—Fak 20:29.

Qajeelchaa taatee tajaajiluu yoo barbaadde, jireenya kee irratti sirreeffama gochuuf karoora baafadhu. (Luq 14:28-30) Fakkeenyaaf, tajaajila yeroo guutuu keessatti yommuu hirmaatutti karaa qarshiitiin of dandaʼuu kan dandeessu akkamitti? Saʼaatii si irraa barbaadamu guutuu kan dandeessu akkamitti? Yihowaan akka si gargaaru kadhadhu. (Far 37:5) Karoora baafatte irratti warra kee fi obboloota qajeelchitoota taʼuudhaan milkaaʼina argatan wajjin mariʼadhu. Galma baafatte irra gaʼuuf immoo tarkaanfii fudhadhu. Carraaqqii hinaaffaadhaan tajaajiluuf goote Yihowaan akka siif eebbisu mirkanaaʼaa taʼi!

VIIDIYOO DARGAGGOOTA YIHOWAADHAAF ULFINA KENNAA JIRAN JEDHAMU ILAALAA; ACHIIS GAAFFIIWWAN KANAA GADII DEEBISUUF YAALAA:

• Dargaggoonni tokko tokko, qajeelchitoota taʼanii tajaajiluuf rakkoowwan akkamii mooʼaniiru? Rakkoowwan kana kan mooʼan hoo akkamitti?

• Warri, ijoolleen isaanii qajeelchitoota yeroo hundaa akka taʼan isaan gargaaruu kan dandaʼan akkamitti?

• Tajaajilaaf sagantaa baafachuun barbaachisaa kan taʼe maaliifi?

• Miseensonni gumii qajeelchitoota jajjabeessuu fi gargaaruu kan dandaʼan akkamitti?

• Obboloonni qajeelchitoota taʼanii tajaajilan eebba akkamii argatu?